ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް ހުއްޓައިލަން އެއްބަސްވެ، ޢުދުވާނީ ޙަމަލާތައް މެދުކަނޑައިލައިފިއެވެ. ލުބްނާނަށް ބޮންއެޅުން ހުއްޓައިލަން ޔަހޫދީން އެއްބަސްވެފައިވާ ކަން އިޢުލާނު ކުރައްވާފައި ވަނީ އެމެރިކާގެ ރައީސް ޖޯ ބައިޑަނެވެ. ލުބްނާން ޢުދުވާން ހުއްޓުވުމަށް އެއްބަސްވުމެއް ހުށަހަޅައި، އެ ކަމަށް ދެ ފަރާތުގެ ތާޢީދު ހޯދަން މަސައްކަތް ކޮށްފައި ވަނީ ޔަހޫދީންގެ އެންމެ ބޮޑު މަދަދުގާރު، އެމެރިކާއާއި ފަރަންސޭސިވިލާތް ގުޅިގެންނެވެ.
ލުބްނާންގެ މުޖާހިދުންގެ ޖަމާޢަތް، ޙިޒްބުاللهއާއި ޔަހޫދީ ފައުޖުގެ ނިރުބަވެރި ސިފައިންނާ ދެމެދު ޙަމަލާ ބަދަލު ކުރަން ފަށާފައި ވަނީ މީގެ 13 މަސް ކުރިން ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ލާއިންސާނީ ޢުދުވާނެއް ފެށުމާ ގުޅިގެންނެވެ. ޒަޔަނިސްޓު އިސްރާއީލުގެ ރަށްތަކާއި ޔަހޫދީ ފައުޖުގެ އަސްކަރީ މަރުކަޒުތަކަށް ޙިޒްބުاللهން ޙަމަލާ ދޭން ފަށާފައި ވަނީ ފަލަސްޠީނުގެ ރައްޔިތުންނާއި، އެ ޤައުމުގެ މިނިވަން ކަމަށް ޖިހާދު ކުރާ މުޖާހިދުންނަށް ވާގިވެރިވުމުގެ ގޮތުންނެވެ. އެ ޖަމާޢަތުގެ އަމާޒަކީ ޣައްޒާ ޢުދުވާން ހުއްޓުމަކަށް ގެނައުމަށް ޔަހޫދީންނަށް ބާރު އެޅުމެވެ.
ނަމަވެސް، ސެޕްޓެންބަރު 23ވަނަ ދުވަހު ޔަހޫދީ ފައުޖުން ވަނީ ލުބްނާންގެ ޢާންމުން ދިރިއުޅޭ ރަށްތަކަށް ބޮންއަޅަން ފަށާފައެވެ. އެންމެ ނުރައްކާތެރި ޙަމަލާތައް އަމާޒު ކުރަމުން ގޮސްފައި ވަނީ ވެރިރަށް ބައިރޫތާއި ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ސަރަޙައްދުތަކަށެވެ. އެއަށްފަހު، އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން، ބަރުހަތިޔާރާއި އަސްކަރީ ޓޭންކުފަހަރާ އެކު ލުބްނާންގެ ދެކުނުގެ ރަށްތަކަށް އަރައިގަނެ، ޤަތުލުޢާންމު އިތުރަށް ފުޅާކުރިއެވެ.
ލުބްނާންގެ މުސްލިމުންނާ ދެކޮޅަށް ޔަހޫދީ ފައުޖުން ދެމުންދިޔަ ޢުދުވާނީ ޙަމަލާތައް މެދުކަނޑައިލުމާ އެކު، ޢުދުވާނާ ގުޅިގެން އަމިއްލަ ވަޒަން ދޫކޮށް ރައްކާތެރި ހިސާބުތަކަށް ބަދަލުވި އެތަކެއް ސަތޭކަ ބަޔަކު ވަނީ އެނބުރި ގެދޮރަށް ދިޔުމަށް ދަތުރު ފަށާފައެވެ. ޢުދުވާން ހުއްޓުމަކަށް ގެނައުމަށް ޔަހޫދީން އެއްބަސްވެފައިވާ ކަން އިޢުލާނު ކުރައްވަމުން ބައިޑަން ވިދާޅުވީ ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއާއި ލުބްނާންގެ ބޮޑުވަޒީރު ނަޖީބު މީޤާތީއާ މަޝްވަރާ ކުރައްވާފައިވާނެ ކަމުގައެވެ.
