އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް ހުއްޓާލިކަން ހިއްސާދާރުންނަށް އަންގައިފި
-
ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް އެސްޓީއޯގެ ބޯޑުން ވަނީ ނިންމާފައި
އެސްޓީއޯގެ ދަށަށް ފެނަކަ ކޯޕަރޭޝަން ބަދަލުކުރުމުގެ މަސައްކަތް ހުއްޓާލުމަށް މާލީ ވުޒާރާއިން އެންގުމާއި ގުޅިގެން އެމަސައްކަތް ހުއްޓާލާފައިވާކަމަށް އެސްޓީއޯއިން ވިދާޅުވެއްޖެއެވެ.
އެސްޓީއޯއިން ވިދާޅުވީ އެސްޓީއޯގެ ދަށުން ހިނގާ ކުންފުންޏަކަށް ނުވަތަ ސަބްސިޑަރީއަކަށް ބަދަލުކުރުމަށް ކުރަމުންދިޔަ މަސައްކަތް ހުއްޓާލުމަށް މާލީ ވުޒާރާއިން، މިމަހުގެ 24 ވަނަ ދުވަހު އެކުންފުންޏަށް އަންގަވާފައިވާކަމަށެވެ. އެގޮތުން އެސްޓީއޯއިން ހުށައެޅި، އެކުއިޒިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށްގެންގޮސްފައިވާ މިންވަރު ބެލުމަށްފަހު އެސްޓީއޯގެ ބޯޑުން ގޮތްތަކެއް ނިންމަވާފައިވާކަމަށް އެސްޓީއޯއިން ވިދާޅުވެއެވެ.
އެހެންކަމުން އެސްޓީއޯއިން ކުރަމުންދިޔަ މަސައްކަތުގެ ތެރެއިން، ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް އެސްޓީއޯގެ ބޯޑުން ބުރާސްފަތި ދުވަހު ނިންމާފައިވާތީ އެކަން ކުންފުނީގެ ހިއްސާދާރުންނަށް އަންގާކަމަށް އެސްޓީއޯއިން ވިދާޅުވެއެވެ.