އިންޓަނޭޝަނަލް ބްރޭކުގައި ރާއްޖެއިން ބަންގްލަދޭޝް އާއި ދެކޮޅަށް ކުޅޭ އެކުވެރިކަމުގެ ދެ މެޗަށް ގައުމީ ފުޓުބޯޅަ ޓީމު ބަންގްލަދޭޝް އަށް ފުރައިފިއެވެ.
މި ދެ މެޗަށް ނެގި ސްކޮޑުގައި ޒުވާން ގިނަ ކުޅުންތެރިންތަކެއް ހިމެނެއެވެ. އެގޮތުން 20 އަހަރުން ދަށުގެ ގައުމީ ޓީމުގެ ތިން ކުޅުންތެރިއަކު މި ސްކޮޑުގައި ހިމެނޭއިރު، ދާދިފަހުން އޭއެފްސީ ޗެލެންްޖް ލީގުގެ ގްރޫޕް މެޗުތަކުގައި ކުޅުނު ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުގެ ކުޅުންތެރިން ހިމެނެއެވެ. އެގޮތުން މާޒިޔާގެ 14 ކުޅުންތެރިން މި ސްކޮޑުގައި ހިމެނެއެވެ.
ބަޝުންދަރާ ކިންގްސް އެރީނާގައި ދެ މެޗު ކުޅުމަށް ހަމަޖެހިފައިވަނީ މިމަހުގެ 13 އާއި 16 ވަނަ ދުވަހުއެވެ. މި ދެ މެޗަކީ މުހިންމު ދެ މެޗުގެ ގޮތުގައި ބަންގްލަދޭޝް އިންވެސް ވަނީ ފާހަގަކޮށްފައެވެ.
މި ސްކޮޑުން މިފަހަރު އަލަށް ފުރުސަތު ލިބުނު ކުޅުންތެރިންތަކުގެ ތެރޭގައި ހައިސަމް ރަޝީދު އާއި އަހުމަދު މާއިޝް ރަޝީދު ހިމެނެއެވެ.
މިއީ އަހަރަކަށް ވުރެ ގިނަ ދުވަސް ފަހުން ގައުމީ ފުޓްބޯޅަ ޓީމުން ކުޅޭނެ ފުރަތަމަ މެޗުތަކެވެ. އެގޮތުން އެންމެ ފަހުންވެސް ރާއްޖެއިން ބައިނަލްއަގުވާމީ މެޗެއް ކުޅެފައިވަނީ ބަންގްލަދޭޝް އާއި ދެކޮޅަށެވެ. އެއީ މިދިޔަ އަހަރުގެ އޮކްޓޯބަރު މަހު، އޭޝިއާ ސަރަހައްދުގެ ފީފާ ވޯލްޑް ކަޕް ކޮލިފައިންގައި އެ ޓީމަށް ދެކޮޅަށް ކުޅުނު މެޗުތަކެވެ. އެ ގޮތުން އެ ފަހަރުގެ ކޮލިފައިންގައި މާލޭގައި ކުޅުނު މެޗު 1-1 ގެ ނަތީޖާއަކުން އެއްވަރުވިއިރު، ބަންގްލަދޭޝްގައި ކުޅުނު މެޗުން 2-1 ގެ ނަތީޖާއަކުން ކާމިޔާބުކޮށްފައިވަނީ އެ ގައުމުންނެވެ.
އެ ފަހަރު މާލޭގައި ކުޅުނު މެޗު އެއްވަރުވިއިރު، މިއީ 2000 ވަނަ އަހަރުގެ ގޯލްޑަން ޖުބިލީ ފުޓްބޯޅަ މުބާރާތުގައި މާލޭގައި ބަންގްލަދޭޝް އާއި ރާއްޖެ 1-1 ގެ ނަތީޖާއަކުން އެއްވަރުވި ފަހުން، ބަންގްލަދޭޝްއިން މާލޭގައި ކުޅެ ރާއްޖެއާ އެއްވަރުކުރި ފުރަތަމަ ފަހަރެވެ. މީގެ އިތުރުން އެންމެ ފަހުން ބަންގްލަދޭޝް އަތުން ރާއްޖެ މޮޅުވެފައިވަނީ 2022 ވަނަ އަހަރު މާލޭގައި ކުޅުނު އެކުވެރިކަމުގެ މެޗެއްގައެވެ.