މިހާރު އޮސްޓްރޭލިއާގައި ކުޅެމުންދާ އޯޑީއައި (ވަންޑޭ އިންޓަނޭޝަނަލް) ސީރީޒްގެ ތިންވަނަ މެޗުގައި ޕާކިސްތާނުން އަށް ވިކެޓުން މޮޅުވެ، ސީރީޒް ވެސް ކާމިޔާބުކޮށްފިއެވެ.
މިއީ 22 އަހަރުގެ ތެރޭގައި އޮސްޓްރޭލިއާގެ މައްޗަށް އެ ގައުމުގައި ވަންޑޭ ސީރީޒްއަކުން ޕާކިސްތާން މޮޅުވި ފުރަތަމަ ފަހަރެވެ.
މި ދެ ޓީމުގެ މެދުގައި ކުޅެވުނު ތިން މެޗުގެ ސީރީޒް ޕާކިސްތާނުން ކާމިޔާބުކުރީ 2-1 އިންނެވެ.
ޕާތުގައި އިއްޔެ ކުޅުނު މި މެޗުގެ ޓޮސް ދިމާވުމުން ޕާކިސްތާނުން ގަސްދުކުރީ ހޮވަން އަރާށެވެ. އޮސްޓްރޭލިއާ އިން ކުޅެން އަރައި، 31.5 އޯވަރުގެ ތެރޭގައި ހުރިހާ ކުޅުންތެރިން ނުބައިވީ އެންމެ 140 ލަނޑަށެވެ.
އޮސްޓްރޭލިއާގެ އިނިންގްސްގައި އެންމެ ރަނގަޅަށް ކުޅުނީ 30 ލަނޑުހެދި ޝޯން އެބޮޓް އެވެ. ދެން އެންމެ ރަނގަޅަށް ކުޅުނު މެތިއު ޝޯޓް 22 ލަނޑުހެދިއެވެ. އެ ޓީމުގެ ކެޕްޓަން، ޖޯޝް އިންގްލިސް ހަތް ލަނޑަށް ނުބައިވިއިރު، ގްލެން މެކްސްވެލް ނުބައިވީ ސުމަކަށެވެ. މި އިނިންގްސްގައި ޕާކިސްތާނުން އެންމެ ރަނގަޅަށް އުކި ޝާހީން ޝާހް އަފްރީދީ އާއި ނަސީމް ޝާހު ކުރެން ކޮންމެ ކުޅުންތެރިއަކު ތިން ވިކެޓްނެގިއިރު، ހާރިސް ރައުފް ދެ ވިކެޓްނެގިއެވެ.
ޖަވާބުގައި ކުޅެން އަރައި، ޕާކިސްތާނުން މޮޅުވެގެން ފޭބީ 26.5 އޯވަރުގެ ތެރޭގައި ދެ ވިކެޓަށް 143 ލަނޑުހަދައިގެންނެވެ. އެ ޓީމުން އެންމެ ރަނގަޅަށް ކުޅުނީ 42 ލަނޑުހެދި ސާއިމް އައްޔޫބް އެވެ. މީގެ އިތުރުން، 37 ލަނޑުހެދި އަބްދުﷲ ޝަފީޤު އާއި ނުބައިނުވެ 30 ލަނޑުހެދި އެ ޓީމުގެ ކެޕްޓަން، މުޙައްމަދު ރިޒުވާން އަދި ނުބައިނުވެ 28 ލަނޑުހެދި ކުރީގެ ކެޕްޓަން، ބާބަރް އާޒަމްގެ ކުޅުން ފާހަގަކޮށްލެވުނެވެ. މި އިނިންގްސްގައި އޮސްޓްރޭލިއާގެ ލާންސް މޮރިސް ފިޔަވައި އެހެން ކުޅުންތެރިއަކަށް ވިކެޓެއް ނުނެގުނެވެ. އޭނާ ދެ ވިކެޓްނެގިއެވެ.
މެޗަށްފަހު ވަނަތަކަށް ހޮވުނު ފަރާތްތަކަށް އިނާމުދިންއިރު، ވަންޑޭ ސީރީޒްގެ މޮޅު ކުޅުންތެރިޔާގެ އިތުރުން ތިންވަނަ މެޗުގެ މޮޅު ކުޅުންތެރިއަކަށް ހޮވުނީ ވެސް ޕާކިސްތާންގެ އުކުންތެރިޔާ، ހާރިސް ރައުފް އެވެ. އޭނާ ވަނީ ތިން މެޗުގައި މުޅިއެކު 10 ވިކެޓްނަގައިފައެވެ.