މޮނިއުމެންޓް މުބާރާތުގެ ޑިޒައިންތައް އަލުން ބަލަން އެޗްޑީސީން ނިންމައިފި

ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ބޭއްވި މޮނިއުމެންޓް މުބާރާތުގެ ޑިޒައިންތައް އަލުން ބަލަން ނިންމައިފިއެވެ. އެޗްޑީސީން މިގޮތަށް ނިންމީ މޮނިއުމެންޓް ޑިޒައިން މުބާރާތުގެ އެއްވަނައަށް ދިޔަ ޑިޒައިނާ ގުޅިގެން އެ ކުންފުންޏަށް ލިބިފައިވާ ޝަކުވާތަކަށް ބެލުމަށްފަހުއެވެ.

ހުޅުމާލޭގެ 17 ސަރަހައްދެއްގައި ބަހައްޓާ މޮނިއުމެންޓްތަކުގެ ޑިޒައިން ހެދުމަށް މިދިޔަ ސެޕްޓެމްބަރު މަހުގެ އެޗްޑީސީން ހުޅުވާލިއިރު އެ މުބާރާތުގެ ތީމަކީ "ދިވެހިންގެ ރާއްޖެ"އެވެ. މުބާރާތުގައި އެންމެ ފުރިހަމަ ޑިޒައިނެއް ހުށަހަޅާ މީހަކަށް 100،000ރ. ގެ ފައިސާގެ އިނާމެއްވެސް އެޗްޑީސީން ހުށަހެޅިއެވެ.

އެޗްޑީސީން ނެރުނު ބަޔާނެއްގައި ވިދާޅުވީ މުއްދަތު ހަމަވިއިރު، ޖުމްލަ 7 ފަރާތަކުން ޑިޒައިން ހުށަހަޅާފައިވާއިރު އެ ހުށަހެޅުންތަކުގެ ތެރެއިން ވަނަ ހޮވާފައި ވަނީ އެކަމަށް ކަނޑައެޅި ޕްރޮފެޝަނަލް ސްޓާފުންގެ ޖަޖުންގެ ޕެނަލަކުން ހުށަހެޅުންތައް އިވެލުއޭޓް ކުރުމަށްފަހު ކަމަށެވެ.

ނަމަވެސް މުބާރާތުގެ އެއްވަނައަށް ދިޔަ މޮނިއުމެންޓް ޑިޒައިންތަކަކީ އޭއައި ޖެނެރޭޓެޑް ޑިޒައިންތަކެއް ކަމަށް ބުނެ އާންމުން އެކޯޕަރޭޝަނަށް ހުށަހެޅި ޝަކުވާތަކަށް ބަލާ، ވަނަ ލިބުނު ޑިޒައިންތައް ރިވިއު ކުރުމުގެ މަސައްކަތް ކުރަމުންދާ ކަމަށް އެޗްޑީސީން ވިދާޅުވިއެވެ.

އެޗްޑީސީން ވިދާޅުވީ އެމުބާރާތުގެ މަގްސަދަކީ ހުޅުމާލޭގެ ތަރައްގީއަށް އެކޯޕަރޭޝަނުން ކުރަމުންދާ މަސައްކަތުގައި ދިވެހި ފަންނުވެރިންގެ ޚިޔާލާއި ވިސްނުން ހިމެނުން ކަމަށެވެ.

އެފަދަ މުބާރާތްތަކުގައި ދިވެހި ފަންނުވެރިންނަށް ފުރުސަތު ނުލިބޭ ގޮތަށް އެކޯޕަރޭޝަނުން އަމަލު ނުކުރާނެ ކަމަށާއި އަދި ރައްޔިތުންނާ ގުޅޭ އެފަދަ ކަންކަމުގައި ރައްޔިތުންގެ ޚިޔާލާއި މަޝްވަރާއަށް އަބަދުވެސް މަރުހަބާ ކިޔާ ކަމަށް އެޗްޑީސީން ފާހަގަކުރެއްވިއެވެ.

ކުންފުނީގެ ހުރިހާ މަސައްކަތަކީވެސް ދެ ފުށް ފެންނަ ގޮތަށް ކުރިއަށް ގެންދާ މަސައްކަތްތަކަކަށް ހެދުމަކީ އަމާޒެއްކަމަށް އެޗްޑީސީން ވިދާޅުވެއެވެ.