ކައުންސިލްތަކާ ގުޅުންބަދަހިވެ، އިތުބާރު ލިބިއްޖެ: ކައުންސިލްތަކާބެހޭ ވަޒީރު

ފާއިތުވި އަހަރެއްހާ ދުވަހުގެތެރޭގައި ސަރުކާރާއި ކައުންސިލްތަކާއެކު އޮތް ގުޅުން ބަދަހިވެ، ކައުންސިލްތަކުގެ އިތުބާރު ލިބިއްޖެކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ސަރުކާރަށް އެއްއަހަރު ވުމާއި ގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި ވާހަކަފުޅުދައްކަވަމުންނެވެ.

ހަފްތާ 52 ޕްރޮގްރާމުގައި ވާހަކަފުޅު ދައްކަވަމުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވީ، މި ސަރުކާރުން ލާމަރުކަޒީ ނިޒާމު ހަރުދަނާކުރުމަށް ކައުންސިލްތަކަށް ޚާއްސަ ވުޒާރާއެއް އުފެއްދީ ކައުންސިލްތަކާ ގާތުން މަސައްކަތްކޮށް ރައްޔިތުންނަށް ބޭނުންވާ ޚިދުމަތްތައް ކަށަވަރުކޮށްދިނުމަށްކަމަށެވެ.

އެގޮތުން ފާއިތުވި އެއްހަރުގެ ތެރޭގައި 280ށްވުރެ ގިނަ ކައުންސިލާއެކު ބައްދަލުވުންތައް އެވުޒާރާއިން ބޭއްވި ކަމަށާއި ފާއިތުވި އެއްއަހަރު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު 169 ކައުންސިލާ ބައްދަލުކުރެއްވިކަން ވަޒީރު ފާހަގަކުރެއްވިއެވެ. މިކަމުންވެސް އަންގައިދެނީ މި ސަރުކާރުން ކައުންސިލްތަކާއެކު އޮންނަ ގުޅުން ބަދަހިކުރުމަށް ކުރައްވާ މަސައްކަތްކަމަށް ވަޒީރު ވިދާޅުވިއެވެ.

ވަޒީރު އާދަމް ޝަރީފް ވިދާޅުވީ ކައުންސިލްތަކުން ސަރުކާރަށް ކުރާ އިތުބާރު ބޮޑުވެ، ކަންކަމުގައި އެއްބާރުލުން ވަރަށް ބޮޑަށް ލިބެމުން އަންނަކަމަށެވެ. އަދި ހަޤީޤީ މާނާގައި ކައުންސިލްތައް ބާރުވެރި ކުރެވޭނީ ކައުންސިލްތަކަށް މާލީ ފުދުންތެރިކަން ލިބިގެންކަން ވަޒީރު ފާހަގަކުރައްވާ ވަޒީރު ވަނީ އެކަމަށް މަސައްކަތްތަކެއް ކުރައްވާކަމަށް ވިދާޅުވެފައެވެ.

"ރައީސް ވަނީ ކޮންމެ ކައުންސިލަކަށްވެސް ފަޅުރަށެއް ލިބޭނެ އުސޫލެއް އިއުލާންކުރައްވާފައި، އޭގެ ދަށުން ކައުންސިލްތަކުން ފަޅުރަށްތައް ހޯދުމަށް ހުށަހަޅާފައިވޭ، ކޮންމެ ރަށަކުން ލިބޭ ގްރީންޓެކްސްގެ 10 ޕަސަންޓް ކައުންސިލަށް ލިބޭގޮތަށް ރައީސް ވަނީ ކަނޑައަޅުއްވާފައި. ރައީސް މިހާރު ވަނީ އޭޖީ އޮފީހަށް އެކަން ހަމަޖެއްސުމަށްޓަކާ ބޭނުންވާ ޤާނޫނީ ބަދަލުތައް ހަމަޖެއްސުމުގެ ނިޒާމު ކަނޑައަޅުއްވަން އަންގަވާފައި" ވަޒީރު އާދަމް ޝަރީފް ޢުމަރު ވިދާޅުވިއެވެ.

ކައުންސިލްތަކަށް އެންމެ ބޮޑަށް ބޭނުންވާ ކަމަކީ މަސައްކަތް ކުރެވޭނެ ރަނގަޅު މާހައުލެއް ޤާއިމުކޮށްދިނުން ކަމަށާއި އެކަމަށްޓަކާއި، ކައުންސިލް ޢިމާރާތްތައް އެޅުމުގެ މަޝްރޫޢުއެއް ހިންގަވާކަން ވަޒީރު ފާހަގަކުރެއްވިއެވެ. އަދި ޤާނޫނީ ނިޒާމުގެ ތެރެއިން ކައުންސިލްތަކަށް އިތުރު ބާރުވެރިކަންދީގެ މަސައްކަތްކުރުމުގެ ވަރަށް ގިނަ ބަދަލުތައް ކުރިއަށްއޮތްތަނުގައި ފެންނާނެކަމަށްވެސް ވަޒީރު ވިދާޅުވިއެވެ.

ލާމަރުކަޒީ ނިޒާމާއި ބެހޭގޮތުން ވާހަކަ ދައްކަވަމުން ވަޒީރު ވިދާޅުވީ ރާއްޖޭގައި ލާމަރުކަޒީ ނިޒާމު އޮންނަންޖެހޭ ކަމަށް ރައްޔިތުން ޤަބޫލުކޮށް، އެ ނިޒާމު ބަލައިގެންފިކަމަށެވެ. ނަމަވެސް ލާމަރުކަޒީ ނިޒާމުގެ ޤާނޫނަށް މީގެކުރިން ގެނެވުނު ބައެއް ބަދަލުތަކަކީ ޖަޒުބާތުގައި ޖެހިގެން ގެނެވުނު ބަދަލުތަކެއްކަމަށް ވަޒީރު ސިފަކުރެއްވިއެވެ.

"އޭގެތެރޭގައި ކައުންސިލްތަކުގައި ފުރަތަމަ 5 މެމްބަރުން ތިބެފައި، ފަހުން 3 މެމްބަރުން ތިބޭގޮތަށް ކަނޑައެޅި. އަދި އެއީ ދިރާސާތަކެއްގެ މައްޗަށް ބިނާކޮށްގެން ގެނެވުނު ބަދަލުތަކެއް ނޫން" ވަޒީރު އާދަމް ޝަރީފް ޢުމަރު ވިދާޅުވިއެވެ.

މި ސަރުކާރުން ލާމަރުކަޒީ ނިޒާމުގެހަރުދަނާކުރުމަށް ޤާނޫނަށް އިޞްލާހުތައް ގެންނާނީ އެކަމަށް ބޭނުންވާ ދިރާސާތައް ކޮށްގެންކަމަށާއި، އޭގެ ދިރާސާތައްވެސް ނިމިފައިވާކަމަށްވެސް ވަޒީރު ވިދާޅުވިއެވެ. މިހާރު ޢަމަލުކުރަމުން އަންނަ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް މިހާތަނަށް ވަނީ 11 އިޞްލާހެއް ގެނެސްފައެވެ. މިއީ އެއް ޤާނޫނަކަށް އެންމެ ގިނަ އިޞްލާހު ގެނެވުނު ޤާނޫނުވެސްމެއެވެ.