އަމިއްލަ އިންޝުއަރެންސް ނުލިބޭ ހުރިހާ ހާލަތެއްގައި އާސަންދަ މެދުނުކެނޑި ލިބޭނެ: އެންސްޕާ

އަމިއްލަ އިންޝުއަރެންސް ނުލިބޭ ހުރިހާ ހާލަތެއްގައި އާސަންދަ މެދުނުކެނޑި ލިބޭނެކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ވިދާޅުވެއްޖެއެވެ.

އެންސްޕާއިން މިހެން ވިދާޅުވެފައިމިވަނީ، އަމިއްލަ އިންޝުއަރެންސް ސްކީމްތަކަށް އިސްކަންދޭގޮތަށް، އާސަންދަ އައުޓްޕޭޝަންޓް ޚިދުމަތަށް ގެނައި ބަދަލާއި ގުޅޭގޮތުން ބައެއް ފަރާތްތަކުން ސައްޙަ ނޫން މައުލޫމާތު ފަތުރަމުން ދިއުމާ ގުޅިގެންނެވެ.

މީސްމީޑިއާގައި ބައެއް ފަރާތްތަކުންވަނީ އަމިއްލަ އިންޝުއަރެންސް ސްކީމަށް އިސްކަން ދޭ ފެށުމުން، އާސަންދަ ނުލިބި ރައްޔިތުން ބޮޑެތި އަދަދުން ޑޮކްޓަރަށް ދައްކަން ފައިސާ ދައްކަންޖެހިފައިވާ ކަމަށް ބުނެފައެވެ.

މިކަމާއި ގުޅިގެން އެންސްޕާއިން ވިދާޅުވީ، އަމިއްލަ އިންޝުއަރެންސް ކަވަރޭޖް ނުވަތަ ޚިދުމަތް ނުލިބޭ ހާލަތެއްގައި އާސަންދަ މެދުވެރިކޮށް ބޭސްފަރުވާގެ ޚިދުމަތް ލިބޭނެކަމަށެވެ. މީގެ އިތުރުން އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމެންޓް ހުއްޓާލައި، އިންޝުއަރެންސް ޕޮލިސީން ކަވަރޭޖް ނުލިބި އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ޚިދުމަތް ކުރިއެކޭ އެއްގޮތަށް ލިބޭނެ ކަމަށެވެ.

ކޭޝްލެސް ޕޭމެންޓް ނިޒަމާކީ، ސިއްޙީ ޚިދުމަތް ދޭ ފަރާތްތަކުން ދޭ ޚިދުމަތަށް ފައިސާ ވަގުތުން ދައްކަން ނުޖެހި އެމުޢަމަލާތް ސީދާ ހޮސްޕިޓަލާއި އިންޝުއަރެންސް ކުންފުންޏާ ދެމެދު ކުރެވޭ ނިޒާމެކެވެ. އެ ނިޒާމު ހުއްޓާލުމުން އެފައިސާ ދެއްކުމާއި އަނބުރާ ހޯދުމުގެ މަސައްކަތް ކުރަން ޖެހޭނީ ޚިދުމަތް ހޯދާ ފަރާތުންނެވެ.

އެންސްޕާއިން ވަނީ މި ދަނޑިވަޅުގައި ކަމުގެ ހަޤީޤަތް އޮޅޭގޮތަށް މައުލޫމާތު ފަތުރަމުންދާތީ، އެކަމާއި ކަންބޮޑުވުން ފާޅުކުރައްވާފައެވެ. އަދި މިކަމުގެ ސައްޙަ މައުލޫމާތު ރައްޔިތުން ސާފުކުރުމަށް އެންސްޕާއިން ވަނީ އިލްތިމާސްކުރައްވާފައެވެ.

މިމަހުގެ އެއްވަނަ ދުވަހުން ފެށިގެން އާސަންދަ ސްކީމަށް ގެންނަ ބަދަލުތައް އެކުންފުނިންވަނީ އިއުލާންކޮށްފައެވެ. އޭގެ ތެރޭގައި، ހިމެނެނީ މައިގަނޑު 6 ބަދަލެކެވެ.

