ފުވާދު ތައުފީޤު: ވަކިފަރާތަކަށް ޖެހި ވަޑައިނުގަނެ މަސައްކަތްކުރެއްވި ޚިދުމަތްތެރިއެއް

އިލެކްޝަންސް ކޮމިޝަންގެ މެންބަރުކަމަށް ދެވަނަ ފަހަރަށް ފުވާދު ތައުފީޤު އައްޔަންކުރެއްވީ 2019 ވަނަ އަހަރުއެވެ. އޭގެފަހުން 2021 ވަނަ އަހަރު އެކޮމިޝަންގެ ރައީސްކަމަށް ފުވާދު އައްޔަންކުރެވުނެވެ. މިއަދަކީ ކޮމިޝަންގެ މެންބަރުކަމުގެ ދެވަނަ ދައުރަކަށް ފުވާދު އައްޔަންކުރެވުނުތާ 5 އަހަރުފުރޭ ދުވަހެވެ. އިލެކްޝަންސް ކޮމިޝަންގައި ފުވާދު ހޭދަކުރާނެ ފަހު ދުވަހެވެ.

ފުވާދު ތައުފީޤު ފާހަގަކޮށްލެވެނީ އިލެކްޝަންސް ކޮމިޝަން އިންތިޚާބާ ބެހޭ މަރުކަޒެއްގައި އުފެދުނުއިރު، އެތަނުގައި މަސައްކަތްކުރެއްވި އިސްބޭފުޅެއްގެ ގޮތުގައެވެ. މިވީ މުއްދަތުގެތެރޭގައި ފުވާދު ފާހަގަކޮށްލެވެނީ ބޯހިމެނުމާއި ވޯޓުލުމާ ބެހޭގޮތުން ދިވެހިންގެ މެދުގައި ހޭލުންތެރިކަން އުފެއްދުމަށް ގިނަ މަސައްކަތްތަކެއް ކުރެއްވި ބޭފުޅެއްގެ ގޮތުގައެވެ.

ރާއްޖޭން ބޭރުން ސްޓެޓިސްޓިކްސްގެ ދާއިރާއިން ކިޔަވާ ވިދާޅުވުމަށްފަހު، ރާއްޖޭގައި ތަފާސްހިސާބުގެ ދާއިރާއިން ފުވާދު މަސައްކަތްކުރައްވަން ފެއްޓެވިއެވެ. އެއީ 1977 ވަނަ އަހަރުއެވެ. 1977 ވަނަ އަހަރުން ފެށިގެން އިންތިޚާބުތަކާއި ތަފާސްހިސާބާއި ބޯހިމެނުމާގުޅޭ ތަފާތު މަސައްކަތްތަކުގައި ފުވާދު އުޅުއްވިއެވެ. މިދާއިރާތަކުން ދިވެހިން ހޭލުންތެރިކުރުމަށް ގިނަ މަސައްކަތްތަކެއް ކުރެއްވިއެވެ. އެދުވަސްވަރު ފުވާދު މަސައްކަތްކުރެއްވީ އޭރުގެ މިނިސްޓްރީ އޮފް ނެޝަނަލް ޕްލޭނިންގައެވެ. އެ ވުޒާރާގައި 2007 ވަނަ އަހަރާ ހަމައަށް މަސައްކަތް ކުރެއްވިއެވެ.

ފުވާދު ތައުފީޤު އެންމެ ފުރަތަމަ އިލެކްޝަންސް ކޮމިޝަނާ ގުޅިވަޑައިގަތީ 2008 ވަނަ އަހަރު، ކޮމިޝަންގެ މެންބަރެއްގެ ގޮތުގައެވެ. އޭގެފަހުން 1 އަހަރު ދުވަހު ކޮމިޝަންގެ މެންބަރުކަމުގެ މަޤާމު ފުރުއްވުމަށްފަހު، 2009 ވަނަ އަހަރު ކޮމިޝަންގެ ރައީސްކަމަށް ފުވާދު އައްޔަންކުރެވުނެވެ. މި މަޤާމަށް ފުވާދު އައްޔަންކުރެއްވުނީ ކޮމިޝަންގެ ފުރަތަމަ ރައީސް، މުޙައްމަދު އިބްރާހިމް އިސްތިއުފާދެއްވުމާ ގުޅިގެންނެވެ.

ކޮމިޝަންގެ ރައީސްކަމާ ހަވާލުވެވަޑައިގަތް އިންތިޚާބުތަކަށް ރައްޔިތުންގެ މެދުގައި ހޭލުންތެރިކަން އުފެއްދުމުގެ މަސައްކަތް އިތުރަށް ފުޅާކުރެއްވިއެވެ. އެއް މީހެއްގެ ނަމުގައި އެތައް އައިޑީކާޑެއް އޮތުންފަދަ އޭރުގެ ވޯޓަރސް ލިސްޓުގައި އޮތް ގިނަ މައްސަލަތަކެއް ހައްލުކުރެއްވިއެވެ. އިންތިޚާބުތަކަކީ އަމާންކަމާއި ސުލްޙަވެރިކަމާއެކު ދެފުށްފެންނަ ގޮތަށް ކުރިއަށްދާ އެއްޗަކަށް ހެދުމަށްވެސް ފުވާދު ގިނަ މަސައްކަތްތަކެއް ކުރެއްވިއެވެ.

