އައިޑީ ކާޑު ޕްރިންޓްކޮށްދިނުމުގެ ޚިދުމަތް ހުޅުމާލެއާއި ވިލިމާލޭގައި ފަށައިފި

ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމުގެ ޚިދުމަތް ހުޅުމާލެއާއި ވިލިމާލޭގައި ފަށައިފިއެވެ.

ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމާއި ޕާސްޕޯޓު ދޫކުރުމުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާހުކޮށްދެއްވީ މިމަހުގެ 16 ވަނަ ދުވަހުއެވެ. މި މަޝްރޫޢުގެ ދަށުން މީހުން ދިރިއުޅޭ ހުރިހާ ރަށެއްގައި ޚިދުމަތްތައް ޤާއިމްކުރަންވަނީ ހަމަޖެހިފައެވެ.

އެގޮތުން އައިޑީ ކާޑު ޕްރިންޓުކޮށް، ކާޑު ހައްދައިދިނުމުގެ ޚިދުމަތް މިއަދު އަލަށް ފެށީ ވިލިމާލެއާއި ހުޅުމާލޭގެ ފިޔަވަހި އެކަކާއި ދޭއްގައެވެ.

އޮފީސްތައް ޤާއިމްކޮށްފައިވާ ތަންތަން:

• ހުޅުމާލޭގެ ފުރަތަމަ ފިޔަވަހި - ޢުމަރު ޒާހިރު ބިލްޑިންގ، ގްރައުންޑް ފްލޯ
• ހުޅުމާލޭގެ ދެވަނަ ފިޔަވަހި - ވިނަރެސް ޓަވަރ 2، ފަސްޓް ފްލޯ
• ވިލިމާލޭ - އީ ބްލޮކް، ގްރައުންޑް ފްލޯ

އަލަށް ޚިދުމަތް ދޭން ފެށި ތިން ތަނުގެ އިތުރުން ޑީއެންއާރުގެ 174 ކަލެކްޓިން ސެންޓަރު ރާއްޖޭގެ އެކި ސަރަހައްދުތަކުގައިވަނީ ޤާއިމު ކޮށްފައެވެ.

އައިޑީކާޑްގެ ޚިދުމަތް އޮންލައިންކޮށް ފުރަތަމަ ފަހަރަށް ދޭން ފެށީ ކޯވިޑާ ގުޅިގެން 2021 ގައެވެ. ކުރިން ބޭނުން ކުރަމުން އައި އޮންލައިން ޕޯޓަލްގެ ބަދަލުގައި ޑީއެންއާރު އޮންލައިން ޕޯޓަލްއެއް ޤާއިމުކޮށް އަމިއްލައަށް ކާޑަށް ހުށަހެޅޭގޮތް ހަމަޖެހުނީ މިދިޔަ އަހަރުގެ މާރިޗު މަހުގެ ތެރޭގައެވެ. އަދި ކާޑު ޕްރިންޓުކުރުމަށް ފަހު، ޑީއެންއާރުން އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ޚިދުމަތްވެސް ވަނީ މިއަހަރު ތަޢާރަފްކޮށްފައެވެ.

ސަރުކާރުގެ އަމާޒަކީ އައިޑީކާޑު ހައްދައިދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫއު އަންނަ އަހަރަށް ނިންމުމެވެ.