ވިލުންތެރި ގެދޮރު ބިނާކުރުމުގެ އިރުޝާދު ފޮތާއެކު އިމާރާތްކުރުމުގެ މަސައްކަތަށް ހެޔޮ ބަދަލެއް އަންނާނެ: ވަޒީރު މުއްޠަލިބް

ރާއްޖޭގައި ވިލުންތެރި ގެދޮރު ބިނާކުރުމުގެ އިރުޝާދުގެ ފޮތާއެކު އިމާރާތްކުރުމުގެ މަސައްކަތަށް ހެޔޮ ބަދަލެއް އަންނާނެކަމަށް އިމާރާތްކުރުމާއި ބިނާރާ ބެހޭ ވަޒީރު، ޑރ. ޢަބްދުﷲ މުއްޠަލިބް ވިދާޅުވެއްޖެއެވެ. ވަޒީރު މިފަދައިން ވިދާޅުވީ ވިލުންތެރި ގެދޮރު ބިނާކުރުމުގެ އިރުޝާދު އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ރާއްޖޭގައި ވިލުންތެރި ގެދޮރު ބިނާކުރުމުގެ އިރުޝާދު އިފްތިތާހު ކުރުމަށް ބޭއްވި ރަސްމިއްޔާތުގައި މި ފޮތް އިފްތިތާހުކުރުމަށްފަހު ވަނީ ލޯކަލް ގަވަރމަންޓް އޮތޯރިޓީއާ ހަވާލުކުރައްވާފައެވެ. މި ފޮތް އިފްތިތާހުކުރީ މޯލްޑިވްސް އާބަން ޑިވެލޮޕްމަންޓް އެންޑް ރިސައިލަންސް ޕްރޮޖެކްޓުގެ ދަށުން ވާރލްޑް ބޭންކާއި ސަރުކާރު ގުޅިގެންނެވެ.

މި ފޮތުގައި އިރުޝާދުތައް ބިނާވެފައިވަނީ ރާއްޖޭގެ ހާލަތާއި ގުޅޭ ބައިނަލްއަޤްވާމީ އެންމެ ރަނގަޅު އުސޫލަތަކާއި އިންޖިނިއަރިންގ ޑިޒައިންތަކުގެ މައްޗަށެވެ. މި އިރުޝާދުތައް ތައްޔާރުކޮށްފައިވަނީ ގިނަ ދިރާސާތައް ކުރުމަށްފަހު، ގެދޮރުތަކުގެ ހާލަތްތައް ދެނެގަނެ، ކަމާއި ގުޅޭ ފަރާތްތަކާއެކު މަޝްވަރާ ކުރުމަށްފަހު ކަމަށް އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވިއެވެ.

މި ފޮތުގައި ކާރިސާތަކާއި މޫސުމަށް އަންނަ ބަދަލުތަކުން ގެ ރައްކާތެރިވެ ވަރުގަދަކުރުމަށާއި ދެމެހެއްޓެނެވިކަން އިތުރުވެ، ކަރަންޓު ޚަރަދު ކުޑަވެ ތިމާވެއްޓާއި ރައްޓެހިތަކެތި ބޭނުންކުރުމަށް ކުރެވިދާނެކަންކަން ވަނީ ބަޔާންކޮށްފައެވެ. އަދި އަލަށް ގެދޮރު އިމާރާތްކުރާ މީހުންނަށާއި އަޅާފައިހުރި ގެއެއް ފެންވަރު ރަނގަޅުކުރަން ބޭނުންވާ މީހުންނަށްވެސް މި ފޮތުގެ ބޭނުން ހިފިދާނެއެވެ.

