މެލޭޝިޔާގެ ސަރަޙައްދުތަކަށް ކުރަމުންދާ ވިއްސާރައިގައި ފެންބޮޑުވުމާ ގުޅިގެން 37,000އަށްވުރެ ގިނަ މީހުން ހާލުގައި ޖެހިއްޖެއެވެ. މި ކަމާ ގުޅޭ މަޢުލޫމާތު، އެ ޤައުމުގެ ޤާނޫނު ހަދާ މަޖިލީހާ ހިއްސާ ކުރައްވަމުން، ބޮޑުވަޒީރު އަންވަރު އިބްރާހީމް ވިދާޅުވީ، ހާލުގައި ޖެހިފައިވާ މީހުންނަށް ވަގުތީ ހިޔާވަހިކަން ފޯރުކޮށްދިނުމަށް މަސައްކަތް ކުރަމުންދާ ކަމުގައެވެ.
މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން މެލޭޝިޔާގެ ހަ ސްޓޭޓެއްގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ. އެ ސްޓޭޓްތަކުގެ ތެރޭގައި ހިމެނެނީ ކެލަންތަން، ތެރެންގާނޫ، ކެޑަހް، ޕަރްލިސް، ޖޮހޯ އަދި ޕޭރާކެވެ. އަންވަރު ވިދާޅުވީ، ފެންބޮޑުވުމާ ގުޅިގެން ގެދޮރަށް ފެންވަދެ، ގެއްލުން ލިބިފައިވާ ޢާއިލާތަކަށް ބޯހިޔާވަހިކަން ފޯރުކޮށްދިނުމަށް 322 ވަގުތީ ހިޔާ ހުޅުވައި، ބޭނުން ކުރަން ފަށާފައިވާ ކަމުގައެވެ.
ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ތައިލެންޑުގެ ސަރަޙައްދީ ރޮނގު ކައިރީގައި އޮންނަ ކެލަންތަންއަށެވެ. އެ ސްޓޭޓްގައި ދިރިއުޅޭ 9,223 ޢާއިލާއަކަށް ނިސްބަތްވާ 30,582 މީހަކު ހާލުގައި ޖެހިފައިވާ ކަމުގައި އަންވަރު ވިދާޅުވިއެވެ. އަދި، އެ މީހުންނަށް ބޭނުންވާ އެހީތެރިކަން ފޯރުކޮށްދޭން ކަމާ ގުޅޭ އިދާރާތަކުން މަސައްކަތް ކުރަމުންދާ ކަން އޭނާ ހާމަކުރެއްވިއެވެ.
ޢާންމު ގޮތެއްގައި މެލޭޝިޔާއަށް ވިއްސާރަ މޫސުން ކުރިމަތި ވަނީ އޮކްޓޫބަރު މަހުން ފެށިގެން މާރިޗު މަހާ ހަމައަށެވެ. އަދި، ވިއްސާރަ މޫސުމުގައި، މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން އެ ޤައުމުގެ އިރުމަތީ އައްސޭރިފަށުގެ ސަރަޙައްދުތަކުގައި ފެންބޮޑުވުމަކީ ޢާންމު ކަމެކެވެ. ފެންބޮޑުވުމާ ގުޅިގެން ކޮންމެ އަހަރަކު ވެސް ގިނަ އަދަދެއްގެ ބަޔެއްގެ ގެދޮރަށް ގެއްލުންވެ، ހާލުގައި ޖެހެއެވެ.
އެ ޤައުމުގެ މޫސުމާ ބެހޭ އިދާރާއިން ބުނީ ކުރިއަށް އޮތް ދުވަސްތަކުގައި ވެސް ކެލަންތަން، ޕަހަންގ އަދި ތެރެންގާނޫ ސްޓޭޓްގެ ސަރަޙައްދުތަކަށް ބޯކޮށް ވާރޭވެހޭނެ ކަމަށް ލަފާ ކުރެވޭ ކަމުގައެވެ. ފެންބޮޑުވުމާ ގުޅިގެން ހާލުގައި ޖެހިފައިވާ މީހުންނަށް ބޭނުންވާ އެހީތެރިކަން ފޯރުކޮށްދީ، ގެދޮރުގައި ތާށިވެފައިވާ މީހުން ރައްކާތެރި ހިސާބުތަކަށް ބަދަލު ކުރަން އެ ޤައުމުގެ ކާރިސާތަކާ ބެހޭ ޤައުމީ އިދާރާއިން ދަނީ މަސައްކަތް ކުރަމުންނެވެ.