ޓޮޓްނަމް ހޮޓްސްޕަރ އަށް ކުޅެމުން އަންނަ އިޓަލީ ގޯލްކީޕަރު ގުލިއެލްމޯ ވިކާރިއޯ ފައިގެ ކުޑަހުޅުގެ އޮޕަރޭޝަނެއް ކޮށްފައިވާ ކަމަށް އެ ކުލަބުން ބުނެފިއެވެ.
އުމުރުން 28 އަހަރުގެ ވިކާރިއޯ އަށް އަނިޔާވީ، ޕްރިމިއަރ ލީގުގައި މި ހަފްތާގެ ހޮނިހިރު ދުވަހު ރަށުން ބޭރުގައި މެންޗެސްޓަރ ސިޓީ އަތުން 4-0 އިން މޮޅުވި މެޗުގައެވެ. އެކަމަކު، އޭނާ ވަނީ އެ މެޗުގެ 90 މިނެޓު އެއްކޮށް ފުރިހަމަކޮށްފައެވެ.
"ގުލިއެލްމޯ ވިކާރިއޯ މިއަދު ވަނީ ކަނާތު ފައިގެ ކުޑަހުޅަށް ލިބިފައިވާ އަނިޔާއިން ރަނގަޅުވުމަށް އޮޕަރޭޝަނެއް ހަދާފައިކަން ކަށަވަރުކޮށްދެން،" ޓޮޓްނަމް އިން އެކްސްގައި ކުރި ޕޯސްޓްގައިވެއެވެ.
ޓޮޓްނަމުން ބުނީ، ވިކާރިއޯ އަލުން ފަރިތަކުރުންތަކަށް ނިކުމެވޭނީ ކިހާ ދުވަހަކުން ކަން އެ ކްލަބުގެ މެޑިކަލް ޓީމުން ދެނެގަތުމަށް މަސައްކަތްކުރާނެ ކަމަށާއި، ހުރިހާ އެންމެން ވެސް ތިބީ އޭނާ އާއެކުގައި ކަމަށެވެ.
މި ފަހަރުގެ ސީޒަނުގެ ޕްރިމިއަރ ލީގުގައި ރަނގަޅަށް ނުފެށުނު ޓޮޓްނަމުން މިވަގުތު އޮތީ ތާވަލްގެ ހަވަނައިގައެވެ. އެ ޓީމަށް މިހާތަނަށް ކުޅުނު 12 މެޗުން ލިބިފައިވަނީ 19 ޕޮއިންޓެވެ.
ލީގުގައި ޓޮޓްނަމަށް ދެން އެންމެ އަވަހަށް އޮތީ އަންނަ މަހުގެ އެއްވަނަ ދުވަހު އަމިއްލަ ދަނޑުގައި ފުލަމްއާ ދެކޮޅަށް ކުޅޭ ލަންޑަން ޑާބީ އެވެ. އޭގެކުރީން، ޔުއެފާ ޔުރޮޕާ ލީގުގައި އެ ޓީމަށް އޮތީ މި ހަފްތާގެ ބުރާސްފަތި ދުވަހުގެ ރޭ އަމިއްލަ ދަނޑުގައި އިޓަލީގެ އޭއެސް ރޯމާއާ ދެކޮޅަށް ކުޅެން ޖެހޭ މެޗެވެ.