ޞިއްޙީ ޙާލުކޮޅު ހުރިގޮތުން ވަޒީރު ޑރ.ރަމީލާ އިސްތިއުފާދެއްވައިފި، ރައީސް އެދިވަޑައިގަތީ އަވަސް ޝިފާއަކަށް

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާގެ ޞިއްޙީ ޙާލުކޮޅު ހުރިގޮތުން ވަޒީރުކަމުން އިސްތިއުފާ ދެއްވައިފިއެވެ. ޑރ. ރަމީލާ އިސްތިއުފާ ދެއްވިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުންނެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ގެންދަވަނީ ކެންސަރު ބައްޔަށް ފަރުވާ ހޯއްދަވަމުންނެވެ. ބަލި މިހާރު ހުރީ އެޑްވާންސް ސްޓޭޖުގައިކަމަށް އެކަމަނާ ވަނީ މީގެކުރިން ވިދާޅުވެފައެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާގެ އިސްތިއުފާ ޤަބޫލުކުރައްވައި ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ނެރުއްވި ބަޔާންގައި ވިދާޅުވީ، އެކަމަނާ އަލާސްކަންފުޅުގައި އުޅުއްވަމުންވެސް، ވަޒީރުގެ ހައިސިއްޔަތުން، ދިވެހިރާއްޖޭގެ ޤާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވެފައިވާކަމަށެވެ. އަދި އެކަމުގައި އެކަމަނާ ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި ރައީސުލްޖުމްހޫރިއްޔާ ވަނީ ޑރ. ރާމީލާއަށް ޝުކުރު އަދާކުރައްވާފައެވެ.

ޑރ. ރަމީލާ ފަދަ ހީވާގި އަމާނާތްތެރި، ޤާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބިވަޑައިގެންނެވި އުފަލެއްކަން ފާހަގަކުރައްވައި، ރައީސުލްޖުމްހޫރިއްޔާ ވަނީ ކުރިއަށް އޮތްތާނގައިވެސް އެކަމަނާގެ ޚިދުމަތް ދިވެހި ޤައުމަށް ލިބޭނެކަން ޔަޤީންކުރައްވާކަމަށް ވިދާޅުވެފައެވެ.

ޑޮކްޓަރ ޢާއިޝަތު ރަމީލާގެ ޞިއްޙީ ޙާލުކޮޅު ހުރިގޮތުން ވަޒީރުކަމުގެ މަޤާމުން އިސްތިޢުފާ ދެއްވުމަށް ހުށައެޅުއްވުމުން، އެކަމަނާގެ އިސްތިއުފާ ޤަބޫލުފުޅު ކުރައްވައި، ރައީސުލްޖުމްހޫރިއްޔާ ވަނީ އެކަމަނާއަށް އަވަސް ޝިފާއަކަށް އެދިވަޑައިގެންފައެވެ.

"އަޅުގަނޑުގެ ދުޢާއަކީ، ޑޮކްޓަރ ޢާއިޝަތު ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި މާތްﷲ ގެ ތަނަވަސް ރަޙުމަތްފުޅުން ޑޮކްޓަރ ޢާއިޝަތު ރަމީލާއަށް އަވަސް އަދި ދާއިމީ ޝިފާއެއް މިންވަރު ކުރައްވައި އަދަށްވުރެ އުފާވެރި ފާގަތި މުސްތަޤުބަލެއް މިންވަރުކުރެއްވުން" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ދަނޑުވެރިކަމާއި ދިރޭތަކެއްޗާ ބެހޭ ވުޒީރުކަމަށް ޑޮކްޓަރ ޢާއިޝަތު ރަމީލާ އައްޔަންކުރެއްވީ ނޮވެމްބަރު މަހުގެ 17ވަނަ ދުވަހުއެވެ. އެ މަޤާމުގައި ހުންނަވައިގެން އެކަމަނާ ވަނީ އެ ދާއިރާއަށް ގިނަ ކުރިއެރުންތަކެއް ހޯއްދަވައިދެއްވާފައެވެ.