މެންޗެސްޓަރ ޔުނައިޓެޑްގެ މިހާރުގެ ކޯޗު، ރުބެން އަމޮރިމް އެ ޓީމުގެ ޑިފެންސް ވަރުގަދަކުރުމަށް އެންމެ އަވަހަށް ސޮއި ހޯދަން ބޭނުންވާ ކުޅުންތެރިއަކީ، ޕޯޗުގަލްގެ ބެންފީކާގެ ޑިފެންޑަރު، ތޮމާސް އަރައުހޯ ކަމަށް ފަހުގެ މީޑިއާ ރިޕޯޓްތައް ބުނެފިއެވެ.
އުމުރުން 22 އަހަރުގެ އަރައުހޯ އަކީ ބެންފީކާގެ ޔޫތު ޓީމުން ވިދާލި ކުޅުންތެރިއެކެވެ. ބެންފީކާގެ ބީ ޓީމަށް ކުޅުމަށްފަހު، ގިލް ވިސެންޓޭ އަށް ލޯން އުސޫލުން އެއްސީޒަން ކުޅެފައިވާ އަރައުހޯ އަކީ މިހާރު ގަވާއިދުން ބެންފީކާގެ ފުރަތަމަ އެގާރައިގައި ކުޅެމުންއަންނަ އެ ޓީމުގެ މުހިއްމު ކުޅުންތެރިއެކެވެ.
ޕޯޗުގަލްގެ ގައުމީ ޓީމަށް މިހާތަނަށް އެއްމެޗު ކުޅެދީފައިވާ އަރައުހޯގެ ކްލަބު ބެންފީކާ އާއެކު ހަދާފައިވާ އެއްބަސްވުން ހަމަވާން އަދި ބާކީ ހަތަރު އަހަރު އޮތްއިރު، އެންމެ ފަހުން ކޮންޓްރެކްޓް އައު ކޮށްފައިވަނީ މިދިޔަ އަހަރުގެ ޖުލައި މަހުއެވެ.
އެހެންކަމުން، އަރައުހޯގެ ސޮއި ހޯދުމަކީ ފަސޭހަކަމަކަށް ނުވާއިރު، ބެންފީކާ އިން ކުޑަ އަގެއްގައި ވެސް އޭނާ ދޫކޮށެއް ނުލާނެ އެވެ.
ބެލެވޭގޮތުގައި ކުރިއަށް އޮތް ޖަނަވަރީ މަހުގެ ޓްރާންސްފާ ބާޒާރުގައި ޔުނައިޓެޑުން އަރައުހޯ އަށް ބިޑް ކުރާނެ އެވެ. ޚުދު ޔުނައިޓެޑްގެ ކޯޗު، އަމޮރިމް ވެސް ކުރިއަށް އޮތް ޓްރާންސްފާ ބާޒާރުގައި އެ ޓީމަށް ގެންނަން އެންމެ ބޭނުންވާ ކުޅުންތެރިއަކީ އަރައުހޯ ކަމަށް މީޑިއާ ހަބަރުތައް ބުނެއެވެ.
މި ފަހަރުގެ ސީޒަނުގައި އަރައުހޯ ވަނީ ބެންފީކާގެ ޑިފެންސްގައި ވަރަށް މުހިންމު ދައުރެއް އަދާކޮށްފައެވެ. އަދި ކުރީގެ ސިޓީގެ ޑިފެންޑަރު ނިކޮލާސް އޮޓަމެންޑީއާއެކު ޑިފެންސްގައި ރަނގަޅު ޕާޓްނާޝިޕެއް ފެނިގެންގޮސްފައިވެއެވެ.
މިވަގުތަށް ބަލާއިރު ޑިފެންސްގެ ގިނަ ކުޅުންތެރިންތަކެއް އަނިޔާގައި ތިބި ޔުނައިޓެޑަށް އިތުރު ޑިފެންޑަރެއް ހޯދުމަކީ މުހިއްމު ކަމެއްގެ ގޮތުގައި އެ ކްލަބުން ދެކެއެވެ.
މީގެކުރީން، އިނގިރޭސި ކްލަބު ކްރިސްޓަލް ޕެލަސް އާއި ފްރާންސްގެ ޕީއެސްޖީން ވެސް އަރައުހޯ ގެންދަން މަސައްކަތްކޮށްފައިވާއިރު، ބެންފީކާ އިން ވަނީ އެ ހުށަހެޅުންތަކަށް ބީރު ކަންފަތެއް ދީފައެވެ.