ދިވެހި ސަރުކާރަށް ނޭނގި އަފްޣާނިސްތާނުގެ މަންދޫބަކާ ބައްދަލުކުރުމުން ފިޔަވަޅު އަޅައިފި
-
އަފްޣާނިސްތާނުގައި ވެރިކަން ކުރަމުންދާ ޠާލިބާނުންގެ ސަރުކާރު ދުނިޔޭގެ ޤައުމުތަކުން ބަލައި ނުގަނޭ
ރާއްޖެއިން ޕާކިސްތާނަށް ކަނޑައަޅުއްވާފައި ހުންނަވާ ސަފީރު އަފްޣާނިސްތާނު ސަރުކާރުގެ އޮފިޝަލުންނާއި ބައްދަލުކުރީ، ހުއްދަ ނެގުމަކާއި ނުލާ ކަމަށް ޚަރިޖީ ވުޒާރާއިން ވިދާޅުވެއްޖެއެވެ.
މިކަމާގުޅިގެން ދިވެހި ޚާރިޖީ ވުޒާރައިން ނެރުއްވި ބަޔާނުގައި ވިދާޅުވީ، އަފްޣާނިސްތާނުގެ ސަރުކާރުގެ މަންދޫބަކާއި ދިވެހި ހައިކޮމިޝަނަރު ބައްދަލުކުރައްވާފައިވަނީ ދިވެހި ސަރުކާރަށް ނޭނގި ކަމަށެވެ. އަދި އެއީ ސަރުކާރަށް އެންގުމަކާ ނުލައި ބޭއްވި ބައްދަލުވުމެއްކަމުން އެކަމާ ގުޅޭގޮތުން އަޅަން ޖެހޭ ފިޔަވަޅު މިހާރު އަޅާފައިވާ ކަމަށެވެ.
ދިވެހިރާއްޖެއިން ޤައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އ.ދ. އިން ކަނޑައަޅާފައިވާ މިންގަޑުތަކާއި އުޞޫލުތަކަށް ކަމަށް ދިވެހި ޚަރިޖީއްޔާއިން ވިދާޅުވެއެވެ.
މި އުޞޫލުތަކާއި އެއްގޮތްވާ ގޮތުގެ މަތީން، އ.ދ. ގައި އަފްޣާނިސްތާނު ތަމްސީލުކުރާ ފަރާތަކީ އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމުގައި ދިވެހި ޚަރިޖީއްޔާއިން ނެރުއްވި ބަޔާނުގައި ވެއެވެ.
އަފްޣާނިސްތާނުގައި މިހާރު ވެރިކަން ކުރަމުންދަނީ އެ ޠާލިބާނުންނެވެ. ޠާލިބާނުންގެ ސަރުކާރަކީ ޤައުމުތަކުން މިހާތަނަށް ބަލައިގަނެފައިވާ ސަރުކާރެއް ނޫނެވެ.