ދުންފަތް ކޮންޓްރޯލްކުރުމުގެ ޤާނޫނަށް 14 އަހަރުވީއިރު، ޤަވާއިދުތައް ހަދާފައިނެތް: ބަންޑާރަ ނައިބު
-
އެންމެ ފުރަތަމަ ދުންފަތް ކޮންޓްރޯލްކުރުމުގެ ޤާނޫނު އެކުލަވާލީ 2010 ވަނަ އަހަރު
ރާއްޖޭގައި ފުރަތަމަ ފަހަރަށް ދުންފަތް ކޮންޓްރޯލްކުރުމަށް އެކުލަވާލި ޤާނޫނަށް ޢަމަލުކުރަމުންދާތާ 14 އަހަރުވީއިރުވެސް، އެޤާނޫނުގެ ދަށުން ހަދަންޖެހޭ ޤަވާއިދުތައް ހަދާފައި ނެތުމަކީ ދުންފަތް ކޮންޓްރޯލްކުރުމަށް އޮތް އެންމެ ބޮޑު ގޮންޖެހުންކަމަށް ބަންޑާރަ ނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ. ބަންޑާރަ ނައިބު މިހެން ވިދާޅުވީ، ސަރުކާރަށް އަހަރެއް ވުމާއި ގުޅިގެން ޕީއެސްއެމް ނިއުސްއިން ގެނެސްދޭ "ހަފްތާ52" ޕްރޮގްރާމުގައި ވާހަކަފުޅު ދައްކަވަމުންނެވެ.
ބަންޑާރަ ނައިބު އަލްއުސްތާޛު އަޙްމަދު އުޝާމް ވިދާޅުވީ، މިހާރު ޤާނޫނުތަކަށް ގެންނަ ގިނަ އިޞްލާހުތަކަކީ ވޭތުވެދިޔަ ސަރުކާރުތަކުން އަޅާނުލައި ދޫކޮށްލާފައިވާ ކަންތައްތައް ހައްލުކުރުމަށް ގެންނަ އިޞްލާހުތަކެއްކަމަށެވެ. އެގޮތުން އެއް ޤާނޫނެއްގެ ގޮތުގައި ބަންޑާރަ ނައިބު ފާހަގަކުރެއްވީ ދުންފަތް ކޮންޓްރޯލް ކުރުމާބެހޭ ޤާނޫނެވެ. އެ ޤާނޫނުގައި ބަޔާންކޮށްފައިވަނީ ރާއްޖެ ބައިވެރިވެފައިވާ ދުންފަތް ކޮންޓްރޯލުކުރުމާބެހޭ މުޢާހަދާތަކަށް ޢަމަލުކުރުމުގެ ގޮތުން އެކަމަކާގުޅޭގޮތުން ހަދަންޖެހޭ ގަވާއިދުތައް ހަދައި ހިންގަންވާނެކަމަށެވެ.
ދުންފަތް ހުއްޓުވުމަށްޓަކައި ރާއްޖޭގައި ފުރަތަމަ ފަހަރަށް ޤާނުނެއް އެކުލަވާލާ އަމަލުކުރަން ފަށާފައިވަނީ 2010 ވަނަ އަހަރުކަން ފާހަގަކުރައްވަމުން ބަންޑާރަ ނައިބު ވަނީ އެޤާނޫނުގެ ދަށުން ހަދަންޖެހޭ ޤަވާއިދުތައް ފާއިތުވި 14 އަހަރު ތެރޭގައިވެސް ހަދާފައި ނުވާކަމަށެވެ.
"އެޤާނޫނު ފުރިހަމައަށް ތަމްފީޒްކުރުމަށްޓަކައި އެ ޤާނޫނުގެ ދަށުން ހަދަންޖެހޭ ޤަވާއިދިތައްވެސް ހަދާފައެއް ނުވޭ. އެހެންވީމަ އެޤާނޫނު ތަންފީޒްކުރުމުގައި މިހާބޮޑު ދަތިތަކެއް ކުރިމަތިވަމުން މިދިޔައީ. ދުންފަތުގެ މައްސަލައަކީ ވަރަށް ބޮޑު މައްސަލައެއް. ސިނގިރޭޓު އަދި ވޭޕް ބޭނުންކުރުމުގެ ސަބަބުން ރާއްޖޭގެ ސިއްޙީ ނިޒާމަށް، މީހުންގެ ސިއްހަތަށް އެ ލިބޭ ގެއްލުމަކީ ހަގީގަތުގައިވެސް ދައުލަތަށްވެސް އާންމު ރައްޔިތުންނަށްވެސް ބުރައަކަށްވެފައިވަނީ." ބަންޑާރަ ނައިބު އަލްއުސްތާޛު އަޙްމަދު އުސާމް ވިދާޅުވިއެވެ.
ބަންޑާރަ ނައިބުގެ ވާހަކަފުޅުގައި ރާއްޖޭގައި ވޭޕް މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމުމަކީ އުނދަގޫ ނިންމެވުމެއްކަމަށް ސިފަކުރައްވަމުން ވިދާޅުވީ ރައީސުލްޖުމްހޫރިއްޔާގެ އެ ނިންމެވުމަކީ ރައްޔިތުންގެ ހައްގުގައި ނިންމެވި ނިންމެވުމެއްކަމަށެވެ. ކިތަންމެ އުނދަގޫ ނިންމެވުމެއްނަމަވެސް ރައްޔިތުންގެ ހައްގުގައި ކުރައްވަންޖެހިވަޑައިގަންނަވާކަންކަން ކުރައްވާނެކަމުގެ ޔަޤީންކަން ދެއްވަމުން ބަންޑާރަ ނައިބު ވިދާޅުވީ ޤާނޫނުތަކަށް ގެންނަންބޭނުންފުޅުވާ ބަދަލުތައް ދައުރުގެ ކުރީކޮޅު ގެނައުމަށް ރައީސުލްޖުމްހޫރިއްޔާ އިސްކަންދެއްވާކަމަށެވެ.
ރާއްޖޭގައި ދުންފަތް ކޮންޓްރޯލްކުރުމާބެހޭ ޤާނޫނަށް ސަރުކާރުން ގެނައި އިޞްލާހަށް މިމަހުގެ 15 ވަނަ ދުވަހު ވަނީ ޢަމަލުކުރަން ފަށާފައެވެ. އެއީ މިމަހުގެ 15 ވަނަ ދުވަހުން ފެށިގެން އީ ސިނގިރޭޓާއި ވޭޕް ރާއްޖެ އެތެރެކުރުން މަނާކުރުމެވެ. އަދި އަންނަ މަހުގެ 15އިން ފެށިގެން ވޭޕް ބޭނުންކުރުމަކީވެސް ޤާނޫނުން މަނާކަމެވެ.
މިފަހުން ޢަމަލުކުރަން ފެށި އިޞްލާހުތަކާއެކު ދުންފަތް ކޮންޓްރޯލްކުރުމާބެހޭ ޤާނޫނުން ލާޒިމްކުރާ މުހިއްމު ޤަވާއިދުތައް އެކުލަވާލުމުގެ މަސައްކަތް ކަމާގުޅުންހުރި ފަރާތްތަކުން ދަނީ ކުރަމުންނެވެ.