ކުރިއަށް އޮތް މުސްތަގުބަލުގައި ބޮޑީބޯޑިންގައި ޖޫނިއަރ އަދި އަންހެން އެތުލީޓުން އިތުރަށް އުފެއްދުމަކީ އަމާޒެއް ކަމަށް ބޮޑީބޯޑިން އެސޯސިއޭޝަން އޮފް މޯލްޑިވްސް (އެމްބީބީއޭ) އިން ބުނެފިއެވެ.
ޕީއެސްއެމްއިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަވަމުން ބޮޑީބޯޑިން އެސޯސިއޭޝަންގެ ރައީސް ހުސެއިން ނިޒާމް ވިދާޅުވީ ރާޅާއެޅުން ގިނަ ޒުވާނުންނަށް ސިފަވެފައި އޮންނަނީ ވަކި ހާއްސަ ދުވަސްވަރެއްގައި ކުރާކަމެއްގެ ގޮތުގައި ކަމަށެވެ. އަބަދުވެސް މި ކުޅިވަރުގައި ބެޗަކަށްފަހު ބެޗެއް ނުކުންނަކަން ފާހަގަކުރެވޭ ކަމަށާއި އެކަމަކު ކުޅިވަރުގެ ކަންތައްތައް އޮންނަ ގޮތުން ކެރިއަރ އެއް ގޮތުގައި ކުރިޔަށްދާކަން ފާހަގަކުރެވެނީ މަދު އެތުލީޓުންތަކެއް ކަމަށް ނިޒާމް ވިދާޅުވިއެވެ.
ރާއްޖޭގައި ބޮޑީބޯޑަރުންގެ ގިނަ އެތުލީޓުން ވަޒީފާތަކުގައި އުޅުމާ އެކި މުބާރާތްތަކަށް އެކި ސްޕޮޓުތަކަށް ދަތުރުކުރަން ޖެހުމަކީވެސް ބައެއް ފަހަރު މަދުވާ ސަބަބެއް ކަމަށް ނިޒާމް ފާހަގަކުރިއެވެ.
""މިއަހަރު އަޅުގަނޑުމެން ވިސްނުންހުރީ ޖޫނިޔާސް ނަންބަރ ދަށްވާތީ އެއީ ދަށްވުމެއް، ވުމެންސް ކެޓަގަރީގައި މިހާރަށްވުރެން ބޮޑަށް މަސައްކަތް ކުރެވިއްޖިޔާ އެތުލީޓުން އަދަދު އިތުރުކުރެވޭނެ"ހުސެއިން ނިޒާމް - ބޮޑީބޯޑިން އެސޯސިއޭޝަންގެ ރައީސް
އަންނަ އަހަރު ކަލަންޑަރު ތައްޔާރުކުރެވިގެންދާއިރު މި ދެބަޔަށް ހާއްސަ އިސްކަމެއް ދީގެން މަސައްކަތްތަކެއް ކުރިޔަށްގެންދާނެ ކަމަށް ނިޒާމް ފާހަގަކުރެއްވިއެވެ.
މި އަހަރުގެ ގައުމީ ބޮޑީބޯޑިން ލީގުގައި ހިމެނޭ ފަހު މުބާރާތް އަދި އަހަރުގެ ބޮޑީބޯޑިންގެވެސް އެންމެ ފަހު އިވެންޓް އޮންނާނީ މި މަހުގެ 12 އިން 16 އަށް މާލޭގެ ވަރުނުލާ ރާޅުގަނޑު ސަރަހައްދުގައެވެ.