ދިވެހި ރާއްޖެއަކީ ވަރަށްވެސް ހިތްގައިމު، ރީތި ރަށްތަކެއްގެ މައްޗަށް އެކުލެވިގެންވާ ޤައުމެކެވެ. ދުނިޔޭގެ އެންމެ ރީތި މަންޒިލްތަކުގެ ތެރޭގައި މި ޤައުމުގެ ނަން، ރަން އަކުރުން ފަވާލާފައިވާ މައިގަނޑު އެއް ސަބަބަކީ މިއީއެވެ. ރާއްޖޭގެ ހުރިހާ ރަށްތަކެއްގެ ތެރެއިންވެސް އެންމެ މުހިއްމު އެއް ރަށަކީ ވެރިކަންކުރާ ރަށް، މާލެއެވެ.
މާލޭގެ މަގުތަކަށް ބަލާލުމުން މިހާރު ފާހަގަވެގެންދަނީ މަގުތަކުގެ ކަންމަތިތަކާއި، ޕާކްކޮށްފައިވާ ވެހިކަލްތަކުގެ ފުރަގަހާއި، އަދި ހުސް ބިންތަކަށް އަޅާފައިވާ ހުސްފުޅިތަކާއި ދަޅުތަކެވެ. އަދި، އުކާލާފައި އޮންނަ ކުނި ކޮތަޅުތަކެވެ. އަދި، މިފަދަ ކުނި ކޮތަޅުތަކުން ދުވާ ވަހެވެ. މިއީ، ހަމަ މި ރީތި ދިވެހިރާއްޖޭގެ ވެރިކަންކުރާ ރަށުގެ މަގުތައް ބާވައޭ ސުވާލު ކޮށްލަން ޖެހޭ މިންވަރަށް މި މައްސަލަ މިވަނީ ބޮޑުވެފައެވެ.
މި މަގުތަކަކީ ހަމަ އެންމެންވެސް ބޭނުންކުރަން އޮތް މަގުތަކެވެ. އަދި، މި މަގުތަކުގެ ސާފު ތާހިރުކަމާއި ރީތިކަން ދެމެހެއްޓުމަކީ ހަމަ ކޮންމެ ރައްޔިތެއްގެ ކޮނޑުގައިވެސް އެޅިފައިއޮތް ޒިންމާއެކެވެ.
މަގުމައްޗަށް ކުނި އެޅުމަކީ ޢާއްމު އިޖްތިމާޢީ މިންގަނޑުތަކާއި ޚިލާފް، ވަރަށް ޒިންމާދާރުކަން ކުޑަ ޢަމަލެކެވެ. އަދި މިއީ، ޤާނޫނީ ގޮތުންވެސް މަނާ ކަމެކެވެ. މި މައްސަލަ ޙައްލުކުރައްވަން ހައުސިންގ މިނިސްޓްރީން ފިޔަވަޅުތައް އަޅުއްވަމުން ގެންދަވާއިރު، މިފަދަ ޢަމަލުތައް ހިންގާ ފަރާތްތައް ހޯއްދަވައި އެ ފަރާތްތަކާމެދު ފިޔަވަޅުއަޅުއްވާނެކަމަށް ހައުސިންގ މިނިސްޓްރީން ވިދާޅުވެއެވެ.
ގިނަ އަދަދެއްގެ ކުނި މާލޭގެ މަގުތަކުގައި ބަހައްޓާފައިވާކަން ފާހަގަކުރެވެއެވެ. މި ގޮތަށް ކުނި ގިނައިން ބަހައްޓާފައި ހުންނަނީ މީހުން ގިނައިން އުޅޭ ސަރަޙައްދުގައެވެ. ޕޭވްމަންޓްމަތީ ގަސްގަސް ބުޑުގައި ކުނި ބަހައްޓާފައިހުރެއެވެ. އަދި ގިނަ އަދަދެއްގެ ފުޅި ދަޅުފަދަ ތަކެތި މަގު މައްޗަށް އަޅާފައި ހުރެއެވެ.
މިކަންކަމަކީ މުޖުތަމަޢުގެ އެންމެން ކުރާ ކަމެއް ނޫނެވެ. އަދި އެކަމާ މީހުން ވަރަށް ނުރުހޭކަން ޢާންމު ބައެއް ފަރާތްތަކުގެ ވާހަކަތަކުން އެނގެއެވެ. އަދި ރޯދަމަހަކީ ކުނި ގިނަ އިން އުފެދޭ މަހެކެވެ. އެހެންކަމުން އެންމެ ވެސް މަގުތައް ރީތިކޮށް ބޭއްވުމަށް އިސްކަމެއް ދޭން ޖެހެއެވެ.