އާސަންދައިގެ ދަށުން ގެންނަން ނިންމި ބަދަލުތައް

* ޞިއްޙީ ޚިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއްނަމަ، ޚިދުމަތުގެ މެމޯ ތައްޔާރުކުރުމުގެ ކުރިން، އެކަން ކަށަވަރުކޮށް އެ އިންޝުއަރެންސްގެ ކަވަރޭޖް ލިމިޓް ހަމަވަންދެން އެ އިންޝުއަރެންސް މެދުވެރިކޮށް ޚިދުމަތް ފޯރުކޮށްދިނުން

* ހޯދަން އެދޭ ޚިދުމަތަކީ އަމިއްލަ އިންޝުއަރެންސުން ކަވަރކުރާ ޚިދުމަތެއްނަމަ، އެ އިންޝުއަރެންސް މެދުވެރިކޮށް ޚިދުމަތް ފޯރުކޮށްދިނުން (އެންމެހައި ޚިދުމަތްތަކާއި ބޭސްސިޓީ ހިމެނޭގޮތަށް)

* މިހާރު ޢަމަލުކުރަމުންދާ އުޞޫލާ އެއްގޮތަށް، އައުޓް ޕޭޝަންޓް ޚިދުމަތްތަކަށް އަމިއްލަ އިންޝުއަރެންސާއެކު އާސަންދައަށް ބިލްނުކުރުން

* އަމިއްލަ އިންޝުއަރެންސްގެ ދަށުން ނުލިބޭ ޚިދުމަތެއް، އާސަންދައިން ލިބޭނަމަ، އެ ޚިދުމަތެއް އާސަންދައިގެ ދަށުން ފޯރުކޮށްދިނުން

* އަމިއްލަ އިންޝުއަރެންސްގެ ކަވަރޭޖް ލިމިޓް ހަމަވެފައިވާނަމަ އަދި އާސަންދައިން އެ ޚިދުމަތެއް ލިބޭނަމަ، އެ ޚިދުމަތެއް އާސަންދައިގެ ދަށުން ފޯރުކޮށްދިނުން

* އަމިއްލަ އިންޝުއަރެންސެއް އޮންނަ ފަރާތްތަކުން ހޯދާ ޚިދުމަތާއި ގުޅޭ ކަވަރޭޖް ލިމިޓް ހުސްނުވާނަމަ، ޚިދުމަތް ފޯރުކޮށްދިނުމުގައި އާސަންދަ ޕޯޓަލް ބޭނުންކުރުމާއި ބޭސް ސިޓީ ލިޔުމަށް ވިނަވި ޕޯޓަލް ބޭނުން ނުކުރުން

މީގެ އިތުރުން، ޕްރައިވެޓް އިންޝުއަރެންސްގެ ތެރޭގައި މޯލްޑިވްސް ޕޮލިސް ސަރވިސަސްއިން އާއި މޯލްޑިވްސް ޑިފެންސް ފޯރސްއިން ހިންގާ ސްކީމްތައް ނުހިމެނޭނެކަމަށް އާސަންދަ ކުންފުނިން ވިދާޅުވެއެވެ. އަދި އެނދުމަތިކޮށްގެން ދެވޭ ފަރުވާގެ ބިލްތަކަށް ކުރިއެކޭ އެއްގޮތަށް އާސަންދަ ސްކީމުން ޚިދުމަތް ދިނުމަށްވެސް އާސަންދަ ކުންފުނިން ވަނީ އަންގާފައެވެ.

މި ބަދަލާއި ގުޅޭގޮތުން މަޢުލޫމާތު ބޭނުންވާ ފަރާތްތަކަށް އާސަންދަ ކޯލް ސެންޓަރު ނަންބަރު 1400އަށް ގުޅުއްވައިގެން އެމައުލޫމާތު ސާފުކުރެވޭނެއެވެ. އަދި ޚިދުމަތް ދިނުމުގައި މި އެންގުމާ ޚިލާފަށް ޢަމަލުކުރާނަމަ އާސަންދައަށް ޝަކުވާ ހުށައެޅުމަށްވެސް އެކުންފުނިން އެދިވަޑައިގެންފައި.