ޕާކިސްތާނުގެ ހުޅަނގު އުތުރު ޚައިބަރް ޕަޚްތުންޚާ ޕުރޮވިންސުގައި ދީނީ މަޒުހަބުތަކުގެ މެދުގައި ހިންގަމުންދާ ހަމަނުޖެހުންތައް ހުއްޓައިލަން އެއްބަސްވެއްޖެއެވެ. އެ ޕުރޮވިންސުގައި ލޭއޮހޮރުވުން ބޮޑު ހަމަނުޖެހުންތަކެއް ފެށުނީ، ފަރުބަދަމަތީ ރަށެއް ކަމުގައިވާ ޕަރާޗަނާރުގައި ދަތުރު ކުރަމުން ދިޔަ ބަހަކަށް ހަތިޔާރު އެޅި ގުރޫޕަކުން ޙަމަލާދީ 40 މީހުން މަރައިލުމާ ގުޅިގެންނެވެ. އެ ބަހުގައި ތިބީ ޝިޔަޢީ މަޒުހަބުގެ މުސްލިމުންނެވެ.
އެއީ، ސުންނީ މަޒުހަބަށް ނިސްބަތްވާ ގުރޫޕަކުން ދީފައިވާ ޙަމަލާތަކެއްގެ ގޮތުގައި ބަލައި، ޝިޔަޢީން ވަނީ ގިނަ އަދަދެއްގެ ސުންނީ މުސްލިމުން ދިރިއުޅޭ ކުރަމް ސަރަޙައްދުގައި ހަމަނުޖެހުން ހިންގަން ފަށާފައެވެ. ބަދަލު ހިފުމުގެ ގޮތުން ދީފައިވާ ޙަމަލާތަކުގައި އިތުރު 30 މީހުން ވަނީ މަރުވެފައެވެ. ޕާކިސްތާނުގެ ސަރުކާރުން ބުނީ، ހަމަނުޖެހުންތައް ހިންގަމުންދާ ދެ މަޒުހަބުގެ ދެމެދުގައި އެއްބަސްވުމެއް އެކުލަވައިލާފައިވާ ކަމަށާއި، އެ އެއްބަސްވުމުގެ ދަށުން ހަތް ދުވަހުގެ މުއްދަތަކަށް ޙަމަލާ ބަދަލު ކުރުން މެދުކަނޑައިލަން ނިންމާފައިވާ ކަމުގައެވެ.
ޚައިބަރް ޕަޚްތުންޚާއަކީ އަފްޣާނިސްތާންގެ ސަރަޙައްދީ ރޮނގު ކައިރީގައި އޮންނަ ޕުރޮވިންސެކެވެ. އެ ޕުރޮވިންސުގެ ރަށެއް ކަމުގައިވާ ކުރަމްގައި ދިރިއުޅޭ ދެ މަޒުހަބުގެ ރައްޔިތުންގެ މެދުގައި ޚިޔާލުތަފާތުވުންތައް އުފެދިފައި ވަނީ ބިމުގެ މިލްކުވެރިކަމާ ގުޅޭ މައްސަލައެއްގައެވެ.
ޚައިބަރް ޕަޚްތުންޚާގެ ސަރުކާރުގެ އިސް އޮފިޝަލެއް ކަމުގައިވާ މުޙައްމަދު ޢަލީ ސަޔިފް ވިދާޅުވީ، ދެ މަޒުހަބުގެ ދެމެދުގައި ހިންގަމުންދާ ހަމަނުޖެހުންތައް ހުއްޓައިލުމަށް ބޭއްވި މަޝްވަރާތަކުގައި ކާމިޔާބީތަކެއް ހޯދިފައިވާ ކަމުގައެވެ. އަދި، ހަތް ދުވަހުގެ މުއްދަތަކަށް ޙަމަލާ ބަދަލު ކުރުން ހުއްޓައިލަން ދެ ފަރާތުން އެއްބަސްވެފައިވާ ކަމުގައެވެ. "ދެ ފަރާތުން ރަހީނު ކޮށްފައިވާ އަސީރުން މިނިވަން ކުރުމުގެ އިތުރުން މަރުވެފައިވާ މީހުންގެ ހަށިތައް ވެސް ބަދަލު ކުރާނެ،" އޭނާ ވިދާޅުވިއެވެ.
