އިޓާލިއަން ލީގުގެ ކުލަބު، ޖެނޯއާގެ ކޯޗުގެ މަގާމަށް ފްރާންސާއި އާސެނަލްގެ ކުރީގެ ޑިފެންޑަރު ޕެޓްރިކް ވިއޭރާ ހަމަޖައްސައިފިއެވެ.
އުމުރުން 48 އަހަރުގެ ވިއޭރާ ޖެނޯއާ އާއި ހަވާލުވިއިރު އެ ކްލަބު އޮތީ ސެރިއާގެ 18 ވަނަ މަގާމުގައި ރެލިގޭޝަނުގެ ޒޯނަށްވުރެ އެންމެ ޕޮއިންޓެއް ކުރީގަ އެވެ.
ޖެނޯއާގެ ކޯޗު ކަމާއި ވިއޭރާ ހަވާލުވެފައިވަނީ ކުރިން އެ ކްލަބުގެ ކޯޗަކަށް ހުރި އިޓަލީގެ ކުރީގެ ފޯވަޑް އަލްބާޓޯ ޖިލާޑީނޯ އެ މަގާމުން ދުރުކުރުމަށްފަހުގަ އެވެ. ޖިލާޑީނޯގެ އިރުޝާދުގެ ދަށުން މި ސީޒަނުގައި ޖެނޯއާ ކުޅުނު 12 މެޗުގެ ތެރެއިން އެ ޓީމު މޮޅުވެފައިވަނީ އެންމެ ދެ މެޗުންނެވެ. އަދި ކޯޕާ އިޓާލިއާ އިން އެ ޓީމު ކަޓާފައިވަނީ ސެމްޕްޑޯރިއާ އަތުން ޕެނަލްޓީ އިން ބަލިވެގެންނެވެ.
އަލްބާޓޯ ޖިލާޑީނޯ އަކީ 2006 ވަނަ އަހަރުގެ ވޯލްޑް ކަޕް އިޓަލީ އިން ކާމިޔާބުކުރި ޓީމުގައި ހިމެނޭ އޭރުގެ ކުޅުންތެރިއެކެވެ.
އިނގިރޭސި ޕްރިމިއާ ލީގުގެ ކްލަބް ކްރިސްޓަލް ޕެލަސް އަށް ކޯޗު ކޮށްދިނުމަށްފަހު ވިއޭރާ ވަނީ އާރުސީ ސްޓްރޯސްބަރގް އަށް ކޯޗު ކޮށްދިނުމަށްފަހު އެ ކްލަބުގެ ކޯޗު ކަމުން މިދިޔަ ޖުލައި މަހު އިސްތިއުފާ ދީފަ އެވެ.
ޖެނޯއާގެ ކޯޗު ކަމާއި ވިއޭރާ ހަވާލުވާއިރު މިދިޔަ މަހު ޖެނޯއާ އިން ވަނީ މާރިއޯ ބަލޮޓެއްލީ އެ ކްލަބަށް ސޮއިކުރުވާފަ އެވެ. ބަލޮޓެއްލީ އަކީ ވިއޭރާ އާއިއެކު މެންޗެސްޓަރ ސިޓީ އާއި އިންޓަ މިލާނަށް ކުޅެފައިވާ ކުޅުންތެރިއެކެވެ. އަދި ފްރާންސްގެ ނީސްގެ ކޯޗަކަށް ވިއޭރާ ހުރިއިރު އެ ކްލަބަށް ބަލޮޓެއްލީ ވަނީ ކުޅެފަ އެވެ. އަދި އޭރު ނީސް ދޫކޮށް ބަލޮޓެއްލީ ދިޔައީ ވިއޭރާ ބޭނުންކުރާ ޓެކްޓިކްސް އޭނާއަށް ކަމުނުދާތީ ކަމަށްވެސް މީގެ ކުރިން ބަލޮޓެއްލީ ވަނީ ބުނެފަ އެވެ.
1998 ވަނަ އަހަރުގެ ވޯލްޑް ކަޕް ފްރާންސް އިން ކާމިޔާބު ކުރިއިރު އެ ޓީމުގައި މުހިންމު ދައުރެއް އަދާކުރި ވިއޭރާ ވަނީ ކުޅުންތެރިއެއްގެ ގޮތުގައި އާސެނަލް އާއިއެކު ޕްރިމިއާ ލީގު ތިން ފަހަރު އަދި އެފްއޭ ކަޕް ހަތަރު ފަހަރު ކާމިޔާބުކޮށްފަ އެވެ.
2011 ވަނަ އަހަރު ކުޅުން ހުއްޓާލުމަށްފަހު ވިއޭރާ ފުރަތަމަ ކޯޗު ކޮށްދީފައިވަނީ އެމެރިކާގެ ނިއު ޔޯކް ސިޓީ އަށް 2016 ވަނަ އަހަރު އެވެ.
ވިއޭރާ ވަނީ 2021 ވަނަ އަހަރު ކްރިސްޓަލް ޕެލަސް އާއި ހަވާލުވުމަށްފަހު އިނގިރޭސި އެފްއޭ ކަޕްގެ ސެމީ ފައިނަލަށް އެ ޓީމު ގެންގޮސްދީފަ އެވެ.