"މިއީ، ދެމެހެއްޓެނިވި ގޮތެއްގައި ޙަމަލާ ބަދަލު ކުރުން މެދުކަނޑައިލުމަށް ފަރުމާ ކޮށްފައިވާ އެއްބަސްވުމެއް. ޙިޒްބުاللهއާއި [ލުބްނާންގައި ހަރަކާތްތެރިވާ އެހެން] ނިރުބަވެރި ޖަމާޢަތްތަކަށް ދެން އިސްރާއީލަށް ނުރައްކަލެއް ނުފޯރުވޭނެ،" ބައިޑަން ވިދާޅުވިއެވެ. ނިރުބަވެރިންގެ ގޮތުގައި އޭނާ ސިފަ ކުރައްވާފައި އެ ވަނީ ލުބްނާންގައި ހަރަކާތްތެރިވާ މުޖާހިދުންގެ ޖަމާޢަތްތަކަށެވެ.
ޢުދުވާންތައް ހުއްޓައިލުމުގެ އެއްބަސްވުމުގެ ދަށުން، ލުބްނާންގެ ރަށްތަކަށް އަރައިގަނެފައިވާ ޔަހޫދީ ފައުޖުގެ ނިރުބަވެރި ސިފައިން 60 ދުވަހުގެ މުހުލަތެއްގެ ތެރޭގައި އެ ބިންތަކުން ފައިބަން ޖެހޭނެއެވެ. އަދި، ލުބްނާންގެ ދެކުނުގެ ސަރަޙައްދުތަކުގައި އަމަން ބެލެހެއްޓުމުގެ މަސައްކަތާ އެ ޤައުމުގެ އަސްކަރިއްޔާއިން ޙަވާލުވާނެއެވެ. ބައިޑަން ވިދާޅުވީ، ޙިޒްބުاللهން އަސްކަރީ ވަސީލަތްތައް އަލުން ބިނާކޮށް އާރާސްތު ކުރުމުގެ ފުރުޞަތު ނުދެއްވާނެ ކަމުގައެވެ. "ސަރަޙައްދީ ރޮނގުގެ ދެ ފަރާތުގައި ދިރިއުޅުނު ރައްޔިތުންނަށް އެނބުރި ގެދޮރަށް ދެވޭނެ،" އޭނާ ވިދާޅުވިއެވެ.
އެމެރިކާއިން ހުށަހަޅާފައިވާ އެއްބަސްވުމަށް ޙިޒްބުاللهން ރުހުން ދީފައިވާ ކަން ކުރިން ރިޕޯޓު ކޮށްފައިވެއެވެ. ނަމަވެސް، ޢުދުވާން ހުއްޓައިލުމާ ގުޅިގެން ޙިޒްބުاللهން ރަސްމީ ހައިސިއްޔަތެއްގައި އެއްޗެއް ހާމަކޮށްފައެއް ނެތެވެ. އެ ޖަމާޢަތުގެ އިސް އޮފިޝަލެއް ކަމުގައިވާ ޙަސަން ފަޟްލިالله ވިދާޅުވީ، މި ހަނގުރާމައަށް ފަހު އެ ޖަމާޢަތުން ކުރިއަށްވުރެ ބާރާއެކު އެނބުރި އަންނާނެ ކަމުގައެވެ.
"ޔަހޫދީންނާ ދެކޮޅު ހަރަކާތާ އެތަކެއް ހާސް ބަޔަކު ގުޅޭނެ… ޔަހޫދީންގެ ބޭނުމަކަށްވީ ރެސިސްޓެންސްގެ އަސްކަރީ ބާރުވެރިކަން ނައްތައިލުން، ނަމަވެސް އެ ކަން ހާސިލެއް ނުވި،" އޭނާ ވިދާޅުވިއެވެ. ޙިޒްބުاللهއަކީ އީރާނުން ވާގިވެރިވާ އެކްސިސް އޮފް ރެސިސްޓެންސްގައި ހިމެނޭ ޖަމާޢަތެކެވެ. ލުބްނާން ޢުދުވާން ހުއްޓައިލުމަށް ވެފައިވާ އެއްބަސްވުމަށް އީރާނުން ވެސް ވަނީ ތާޢީދުކޮށް، މަރުޙަބާ ކިޔާފައެވެ.
ލުބްނާންގެ ބޮޑުވަޒީރު މީޤާތީ ވެސް ވަނީ ޢުދުވާން ހުއްޓައިލަން އެއްބަސްވުމުން އެ ކަމަށް މަރުޙަބާ ދަންނަވާފައެވެ. ލުބްނާންގެ ޚާރިޖީ ވަޒީރު ޢަބްދުالله ބޫ ޙަބީބް ވިދާޅުވީ، އެ ޤައުމުގެ ދެކުނުގައިވާ ބިންތަކުން ޔަހޫދީ ފައުޖުގެ ނިރުބަވެރި ސިފައިން ފައިބަން ފެށުމުން، އެ ސަރަޙައްދުގެ އަމަން ބެލެހެއްޓުމަށް 5,000އަށްވުރެ ގިނަ ސިފައިން ފޮނުވަން ތައްޔާރުވަމުންދާ ކަމުގައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުން ދިޔަ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,823އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 15,859އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.