ޚައިބަރް ޕަޚްތުންޚާގެ ފުލުހުންގެ ވެރިޔާ އަޚްތަރް ޙަޔާތު ޣައްދާޕޫރު ވިދާޅުވީ، ޕަރާޗަނާރުގައި ދިން ބަޑީގެ ޙަމަލާތަކުގެ ފަހަތުގައިވާ ބަޔަކު ހޯދައި، އެ މީހުން ހައްޔަރު ކުރުމަށް ޝިޔަޢީން ބާރުއަޅަމުންދާ ކަމުގައެވެ. ނަމަވެސް، އެ ޙަމަލާގެ ފަހަތުގައި ވަނީ ކޮން ގުރޫޕަކުން ދަން ދެނެގަނެވިފައި ނުވާ ކަމުގައި އޭނާ ވިދާޅުވިއެވެ. އެ ސަރަޙައްދުގައި ހަރަކާތްތެރިވާ ހަތިޔާރު އެޅި އެއްވެސް ޖަމާޢަތަކުން ޙަމަލާތަކުގެ ޒިންމާ އުފުލާފައެއް ވެސް ނެތެވެ.
ޚައިބަރް ޕަޚްތުންޚާގެ ޝަރުޢީ ދާއިރާގެ ވަޒީރު އަފްތާބް ޢަލަމް އަފްރީދީ ވިދާޅުވީ، ގުރޫޕުތަކުގެ މެދުގައި ޙަމަލާ ބަދަލު ކުރުން މެދުކަނޑައިލުމަކީ ލިބިފައިވާ ބޮޑު ކުރިއެރުމެއް ކަމުގައެވެ. އަދި، ޚިޔާލުތަފާތުވުން އުފެދިފައިވާ މައްސަލަތައް ޙައްލު ކުރުމުގެ ފުރުޞަތު ފަހިވެގެން ގޮސްފައިވާ ކަމުގައެވެ.
ޚައިބަރް ޕަޚްތުންޚާގައި ހަރަކާތްތެރިވާ ހަތިޔާރު އެޅި ގުރޫޕުތަކުން ދޭ މި ފަދަ ޙަމަލާތައް ފަހަކަށް އައިސް އިތުރު ކޮށްފައިވާ ކަން ފާހަގަކުރެވެއެވެ. މި ގޮތުން، ހުސްވި މަހު ކުރަމްގައި ދީފައިވާ ޙަމަލާތަކެއްގައި 16 މީހުން މަރުވިއެވެ. އޭގެ ތެރޭގައި ތިން އަންހެނުންނާއި ދެ ކުޑަކުދިން ހިމެނެއެވެ.
އިންސާނީ ޙައްޤުތަކާ ބެހޭ ޕާކިސްތާނުގެ ކޮމިޝަނުން ބުނީ، ޖުލައި މަހާއި އޮކްޓޫބަރު މަހާ ދެމެދު އެ ސަރަޙައްދުގައި ހިންގާފައިވާ ހަމަނުޖެހުންތަކުގައި 79 މީހުން މަރުވެފައިވާ ކަމުގައެވެ. ޖުލައިން ސެޕްޓެންބަރާ ދެމެދު ހިންގަމުން ގޮސްފައިވާ ހަމަނުޖެހުންތައް މެދުކަނޑައިލާފައި ވަނީ ދެ ގުރޫޕުގެ ދެމެދުގައި ވެވުނު އެއްބަސްވުމެއްގެ ދަށުންނެވެ.