2009 ވަނަ އަހަރުން ފެށިގެން 2014 ވަނަ އަހަރުގެ މާރިޗު މަހާ ހަމައަށް ކޮމިޝަންގެ ރައީސްކަމުގެ މަޤާމު ފުވާދު ފުރުއްވިއެވެ. އެއަށްފަހު އިލެކްޝަންސް ކޮމިޝަނުން ފުވާދު ވަކިވެވަޑައިގެންނެވިއެވެ.

އެއަށްފަހު އަނބުރާ އިލެކްޝަންސް ކޮމިޝަނާ ފުވާދު ގުޅިވަޑައިގަތީ 2019 ވަނަ އަހަރުއެވެ. އަދި 2021 ވަނަ އަހަރު ދެވަނަ ފަހަރަށް ކޮމިޝަންގެ ރައީސްކަމުގެ މަޤާމަށް ފުވާދު އައްޔަންކުރެވުނެވެ. ފުވާދުގެ މި ދައުރުގެ ތެރޭގައި ކުރިއަށްދިޔަ 2023 ވަނަ އަހަރުގެ ރިޔާސީ އިންތިޚާބާއި 2024 ވަނަ އަހަރުގެ މަޖިލިސް އިންތިޚާބު ފާހަގަކޮށްލެވެނީ މިހާތަނަށް ރާއްޖޭގައި އެންމެ އަމާންކަމާއި ސުލްޙަވެރިކަމާއެކު ބޭއްވުނު ދެ އިންތިޚާބުގެގޮތުގައެވެ. މިއީ ގިނަ ބަޔަކު މި ދެ އިންތިޚާބު ސިފަކުރާ ގޮތެވެ.

ފުވާދު ވިދާޅުވާ ގޮތުގައި މިއީ މި ވޭތުވެދިޔަ އަހަރުތަކުގައި ހޭލުންތެރިކުރުމަށް ކުރެވުނު ގިނަ މަސައްކަތްތަކުގެ ނަތީޖާއެވެ. މިއަދު ފުވާދު އިލެކްޝަންސް ކޮމިޝަނުން ވަކިވެވަޑައިގަންނަވާއިރު ފުވާދުގެ އިލްތިމާސަކީ ވޯޓުލުމުގެ ޙައްޤު ކޮންމެ ދިވެހި ފަރުދަކުވެސް އަދާކުރުމެވެ. އިންތިޚާބުތަކުގައި ކޮންމެ ރައްޔިތަކުވެސް އެއްބާރުލުން ދިނުމެވެ. ބޯހިމެނުމުގެ މަސައްކަތަށްވެސް ކޮންމެ ރައްޔިތަކު އެއްބާރުލުން ދިނުމެވެ.

"ކޮންމެ އިންތިޚާބެއްގައި ބޭނުންވޭ 6000 އޮފިޝަލުން. މި އަދަދު ހަމަކުރަން ކޮންމެ ފަހަރަކު އެތައް މަސައްކަތްތަކެއްކުރަންޖެހޭ. އިލްތިމާސަކީ މިކަމަށް ކޮންމެ ރައްޔިތަކުވެސް އެއްބާރުލުން ދިނުން. އަދި ބޯހިމެނުމަކީވެސް ޤައުމުގެ އެންމެން ޝާމިލުވާ ބޮޑު މަސައްކަތެއް. މިކަމަށްވެސް ކޮންމެ ރައްޔިތަކު އެއްބާރުލުންދީ މި މަސައްކަތަށް އެހީތެރިވެދޭންޖެހޭ." ފުވާދު ވިދާޅުވިއެވެ.

ފުވާދަކީ ޤައުމީ ޚިދުމަތްތެރިއެކެވެ. އެތައް ރައްޔިތުންނެއް ޝާމިލުވާ ޤައުމުގެ އެންމެ ބޮޑު ހަރަކާތް އިންތިޒާމްކުރުމުގައި ފުވާދު ކުރެއްވި މަސައްކަތް ރައްޔިތުން ބަލައިގަންނަނީ ޝުކުރުވެރިކަމާއެކުއެވެ. އެހެނީ ފުވާދަކީ ޤައުމުގެ މަސްލަހަތު އިސްކޮށްގެން ވަކި ފަރާތަކަށް ޖެހިވަޑައިނުގަނެ މަސައްކަތްކުރެއްވި ޚިދުމަތްތެރިއެކެވެ.