ހިޔާވަހި ސްކީމަށް އެދުމުގެ ފުރުސަތު ހަމަވާތާ ތިން މަސް ތެރޭގައި ލޯނު ދޫކުރެވޭނެ: ވަޒީރު ޑރ.ހައިދަރު

ގެދޮރު އެޅުމަށް ދަތިވެފައިވާ މީހުންނަށް ޚާއްސަކޮށްގެން ސަރުކާރުން އިފްތިތާހުކުރި "ހިޔާވެހި ފައިނޭންސިން" ސްކީމަށް ކުރިމަތިލުމުގެ ފުރުޞަތު ހަމަވާތާ ތިން މަސް ދުވަހުގެ ތެރޭގައި ލޯނު ދޫކުރުމުގެ މަސައްކަތް ފައްޓަވާނެކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

ގެދޮރު އެޅުމަށް ދަތިވެފައިވާ މީހުންނަށް ޚާއްސަކޮށްގެން ސަރުކާރުން އިފްތިތާހުކުރި "ހިޔާވެހި ފައިނޭންސިން" ސްކީމަށް ކުރިމަތިލުމަށް ފުރުޞަތު ހުޅުވާލީ މި މަހުގެ 8 ވަނަ ދުވަހުއެވެ. މި ފެސިލިޓީތަކަށް އެޕްލިކޭޝަން ހުޅުވާލާފައިވަނީ ހިޔާވެހި ޕޯޓަލް (www.hiyaavehi.housing.gov.mv) މެދުވެރިކޮށެވެ.

ހިޔާވަހި ސްކީމަށް އެދި ހުށައެޅުމަށް 6 މަސް ދުވަހުގެ މުއްދަތެއް ސަރުކާރުން ވަނީ ދެއްވާފައެވެ. އެގޮތުން ސްކީމަށް އެދުމުގެ ފުރުސަތު 08 އޭޕްރީލް 2025 ވާ އަންގާރަ ދުވަހުގެ ރޭ 23:59 އާއި ހަމައަށް ވަނީ ހުޅުވާލާފައެވެ.

ޕީއެސްއެމް ނިއުސް އިން ގެނެސްދޭ "ހަފްތާ 52" ޕްރޮގްރާމްގައި ހިޔާވެހި ސްކީމުގެ މައުލޫމާތު ހިއްސާ ކުރައްވަމުން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވީ ރާއްޖޭގައި ބޯހިޔާވަހިކަމެއް ލިބިފައިނުވާ އެންމެނަށް އެކަށީގެންވާ ބޯހިޔާވަހިކަމެއް ހޯދައިދިނުމަކީ ރައީސުލްޖުމްހޫރިއްޔާގެ އެންމެ އިސް އެއް ވަޢުދުފުޅުކަމަށެވެ.

ވަޒީރު ވިދާޅުވީ ހިޔާވެހި ސްކީމުގެ އިވެލުއޭޝަން ފަށާނީ އެޕްލިކޭޝަން ފޯމްތައް ލިބޭ ހިސާބުން ފެށިގެން ކަމަށެވެ.

"އިރާދުކުރެއްވިއްޔާ ތިން މަސް ދުވަހުގެ ތެރޭގައި އަޅުގަނޑުމެން ފުރަތަމަ ބުރުގެ ލޯނުތައް ދޫކުރުމުގެ މަސައްކަތް ފަށާނަން، އެއީ މޯލްޑިވްސް އިސްލާމިކް ބޭންކާއި ބޭންކް އޮފް މޯލްޑިވްސްއާއި ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން ހިމެނޭގޮތަށް އަޅުގަނޑުމެން މި މަސައްކަތްތައް ކުރަމުންދާނީ. އެއީ އަޅުގަނޑުމެން މި ސްކީމް ރާވާފައި އޮތް ގޮތަކީ. ލޯނު ސްކީމަކީ މުޅި ރާއްޖެއަށް ހުޅުވާލާފައި އޮތް ފުރުސަތެއް" ވަޒީރު ޑރ.ހައިދަރު ވިދާޅުވިއެވެ.

މުޅި ރާއްޖޭގެ އެކި ސަރަޙައްދުތަކަށް އަމާޒުކޮށް ހުޅުވާލި މި ސްކީމަކީ އިސްލާމިކް ޝަރީޢާގެ އުސޫލުތަކާ އެއްގޮތަށް އެންމެ އަގު ހެޔޮކޮށް ފޯރުކޮށްދޭ ފައިނޭންސިންއެވެ. މި ސްކީމަކީ ރާއްޖޭގެ 3 ބޭންކަކާ ގުޅިގެން އިސްލާމީ އުސޫލުން %5 ފައިދާގައި ކުރިއަށްގެންދާ ފައިނޭންސިން ސްކީމެކެވެ.