މި ރަސްމިއްޔާތުގައި އިމާރާތްކުރުމާއި ބިނާރާ ބެހޭ ވަޒީރު، ޑރ. ޢަބްދުﷲ މުއްޠަލިބް ވިދާޅުވީ ރާއްޖެ އުފެދިފައި އޮންނަ ގޮތުންނާއި މޫސުމަށް އަންނަ ބަދަލުތަކުގެ ސަބަބުން ގޮންޖެހުންތައް ދިމާވާ ކަމަށެވެ. އަދި ގެދޮރު އިމާރާތްކުރުން ފަދަ މުހިންމު މަސައްކަތެއް ކުރާއިރު އެ ތަންތަނަކީ އެންމެ ރައްކާތެރިކޮށް އިމާރާތް ކުރެވޭ ތަނެއްކަން ކަށަވަރު ކުރުމަކީ ކޮންމެހެން ކުރަންޖެހޭ ކަމެއްކަމަށް ވިދާޅުވިއެވެ.

ވަޒީރު ޑރ. މުއްޠަލިބް ވިދާޅުވީ މި ފޮތުގެ އެހީގައި ރައްކާތެރި، ދެމެހެއްޓެނެވި އަދި ކަރަންޓަށް ކުރާ ހޭދަވެސް ކުޑަވާނެހެން ގެދޮރު ބިނާކުރެވޭނެ ގޮތުގެ މައުލޫމާތުތައް ލިބިގެންދާނެ ކަމަށެވެ.

"އަޅުގަނޑު އިލްތިމާސް ކުރަން ހުރިހާ ފަރާތްތަކުންވެސް ގެދޮރު އިމާރާތްކުރާއިރު މި ފޮތުގައި ހުރި ގައިޑްލައިންތަކާއި އެއްގޮތަށް އަމަލުކުރުމަށް، ބޭނުންވަނީ މި ފޮތާއެކު ރަނގަޅު ހެޔޮ ބަދަލުތަކެއް ފެނިގެންދާން" ވަޒީރު ވިދާޅުވިއެވެ.

ރަސްމިއްޔާތުގައި ލޯކަލް ގަވަރމަންޓް އޮތޯރިޓީ، އެލްޖީއޭގެ ސީއީއޯ މުޙައްމަދު ނިމާލް ވިދާޅުވީ މި ފޮތަކީ ގެދޮރު އިމާރާތްކުރުމުގެ މަސައްކަތުގައި އުޅޭ މީހުންނަށް ލިބިގެންދިޔަ ބޮޑު އެހީތެރިކަމެއް ކަމަށެވެ. މިއީ ހަމައެކަނި ފޮތެއް ނޫން ކަމަށާއި މިއީ އެފަދަ މަސައްކަތެއްގެ މަގުޗާޓުކަން ނިމާލް ފާހަގަކުރެއްވިއެވެ.

2022 ވަނަ އަހަރުގެ ތެރޭގައި މޫސުމާއި ގުޅުންހުރި 128 ހާދިސާއެއް ރާއްޖޭގެ 19 އަތޮޅުގައި ހިނގާފައިވާއިރު އެންމެ ގިނައިން ހިނގާފައިވަނީ އުދައެރުމުގެ ހާދިސާތަކެވެ. މީގެއިތުރުން ފެންބޮޑުވުމާއި ވައިގަދަވުމުގެ ހާދިސާތައް ވެސް ހިމެނެއެވެ. މޫސުމަށް އަންނަ ހިރާސްތައް ބޮޑުވުމުގެ އިތުރުން ރައްޔިތުންނަށް އިމާރާތް ކުރުމުގެ ތަކެއްޗާއި މަސައްކަތުގެ އަގުބޮޑުވުމާއި އިމާރާތްކުރުމަށް ބޭނުންވާ ފަންނީ އެހީތެރިކަން ލިބުމުގެ ދަތިތަކާއި ކުރިމަތިލާންޖެހިފައިވާއިރު މި ފޮތާއެކު ގިނަ ހައްލުތަކެއް ލިބިގެންދާނެކަމަށް ވާރލްޑް ބޭންކުން ޤަބޫލުކުރެއެވެ.