ކުރީގެ ފުޓްބޯޅަ ތަރި ޑިއެގޯ ފޯލާންގެ ޕްރޮފެޝަނަލް ޓެނިސް ކެރިއަރުގެ ފެށުން އުރުގުއޭ އޯޕަންގައި ޑަބަލްސް މެޗެއްގައި ބައްޔަކުން ފަށައިފިއެވެ.
އުމުރުން 45 އަހަރުގެ ފޯލާން އާއި އާޖެންޓީނާގެ ފެޑެރީކޯ ކޯރިއާގެ ޕެއާ ވަނީ އެ މުބާރާތުގެ ފުރަތަމަ ބުރުގައި ބޮރިސް އަރިއާސް އާއި ފެޑެރީކޯ ޒެބަޔޯސް އަތުން 6-1 އަދި 6-2 އިން ބަލިވެފައެވެ.
ފޯލާން އާއި ކޯރިއާއަށް މި ފަހަރުގެ އުރުގުއޭ އޯޕަންގެ ޑަބަލްސް އިވެންޓްގައި ކުޅުމަށް ފުރުޞަތު ލިބުނީ ވައިލްޑް-ކާޑް އެންޓްރީގެ ޒަރިއްޔާއިންނެވެ.
2019 ވަނަ އަހަރު ފުޓްބޯޅައިން ރިޓަޔާކުރި ފޯލާންގެ ޕްރޮފެޝަނަލް ފުޓްބޯޅަ ކެރިއަރުގައި ވަނީ، މެންޗެސްޓާ ޔުނައިޓެޑާއި، އެތުލެޓިކޯ މެޑްރިޑް އަދި އިންޓަރ މިލާން ފަދަ މަޝްހޫރު ކްލަބުތަކަށް ކުޅެފައެވެ. އުރުގުއޭގެ ގައުމީ ޓީމަށް ކުޅެފައިވާ އެންމެ ހުނަރުވެރި ފޯވާޑުންގެ ތެރޭގައި ގުނާލެވޭ ފޯލާން ވަނީ 2010 ވަނަ އަހަރުގެ ފީފާ ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމާއި، ޖޮއިންޓް ޓޮޕް ސްކޯރާގެ މަގާމު ވެސް ހާސިލްކޮށްފައެވެ. އޭގެފަހުން، ކޮޕާ އެމެރިކާ 2011 ގެ ފައިނަލްގައި ޖެހި ދެލަނޑާއެކު އުރުގުއޭ އަށް އެ މުބާރާތް ކާމިޔާބުކޮށްދިނުމުގައި އިސް ދައުރެއް އަދާކޮށްފައިވެއެވެ.
ފޯލާން ވަނީ ވޭތުވެދިޔަ ފަސް އަހަރު ދުވަހުގެ ތެރޭގައި އެމޭޗާއި މާސްޓާސް ޓެނިސް މުބާރާތްތަކުގައި ވާދަކޮށް ގިނަ ކާމިޔާބީތަކެއް ހާސިލްކޮށްފައެވެ. މިއާއެކު، އޭނާއަށް ވަނީ އުރުގުއޭގެ އެންމެ ބޮޑު ފްރޮފެޝަނަލް ޓެނިސް މުބާރާތުގައި ކުޅުމުގެ ދަޢުވަތު ލިބިފައެވެ.