ކުރިއަށް އޮތް ދެދުވަހުވެސް މޫސުން ގޯސްވާނެ، އެންމެ ގަދަވާނީ ދެކުނަށް: މެޓު

ކުރިއަށް އޮތް ދެދުވަހުވެސް ރާއްޖޭގެ މޫސުން ގޮސްވާނެކަމަށާއި، ވައިގަދަވެ ކަނޑުތައްވެސް ގަދަވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ. މި ވިއްސާރާގައި އެންމެ ބޮޑަށް ގަދަވާނީ ރާއްޖޭގެ ދެކުނުގެ އަތޮޅުތަކަށްވެސް މޫސުމާބެހޭ ޤައުމީ އިދާރާއިން ވިދާޅުވިއެވެ.

މިހާރު ރާއްޖޭގެ އެކި ސަރަހައްދުތަކަށް ކުރަމުންދާ ވިއްސާރާއާއި ގުޅޭގޮތުން މޫސުމާބެހޭ ޤައުމީ އިދާރާއިން ވިދާޅުވީ ކުރިއަށް އޮތް 24 ގަޑިއިރުވެސް ރާއްޖޭގެ ބޮޑުބަޔަކަށް ވިއްސާރަކުރާނެ ކަމަށެވެ.

އެއިދާރާއިން ވިދާޅުވީ މިހާރު ކުރަމުންދާ ވިއްސާރައަކީ ރާއްޖޭގެ ސަރަހައްދުގައި އުފެދިފައިވާ ބާރުގަދަ ކޮޅިގަނޑު ތޫފާނަކަށް ބަދަލުވުމާއި ގުޅިގެން ކުރަމުންދާ ވިއްސާރައެއް ކަމަށެވެ. އެގޮތުން މި ތޫފާނުގެ މިހާރު ދަތުރުކުރަމުންދަނީ އިންޑިއާގެ ޓަމިލްނާޑޫގެ އައްސާރިފަށާއި ދިމާލަށްކަމަށާއި، މިހާރު ކުރަމުންދާ ވިއްސާރައަކީ އެ ތޫފާނުގެ ނުސީދާ އަސަރުގެ ސަބަބުންކުރާ ވިއްސާރަކަމަށްވެސް އެ އިދާރާއިން ވިދާޅުވިއެވެ.

މޫސުމާބެހޭ ޤައުމީ އިދާރާއިން ވިދާޅުވީ ކުރިއަށް އޮތް ދެދުވަހުވެސް ދެކުނާއި މެދު ރާއްޖެތެރެއަށް ކަނޑު ގަދަވެ އާންމުކޮށް ވައި ގަދަވާނެ ކަމަށެވެ. އެގޮތުން އެވްރެޖުކޮށް މެދު ރާއްޖެތެރެއަށް 13 މޭލާއި 23 މޭލާއި ދެމެދު ވައިޖެހޭނެކަމަށާއި، ދެކުނުގެ އަތޮޅުތަކަށް 15 މޭލާއި 25 މޭލާއި ދެމެދު ވައިޖެހޭނެކަމަށް ލަފާކުރެވޭކަމަށް ވިދާޅުވިއެވެ. މިއާއެކު ކަނޑުތައް ގަދަވާނެކަމަށްވެސް އެއިދާރައިން ވިދާޅުވެއެވެ.

އެހެންކަމުން މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން އިލްތިމާސްކުރައްވައެވެ.