ހަކުރު އެކްސްޕޯޓްކުރުން އިންޑިއާއިން މަޑުޖައްސާލިނަމަވެސް ދިވެހި ރައްޔިތުންނަށް ދައްޗެއް ނުވާނެ: އެސްޓީއޯ

އިންޑިއާއިން ރާއްޖެއަށް ފޮނުވާ ހަކުރު ޝިޕްމަންޓް ސްރީލަންކާއަށް ފޮނުވައިގެން ފެންމަތިވި މައްސަލައާ ގުޅިގެން ދިވެހި ރައްޔިތުންނަށް ހަކުރު ލިބުމުގައި ދައްޗެއް ކުރިމަތިނުވާނޭކަމަށް އެސްޓީއޯއިން ވިދާޅުވެއްޖެއެވެ.

އެސްޓީއޯއިން މިހެން ވިދާޅުވީ މި މައްސަލަ ފެންމަތިވުމާއެކު މައްސަލަ ބަލައި ނިމެންދެން ވަގުތީގޮތުން ހަކުރު އެކްސްޕޯޓްކުރުން އިންޑިއާއިން މަޑުޖައްސާލާފައިވާކަމަށް ބުނެ ފަތުރަމުންދާ ޚަބަރުތަކާ ގުޅިގެންނެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ރާއްޖެއަށް އެކްސްޕޯޓްކުރުމަށް ކަނޑައަޅާފައިވާ 64,494 ޓަނު ހަކުރުގެ ތެރެއިން ބައެއް ލަންކާއަށް ޑައިވާޓްކޮށްފައިވާ މައްސަލައެއް އިންޑިއާގެ ކަމާބެހޭ ފަރާތްތަކުން ބަލަން ފަށާފައިވާ ކަމަށެވެ.

މި މައްސަލަ ފެންމަތިވުމާއެކު، ލަންކާއިން ވަނީ އިންޑިއާގެ ހަކުރު ޝިޕްމަންޓަށް ކްލިއަރެންސް ދިނުމުގެ މަސައްކަތް މަޑުޖައްސާލާފައެވެ. އެގޮތުން މިދިޔަ އޮކްޓޫބަރުމަހުގެ ނިޔަލަށް، އިންޑިއާއިން ލަންކާއަށް ގެންދިޔަ ހަކުރުގެ ތެރޭގައި ރާއްޖެއަށް ދޫކުރި ހުއްދައިގެ ދަށުން ގެންގޮސްފައިވާ ހަކުރުގެ 80 ކޮންޓެއިނަރު ހިމެނޭކަމަށް އިންޑިއާގެ ނޫސްތަކުން ރިޕޯޓްކުރެއެވެ.

އިންޑިއާ އާއި ރާއްޖެއާ ދެމެދު ވެފައިވާ އެއްބަސްވުމުގެ ދަށުން ހާއްސަ އަގުތަކުގައި ރާއްޖެއަށް ކާޑުގެ ބާވަތްތައް ފޯރުކޮށްދެއެވެ. އޭގެ ތެރޭގައި ހަނޑޫ، ހަކުރު، ފުށް، އަލުވި، ބިސް އަދި ފިޔާ ހިމެނެއެވެ. އިންޑިއާގައި ހަކުރު އުފައްދާ މިންވަރު ދަށްވުމުން މިދިޔަ އަހަރުން ފެށިގެން ހަކުރު އެކްސްޕޯޓް ކުރުން ވަނީ މަޑުޖައްސާލާފައެވެ. ނަމަވެސް ރާއްޖެއަށް ޙާއްސަ އެއްބަސްވުމުގެ ދަށުން އަންނަނީ ހަކުރު ފޯރުކޮށްދެމުންނެވެ.