ހިޔާވެހި ފައިނޭންސްގެ ދަށުން ލޯން ދޫކުރަނީ 3 ސްކީމަކަށެވެ. މީގެ ތެރެއިން ފުރަތަމަ ސްކީމަކީ އަތޮޅުތަކުގެ ރަށްރަށަށް ޚާއްޞަ ގެދޮރު ޢިމާރާތްކުރުމުގެ ލޯނު ސްކީމެވެ. ހައުސިން ޑިވެލޮޕްމަންޓް ފައިނޭންސް ކޯޕަރޭޝަން މެދުވެރިކޮށް މި ސްކީމުން ލޯން ދޫކުރުމަށް ހަމަޖެހިފައިވަނީ 1 މިލިޔަން ރުފިޔާއާއި ހަމައަށެވެ. މި ސްކީމްގެ ދަށުން އެއްވެސް އިކުއިޓީއެއް ދައްކާކަށް ނުޖެހޭނެއެވެ.

ދެވަނަ ސްކީމަކީ ސަރުކާރުން އާބަން ސެންޓަރުތަކުގެ ގޮތުގައި ކަނޑައަޅާ ރަށްރަށަށް ޚާއްޞަ ސްކީމެކެވެ. މި ސްކީމްގެ ދަށުން 3 މިލިޔަން ރުފިޔާއާއި ހަމައަށް ލޯނު ދޫކުރާނެއެވެ.

ތިންވަނަ ސްކީމު ޚާއްޞަކޮށްފައިވަނީ ފުރަމާލެއަށް 6 މިލިޔަން ރުފިޔާއާއި ހަމައަށް ލޯން ދޫކުރާ ގޮތަށެވެ. މި ސްކީމް އަމާޒުކޮށްފައިވަނީ ގެދޮރު ނުހެދިފައިވާ ހުރިހާ ފަރާތްތަކަށާއި، ހަދަން ފަށައި ނުނިމިހުރި ޢިމާރާތްތައް ނިންމުމުގެ އިތުރުން މާލޭގައި ހިމެނޭ ކުދި ބިންތައް އެއްކޮށްލައިގެން ޢިމާރަތްކުރުމުގެ ފުރުޞަތު ފަހިވާގޮތަށެވެ. މާލެ ސަރަޙައްދަށް ހުލުވާލި ފުރުޞަތުގައި، ގޭގެ ބެހެނިވެރިންނާއެކު އެކުވެގެން ހަ މިލިޔަން ރުފިޔާއިން ފެށިގެން 10 މިލިޔަން ރުފިޔާއާ ދެމެދު ފައިނޭންސަށް އެދެވޭގޮތަށް އުސޫލު ވަނީ އެކުލަވާލާފައެވެ.

ހިޔާވެހި ފައިނޭންސިން ސްކީމްގެ ދަށުން މާލީ އެހީ ފޯރުކޮށްދޭން އަންނަ އަހަރުގެ ބަޖެޓުގައި 1 ބިލިއަން ރުފިޔާ ވަނީ ކަނޑައަޅާފައެވެ. 1 ބިލިޔަން ރުފިޔާ ސަރުކާރުން ބޭންކުތަކުން މި ސްކީމަށް އިންވެސްޓްކުރިނަމަވެސް، ބޭންކުތަކުން ލޯނު ދޫކުރާއިރު ޖުމްލަ 2 ބިލިޔަން ރުފިޔާއާ ހަމައަށް ފައިނޭންސް ދޭނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. މި ފައިނޭންސް ހަމަޖައްސައިދޭނީ 25 އަހަރުން އަނބުރާ ދައްކާގޮތަށެވެ.

ސަރުކާރުގެ މެނިފެސްޓޯއާއި އެއްގޮތަށް، 2028 ވަނަ އަހަރު ނިމޭއިރު، ބޯހިޔާވަހިކަމުގެ މަޝްރޫޢަކުން ފުރުޞަތު ނުލިބޭނެ އެއްވެސް ރައްޔިތަކު ނުހުންނާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައެވެ. ހިޔާވެހި ސްކީމަކީ މުޅި ރާއްޖެއަށް ހުޅުވާލައިގެން މިހާތަނަށް ކުރިއަށްގެންދާ އެންމެ އަގުހެޔޮ، އަދި އެންމެ ބޮޑު ފައިނޭންސް ސްކީމެވެ.