ގެދޮރުވެރިޔާ ސްކީމްގެ 4000 ފްލެޓުގެ މަސައްކަތް އަންނަ އަހަރުގެ ޖުލައިމަހަށް ނިންމަނީ

ހުޅުމާލޭގައި ތަރައްޤީކުރަމުންދާ 4000 ފްލެޓުގެ މަސައްކަތް އަންނަ އަހަރުގެ ޖުލައިމަހުގެ ތެރޭގައި ނިމޭނެކަމަށް ފަހި ދިރިއުޅުން ކޯޕަރޭޝަން، އެފްޑީސީން ވިދާޅުވެއްޖެއެވެ.

ހުޅުމާލޭގެ ދެވަނަ ފިޔަވަހީގައި އެފްޑީސީން ދަނީ 32 ޓަވަރު އެޅުމުގެ މަސައްކަތް ކުރަމުންނެވެ. މި ޓަވަރުތަކުން 4000 އެޕާޓްމެންޓް ދިނުމަށް ހަމަޖެހިފައިވެއެވެ. މި އެޕާޓްމެންޓްތައް ދިނުމަށް ހަމަޖެހިފައިވަނީ މިދިޔަ ސަރުކާރުން ކުރިއަށްގެންދިޔަ "ގެދޮރުވެރިޔާ" ސްކީމްގެ ދަށުން ޝަރުތުހަމަވެ، އެންމެ މަތިން މާކްސް ލިބުނު 4000 މީހަކަށެވެ.

ޕީއެސްއެމް ނިއުސްއަށް މަޢުލޫމާތު ދެއްވުމަށް އެފްޑީސީން ވިދާޅުވީ 4000 ފްލެޓުގެ މަސައްކަތް ނިމޭނެކަމަށް މިހާރު ލަފާކުރެވޭނީ އަންނަ އަހަރުގެ ޖުލައިމަހުގެ ތެރޭގައި ކަމަށެވެ. އަދި މަސައްކަތް އަވަސްކުރުމަށް ކުރަންޖެހޭ މަސައްކަތްތައް ތަވާލު މުރާޖަޢާކުރަމުން އަންނަކަމަށާއި މަސައްކަތުގެ ބޮޑު ބައެއް މިހާރު ނިމިފައިވާކަމަށްވެސް އެފްޑީސީން ވިދާޅުވިއެވެ.

އެފްޑީސީގެ 4000 ފްލެޓު އެޅުމުގެ މަސައްކަތް ކުރަމުން އަންނަނީ އިންޑިއާގެ ކުންފުންޏެއްކަމަށްވާ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް، ކޭޕީއައިއެލްއާއި ނެޝަނަލް ބިލްޑިންގްސް ކޮންސްޓްރަކްޝަން ކޯޕޮރޭޝަން، އެންބީސީސީންނެވެ. އެ ކުންފުންޏާ މަސައްކަތް ހަވާލުކޮށްފައިވަނީ 2021 ވަނަ އަހަރުއެވެ. އެގޮތުން ކޭޕީއައިއެލްއިން ތަރައްޤީކުރަމުންދާ 16 ޓަވަރަށް "އަމާން އުދަރެސް" އަދި އެންބީސީސީން ތަރައްގީކުރަމުންދާ 16 ޓަވަރަށް ދީފައިވާ ނަމަކީ "އަމާން ދޯދި"އެވެ.

މި ފްލެޓުތައް ތަރައްޤީކުރަނީ 3 ކޮޓަރިއާއި 2 ކޮޓަރީގެ އެޕާޓްމެންޓްތައް ހިމެނޭ ގޮތުންނެވެ. އަދި ޓަވަރުތަކުގެ ތިރީ ދެ ފަންގިފިލާގައި ކޮމާޝަލް ޔުނިޓުތަކެއް ޤާއިމްކުރުމަށް އެފްޑީސީން ވަނީ ނިންމާފައެވެ.

ފްލެޓުތައް އަޅާފައިވާ ސަރަހައްދުގައި ޞިއްޙީ ޚިދުމަތްދޭ މަރުކަޒުތަކާއި ޒަރޫރީ ތަކެތި ގަނެވޭނެ ފިހާރަތަކާއި ޒުވާނުންގެ ސެންޓަރުތަކާއި އޮފީސް ޖާގަތަކާއި ކެފޭ ރެސްޓޯރަންޓްތައް ހުންނާނެކަމަށް އެފްޑީސީން މައުލޫމާތުދެއެވެ.