އަލަށް ޤާއިމްކުރާ ކްލިނިކްތަކުގައި އަންނަ އަހަރު ކުރީކޮޅު ޚިދުމަތް ފަށާނެ: އިބްރާހީމް ޢަބްދުއްރައްޒާޤު ޙަލީމް

އައިޖީއެމްއެޗަށް ޑޮކްޓަރަށް ދެއްކުމަށް ދާ މީހުންގެ ކިޔު ކުޑަކުރުމަށްޓަކައި މާލޭގެ އެކި ސަރަހައްދުތަކުގައި ޤާއިމްކުރުމަށް ނިންމި ޖެނެރަލް ޕްރެކްޓިސް ކްލިނިކްތަކުގެ ޚިދުމަތް އަންނަ އަހަރުގެ ފުރަތަމަ ކުއަރޓަރުގައި ހިދުމަތްދޭން ފަށްޓަވާނެކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވެއްޖެއެވެ.

އައިޖީއެމްއެޗާއި ދަރުމަވަންތަ ހޮސްޕިޓަލަށް ޑޮކްޓަރަށް ދެއްކުމަށް އޮންނަ ޑިމާންޑު އަންނަނީ އިތުރުވަމުންނެވެ. މިއާއެކު ޑޮކްޓަރަށް ދެއްކުމަށް ކިޔުގައި ގިނަ ބަޔަކު ތިބެންޖެހެއެވެ.

އައިޖީއެމްއެޗްގެ ތަފާސްހިސާބުތައް ދައްކާގޮތުން އިމަޖެންސީއާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އަހަރަކު 150،000 އަށްވުރެ މައްޗެވެ. އަދި އޯޕީޑީ ކޮންސަލްޓޭޝާންގެ ހިދުމަތް ހޯދުމަށް މީހުން ޒިޔާރަތްކޮށްފައިވާ އަދަދު އުޅެނީ 240،000 ގައެވެ. އަދި ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 238،000 އަށްވުރެ މަތީގައެވެ.

މިއާއެކު އެކަމަށް ޙައްލެއް ގެނައުމަށް މާލޭގެ 4 ސަރަޙައްދެއްގައި ޖެނެރަލް ޕްރެކްޓިސް (ޖީޕީ) ކްލިނިކްތައް ޤާއިމްކުރުމަށް ވަނީ ނިންމާފައެވެ.

މި މަސައްކަތާއި ގުޅޭގޮތުން ޕީއެސްއެމް ނިއުސްއަށް މައުލޫމާތު ދެއްވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާގު ޙަލީމް ވިދާޅުވީ ކްލިނިކްތައް ޤާއިމުކުރާނެ ސަރަހައްދުތަކާއި ބަޖެޓް ހަމަޖެއްސުމާއި ގުޅޭގޮތުން ސަރުކާރުގެ ވުޒާރާތަކާއި މަޝްވަރާ ކުރައްވަމުންދާ ކަމަށެވެ. މިހާތަނަށް ކުރެވުނު މަޝްވަރާތަކުގައި، ކްލިނިކްތައް ޤާއިމްކުރުމަށް ކަނޑައަޅާފައިވަނީ މާލެސިޓީގެ ހެންވޭރާއި މާފަންނާއި ގަލޮޅުގައި ކަމަށެވެ. އަދި ހުޅުމާލެ ފޭސް 1 އަދި 2 ގައި ވެސް ޖީޕީ ކްލިނިކް ޤާއިމުކުރުމަށް މަޝްވަރާ ކުރައްވަމުންދާ ކަމަށް އިބްރާހީމް ޙަލީމް ވިދާޅުވިއެވެ.

މި ކްލިނިކްތައް ޤާއިމްކުރުމުން ޖެނެރަލް ޕްރެކްޓިޝަނަރއަކަށް ކްލިނިކަށް ދެއްކުމަށް ފަހު، ޚާއްސަ ބަލީގެ ޑޮކްޓަރަށް ދައްކަންޖެހޭނަމަ އެ އިރުޝާދެއް ދިނުމާއި، ޚައްޞަ ފަރުވާގެ ކަންކަން ހަމަޖައްސާނީ އެ ކްލިނިކްގެ ފަރާތުންކަމަށްވެސް އިބްރާހީމް ޙަލީމް ވިދާޅުވިއެވެ.

މާލޭގެ 4 ސަރަހައްދެއްގައި ޖީޕީ ކްލިނިކް ޤާއިމުކުރުމަށް ސަރުކާރުން މަސައްކަތް ކުރަމުންދާއިރު މިވަގުތު ހުޅުމާލެ ހޮސްޕިޓަލުން ހިންގާ ޖީޕީ ކްލިނިކެއް ހުޅުމާލެ ދެވަނަ ފިޔަވަހި ހިޔާ ޓަވަރު 16ގައި އަންނަނީ ހިންގަމުންނެވެ.