އިންޑޮނީޝިޔާގެ އުތުރު ސުމާތުރާ ޕުރޮވިންސަށް ކުރަމުންދާ ވިއްސާރައާ ގުޅިގެން ހިނގި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި މަރުވި މީހުންގެ އަދަދު 27އަށް އުފުލިއްޖެއެވެ. ބިންގަނޑު ކެނޑި، ކިސަޑުތަކުގެ ދަށުވެގެން ގެއްލިފައިވާ ކަމަށް ބެލެވޭ ގިނަ އަދަދެއްގެ ބަޔަކު ހޯދުމުގެ މަސައްކަތް ކަމާގުޅޭ އިދާރާތަކުން ދަނީ ކުރަމުންނެވެ.
އެ މަސައްކަތުގެ ދަށުން، ކިސަޑުތަކުގެ ދަށުވި ބަހެއްގައި ތިބި ބަޔަކު ފެނިފައިވާ ކަމުގައި އުތުރު ސުމާތުރާ ޕުރޮވިންސުގެ ފުލުހުން ހާމަކުރިއެވެ. އެ ބަހުގެ ތެރޭގައި ތާށިވެފައި ތިބި މީހުން ސަލާމަތް ކުރުމަށް، ޓީމުތަކުން މިހާރު ދަނީ މަސައްކަތް ކުރަމުންނެވެ. ފާއިތުވި ހަފުތާއެއްހާ ދުވަހުގެ ތެރޭގައި މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން އުތުރު ސުމާތުރާގެ ހަތަރު ސަރަޙައްދެއްގައި ފެންބޮޑުވެ، ބިންގަނޑު ކެނޑި، ކިސަޑު ފޭބުމުގެ ހާދިސާތައް ހިނގާފައިވާ ކަމުގައި އެ ޤައުމުގެ ކާރިސާތަކާ ބެހޭ ޤައުމީ އިދާރާއިން ހާމަކުރިއެވެ.
އުތުރު ސުމާތުރާގެ ފުލުހުންގެ އިދާރާގެ ތަރުޖަމާނު ހާދީ ވަޙިޔޫދީ ވިދާޅުވީ، ދެލީ ސަރްދާންގގެ އަވަށެއްގައި ހިނގި ބިންގަނޑު ކެނޑުމުގެ ހާދިސާއެއްގައި ހަތް މީހުން މަރުވި ކަމުގައެވެ. އަދި، އިތުރު 20 މީހުން ޒަޚަމުވި ކަމުގައެވެ. އަދި، ގިނަ އަދަދެއްގެ ބަޔަކު ގެއްލިފައިވާ ކަމަށް ޤަބޫލު ކުރެވޭ ކަމަށާއި، އެ މީހުންގެ އަދަދު ކަށަވަރުކޮށް ހާމަކޮށްދޭން ނޭނގޭ ކަމުގައި ވެސް އޭނާ ވިދާޅުވިއެވެ.
މި ހާދިސާތަކުގައި ގެއްލުނު ކަމަށް ބެލެވޭ އިތުރު 20 މީހެއްގެ ހަށިގަނޑު އުތުރު ސުމާތުރާގެ އެހެން ސަރަޙައްދަކުން ފެނިފައިވާ ކަމުގައި ވެސް ފުލުހުން ބުންޏެވެ. އަދި، ގެއްލިފައިވާ އިތުރު ދެ މީހަކު ހޯދުމުގެ މަސައްކަތް ދަނީ ކުރަމުންނެވެ. "މިއަދު އަޅުގަނޑުމެން އަމާޒު ހިފާފައި މި ތިބީ ގެއްލިފައިވާ މީހުން ހޯދަން، އަދި ކިސަޑު ފޭބުމާ ގުޅިގެން ބަންދުވެފައިވާ މަގުތައް ސާފު ކުރަން،" ހާދީ ވިދާޅުވިއެވެ.
ފެންބޮޑުވުމާއި ކިސަޑު ފޭބުމުގެ ހާދިސާތަކުގައި ގެއްލުން ލިބިފައިވާ ސަރަޙައްދުތަކުގެ ތެރޭގައި ކާރޯއާއި، ޕަޑަންގ ލަވާސް، ތަޕަނުލީ ސްލާތާން އަދި ދޭލީ ސަރްދާންގ ހިމެނެއެވެ. ބިންގަނޑު ކެނޑިފައިވާ ސަރަޙައްދުތަކުގައި ޢާންމުންގެ ގެދޮރާއި މިސްކިތްތަކަށް ބޮޑެތި ގެއްލުންތަކެއް ލިބިފައިވާ ކަމުގައި އިންޑޮނީޝިޔާގެ ކާރިސާތަކާ ބެހޭ އިދާރާއިން ހާމަކުރިއެވެ. އަދި، ގޮވާން ދަނޑުތަކުގައި ފެންބޮޑުވެ، ބޮޑެތި ގެއްލުންތަކެއް ލިބިފައިވާ ކަމުގައި ވެސް އެ ޤައުމުގެ ކަމާގުޅޭ އިދާރާތަކުން ހާމަކުރިއެވެ.
މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން އުތުރު ސުމާތުރާގެ ސަރަޙައްދީ ވެރިރަށް، މެދާންގައި ބާއްވަން މަސައްކަތް ކުރަމުން ދިޔަ ސަރަޙައްދީ އިންތިޚާބަކަށް ވެސް ވަނީ ހުރަސް އެޅިފައެވެ. އިންޑޮނީޝިޔާގެ މޫސުމާ ބެހޭ އިދާރާއިން ބުނީ، މި އަހަރުގެ ފަހުކޮޅު އިންޑޮނީޝިޔާގެ ސަރަޙައްދުތަކަށް އިތުރަށް މޫސުން ގޯސްވާނެ ކަމަށް ލަފާކުރެވޭ ކަމުގައެވެ. އަދި، އެ ޤައުމުގެ އެކި ސަރަޙައްދުތަކަށް ބޯކޮށް ވާރޭވެހެމުން ދަނީ، މޫސުމަށް އަންނަ ޤުދުރަތީ ބަދަލެއް ކަމުގައިވާ ލަ ނީނިޔާއާ ގުޅިގެން ކަމަށް ބެލެވޭ ކަމުގައި ވެސް އެ އިދާރާއިން ހާމަކުރިއެވެ.
އިންޑޮނީޝިޔާއަކީ ވިއްސާރަ މޫސުމުގައި ބިންގަނޑު ކެނޑުމާއި ކިސަޑު ފޭބުމުގެ ނުރައްކާ ބޮޑު ޤައުމެކެވެ. މި ފަދަ ނުރައްކާތެރި ހާދިސާތައް އިތުރުވެފައި ވަނީ ޖަންގަލިތަކުން ގަސްކެނޑުން އިތުރުވުމާއި، ނުޤަވާޢިދުން މައިން ކުރުމުގެ މަސައްކަތް ކުރާ ސަރަޙައްދުތަކުގައި ކަމުގައި އެ ޤައުމުގެ ކަމާ ގުޅޭ އިދާރާތަކުން ހާމަކުރިއެވެ.