ރާއްޖޭގެ އިޤްތިޞާދީ އިޞްލާހީ ފިޔަވަޅުތަކަށް ދުނިޔޭގެ ވިޔަފާރި ޖަމްޢިއްޔާގެ ތަޢުރީފް
-
އިޞްލާހީ ފިޔަވަޅުތަކަށް ދުނިޔޭގެ ގިނަ ޤައުމުތަކުން ތަޢުރީފްކުރި
-
ސެޝަން ކުރިއަށްދިޔައީ މިމަހުގެ 23 އިން 25 އަށް ޖެނީވާގައި
ރާއްޖޭގެ އިޤްތިޞާދު ހަރުދަނާކުރުމަށް ސަރުކާރުން ފަށްޓަވަފައިވާ އިޞްލާހީ މަސައްކަތްތަކަށާއި، އިޤްތިޞާދު ސިންދަފާތުކުރުމަށް ކުރައްވަމުންގެންދަވާ މަސައްކަތްތަކަށް ވޯލްޑް ޓްރޭޑް އޮގަނައިޒޭޝަން، ޑަބްލިއުޓީއޯއިން ތައުރީފުކޮށްފިއެވެ. ޑަބްލިއުޓީއޯއިން މިކަމަށް ތައުރީފުކޮށްފައިވަނީ 4 ވަނަ ވޯލްޑް ޓްރޭޑް އޮގަނައިޒޭޝަންގެ ޓްރޭޑް ޕޮލިސީ ރިވިއު ސެޝަންގެ ތެރެއިންނެވެ.
ދުނިޔޭގެ ވިޔަފާރި ޖަމްޢިއްޔާ، ޑަބްލިޔުޑީއެމްގެ ޓްރޭޑް ޕޮލިސީ ރިވިއު ސެޝަން ކުރިއަށްގޮސްފައިވަނީ މިމަހުގެ 23 އިން 25 އަށް ސްވިޓްޒަލޭންޑުގެ ޖެނީވާގައެވެ. މި ސެޝަންގައި ރާއްޖެއިން ގެންގުޅޭ ވިޔަފާރީގެ ސިޔާސަތުތަކަށް ދުނިޔޭގެ ބޮޑެތި ބައެއް ޤައުމުތަކުންވެސް ވަނީ ތައުރީފްކޮށްފައެވެ. ވަކިން ޚާއްސަކޮށް ރާއްޖޭގެ އިޤްތިޞާދު ސިންދަފާތުކުރުމަށް ކުރަމުންދާ މަސައްކަތްތަކާއި އިސްލާހީ މަސައްކަތްތަކަށް މެންބަރު ޤައުމުތަކުން ވަނީ ތައުރީފްކޮށްފައެވެ. އަދި މިކަންކަމަކީ ރާއްޖޭގައި އިޤްތިޞާދީ ވިލުންވެރިކަން އިތުރުވެ، ރާއްޖޭގެ ތަރައްޤީއަށް އެހީތެރިވެދޭނެކަމަށް ވަނީ ބުނެފައެވެ.
މި ސެޝަންގައި އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ ފަރާތުން ބައިވެރިވެވަޑައިގެންނެވި ޓީމުން ވަނީ މެންބަރު ޤައުމުތަކުގެ ސުވާލުތަކަށް ޖަވާބުދީފައެވެ. އެ ވުޒާރާގެ ޓީމުން ވިދާޅުވީ، މި ސެޝަންގައި ބައިލޭޓްރަލް ޓްރޭޑިންގ ޕާޓްނަރުންނާއި، ބައިނަލްއަޤްވާމީ އޮގަނައިޒޭޝަނުން ރާއްޖެއަށް ތައުރީފުކޮށްފައިވާކަމަށެވެ.
ރާއްޖޭގެ މާލީ އަދި އިޤްތިޞާދީ ޙާލަތު ރަނގަޅުކުރުމަށް ސަރުކާރުން ދަނީ ގިނަ ފިޔަވަޅުތަކެއް އަޅުއްވަމުންނެވެ. އެގޮތުން ސަރުކާރުން ނިންމެވި އެންމެ މުހިންމު އެއް ނިންމެވުމަކީ، ކުރީ ސަރުކާރުގައި ފެށި ފައިސާ ޗާޕްކުރުން ހުއްޓާލުމެވެ. މީގެ އިތުރުން ދައުލަތުން ޚަރަދުތައް ކުޑަކޮށް ސަރުކާރުން ދައްކަން ޖެހޭ ދަރަނިތައް ދައްކައި، ބޮޑެތި އަދަދުތަކުން ހާލަތާއި ނުބައްދަލު ބަދަލު ދިނުމުގެ ސަޤާފަތް ނިމުމަކަށް ގެންނެވުން ހިމެނެއެވެ. އަދި ބޭރު ފައިސާގެ ދަތިކަން ހައްލުކުރެއްވުމަށް ޑޮލަރު މާރުކުރުމުގެ ޤަވާއިދަށް އިޞްލާހު ގެނައުންވެސް ފާހަގަކޮށްލެވެ.
ފައިސާ ޗާޕުކުރުން ހުއްޓާލައި ރާއްޖޭގެ މާލީ ދާއިރާ ހަރުދަނާކުރުމަށްޓަކައި ސަރުކާރުން ކުރަމުންދާ މަސައްކަތްތަކަށް އިންޓަރނޭޝަނަލް މަނިޓަރީ ފަންޑު، އައިއެމްއެފާއި، ވޯލްޑް ބޭންކު ފަދަ ބައިނަލްއަޤްވާމީ މާލީ އިދާރާތަކުންވެސް ވަނީ ތަޢުރީފްކޮށްފައެވެ.