ގައުމީ ހޭންޑްބޯޅަ މުބާރާތް: ދެވަނަ ޑިވިޝަންގެ ސެމީއަށް ހުޅުމާލެ ވައިސީ، ޒެފްރޯލް، އިސްލޭނޯ އަދި ހިޔާ

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަންގެ ކުއާޓާ ފައިނަލްގެ މެޗުތައް ރޭ ކުޅުނުއިރު، ސެމީ ފައިނަލުގެ ޖާގަތައް ހުޅުމާލެ ވައިސީ، ޒެފްރޯލް، އިސްލޭނޯ އަދި ހިޔާއިން ކަށަވަރުކޮށްފިއެވެ.

ކުއާޓާ ފައިނަލް ފުރަތަމަ މެޗު ހުޅުމާލޭ ވައިސީ ކާމިޔާބުކޮށްފައިވަނީ އެލްކިއުގެ މައްޗަށް 27-12 ގެ ނަތީޖާއަކުން މެޗު ކާމިޔާބުކޮށްގެންނެވެ. ހުޅުމާލެ ވައިސީން މޮޅު ކުޅުމެއް ދެއްކި މި މެޗުގެ މޮޅު ކުޅުންތެރިއަކަށް ހޮވިފައިވަނީ އެ ޓީމުގެ މަރިޔަމް ޝިފްނާއެވެ.

ސެމީގެ ޖާގައެއް ޒެފްރޯލް ހޯދީ ކުއާޓާ ފައިނަލް ދެވަނަ މެޗުގައި ވެސްޓް އެންޑް ސްޕޯޓްސް ކުލަބާ ވާދަކޮށް 26-17 ގެ ނަތީޖާއަކުން މެޗު ކާމިޔާބުކޮށްގެންނެވެ. މެޗުގެ މޮޅު ކުޅުންތެރިއަކަށް ހޮވުނީ ފާތުމަތު ލީމް ބިންތް ޔާސިރު އެވެ. އޭނާ ވަނީ މިމެޗުގައި އެޓިމަށް އަށް ލަނޑު ކާމިޔާބުކޮށް މޮޅު ކުޅުމެއް ދައްކާފައެވެ.

ކުއާޓާ ފައިނަލުގެ ތިންވަނަ މެޗުގައި ބައްދަލުކުރީ ކުލަބު ޔުނިޓީ އައިލެންޑާސް އާއި އިސްލޭނޯ ސްޕޯޓްސް ކުލަބެވެ. މި މެޗު އިސްލޭނޯ ކާމިޔާބުކޮށްފައިވަނީ އެއް ލަނޑުގެ ތަފާތުންނެވެ. އެއީ 14-15 އިންނެވެ. މިމެޗުގެ މޮޅު ކުޅުންތެރިއަކަށް ހޮވުނީ އިސްލޭނޯގެ ގޯލު ކީޕަރު ޚަދީޖާ އިބްރާހީމެވެ.

މި ޑިވިޝަންގެ ކުއާޓާ ފައިނަލުގެ ހަތަރުވަނަ މެޗުގައި ބައްދަލުކުރީ ޓީމް ހިޔާ އަދި ޓީމް ގެލެކްޓިކޯ އެވެ. ފޯރިގަދަ ކުޅުމަކާއެކު 14-13 ގެ ނަތީޖާއަކުން މި މެޗު ކާމިޔާބުކޮށްފައިވަނީ ހިޔާއެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ގޯލްކީޕަރު ކުލްސޫމް ޚާލިދެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ.