ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިއަދު ހަވީރު ކ. ގުރައިދޫ ބަލިކޮށް، ދެވަނަ ބުރުގެ ޖާގައެއް ޅ. ކުރެންދޫން ހޯދައިފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް ސީގެ މެޗު ކުރެންދޫން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މި މެޗުން ބަލިވި ނަމަވެސް ގުރައިދުއަށްވެސް ވަނީ ދެވަނަ ބުރުގެ ޖާގަ ޔަގީންވެފައެވެ. މި ގްރޫޕުން އެއްވަނަ ހޯދީ ފަސް ޕޮއިންޓް ހަމަކުރި އައްޑޫ ސިޓީއެވެ. ދެވަނަ ހޯދި ގުރައިދޫ އާއި ތިންވަނަ ހޯދި ކުރެންދުއަށް ހަތަރު ޕޮއިންޓް ލިބިފައިވާއިރު، މި ގްރޫޕުން ކެޓީ ތިން ޕޮއިންޓް ލިބުނު ކ. ހުރާއެވެ.
މިއަދު ކުޅުނު މެޗުގައި ފެނިގެންދިޔަ ހަމައެކަނި ލަނޑު މެޗުގެ 34 ވަނަ މިނެޓުގައި ކުރެންދުއަށް ކާމިޔާބުކޮށްދިނީ ބެލްޖިއަމް މިޑްފީލްޑަރު ޖޯޑީ ބާޓްއެވެ. އޭނާ މި ލަނޑު ކާމިޔާބުކުރީ އޭރިއާތެރެއިން ލިބުނު ބޯޅައަކުންނެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރަމުން އަންނައިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.