ޔުއެފާ ނޭޝަންސް ލީގުގައި ރޭ ސްލޮވީނިއާ އާ ދެކޮޅަށް ކުޅުނު މެޗުގައި ނޯވޭ އަށް ޖަހައިދިން ގޯލާއެކު، އާލިން ބްރައުޓް ހާލަންޑް ގައުމީ ޓީމަށް ލަނޑުޖަހައިދިނުމުގެ ރިކޯޑް ދަމަހައްޓައިފިއެވެ.
އިންގްލެންޑްގެ މެންޗެސްޓަރ ސިޓީ އަށް ކުޅެމުން އަންނަ ހާލަންޑް ވަނީ ނޯވޭގެ މިޑްފީލްޑްގައި ހިމެނޭ ސެންޑާ ބާޖް ދިން ތުރޫ ޕާހެއްގެ އެހީގައި، އެ ޓީމަށް 2-1 އިން ލީޑްނަގައިދީފައެވެ. މިއީ ނޯވޭ ގައުމީ ޓީމަށް އޭނާ ޖަހައިދިން 35 ވަނަ ގޯލެވެ.
ދާދިފަހުން ހާލަންޑް ވަނީ ކުރީން ފޯވާޑް، ޖޯގެން ޖޫވޭގެ 90 އަހަރުވީ ލަނޑުޖެހުމުގެ ރެކޯޑެއް މުގުރާލައިފައެވެ. ހާލަންޑް މި ރެކޯޑް މުގުރާލީ މިދިޔަ މަހުގައި ސްލޮވީނިއާ އާ ދެކޮޅަށް ކުޅުނު މެޗުގައި ޖެހި ދެ ގޯލާއެކު އެވެ.
ރޭގެ މެޗުގައި ނޯވޭގެ ޒުވާން ކުޅުންތެރިޔާ، އެންޓޯނިއޯ ނޫސާ ވަނީ ދެލަނޑުޖަހައިފައެވެ. އެ ޓީމުގެ އަނެއް ލަނޑުޖަހައިދިނީ ޔެންސް ޕެޓާ ހޯގޭ އެވެ. ސްލޮވީނިއާގެ ހަމައެކަނި ލަނޑުޖަހައިދިނީ ލިބުނު ޕެނަލްޓީއަކުން ބެންޖަމިން ސެޝްކޯ އެވެ.
ނޭޝަންސް ލީގުގައި ނޯވޭ އަށް ދެން އޮތީ މި މަހުގެ 17 ވަނަ ދުވަހު އަމިއްލަ ދަނޑުގައި ކަޒަކިސްތާނާ ދެކޮޅަށް ކުޅެން ޖެހޭ މެޗެވެ.