އެކްސްޕެޓް ސިސްޓަމް ހެދި ކުންފުންޏަށް ބަދަލުދޭން ލަފާދެއްވީ ކުރީ ސަރުކާރުގެ ބަންޑާރަނައިބު: ދާޚިލީ ވަޒީރު

ރާއްޖެއަށް ބިދޭސީން ގެނައުމުގެ ޚިދުމަތްފޯރުކޮށްދޭ އެކްސްޕެޓް ސިސްޓަމް ހެދި މޭލޭޝިއާގެ ބެސްޓިނެޓް ކުންފުންޏަށް ބަދަލުދޭން ލަފާ ދެއްވީ ކުރީ ސަރުކާރުގެ ބަންޑާރަނައިބު ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގަައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. އެގޮތުން، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ ބެސްޓިނެޓް ކުންފުނިން ދައުވާ ނުކުރާކަމެއްގައި މިސަރުކާރުން ދިގު މުއްދަތެއްގައި 6.9 މިލިޔަން ރުފިޔާގެ ބަދަލެއް ދޭގޮތަށް އެކްސްޕެޓް ސިސްޓަމް ހެދުމަށް ހަވާލުކުރުމާ ގުޅޭގޮތުން ސުވާލުކުރައްވާފައެވެ.

"އެކްސްޕެޓް އޮންލައިން ސިސްޓަމް" ޤާއިމުކޮށް ޚިދުމަތްދިނުމަށް މެލޭޝިއާގެ ކުންފުންޏާއެކު ދިވެހި ސަރުކާރުން ވެފައިވާ އެއްބަސްވުމާއި އެއްގޮތަށް ނިމިދިޔަ ސަރުކާރުން އަމަލުކޮށްފައި ނުވާތީ އެކުންފުނިން 13.7 މިލިއަން ޑޮލަރުގެ ބަދަލެއް ހޯދުމަށް އެދިފައިވާކަމަށް މީގެކުރިން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވަނީ ވިދާޅުވެފައެވެ. އެކަމާ ގުޅޭގޮތުން ރައްޔިތުންގެ މަޖިލީހުގައި ދާޚިލީ ސަލާމަތާބެހޭ ވަޒީރު ޢަލީ އިޙްސާން ވިދާޅުވީ އެކަމާ ގުޅިގެން އެ ކުންފުނިން ކުރީގެ ސަރުކާރާއެކު 8 ސިޓީ ބަދަލުކޮށްފައިވާކަން ބެލިބެލުމުން ފެންނަން އެބައޮތްކަމަށެވެ.

އެކުންފުނީގެ ލޯފާމުތަކުން ދިވެހި ދައުލަތަށް މާލީ ބަދަލު ހޯދުމަށް ދަޢުވާކުރާނެކަމަށް ހަތަރު ފަހަރު ފޮނުވާފައިވާކަމަށާއި، ކުރީ ސަރުކާރުގެ ބަންޑާރަނައިބު، އެ ކުންފުންޏަށް ބަދަލު ދިނުމުގެ މަރުހަލާ ފެއްޓެވުމަށް ލަފާ ދެއްވާފައިވާ ކަމަށްވެސް ވަޒީރު ވިދާޅުވިއެވެ. އަދި މިކަމުގައި ބަދަލުދިނުމުގެ މަރުހަލާއަކަށް ދާންޖެހިދާނެ ކަމަށާއި، އެކަމަށް އަމަލުކުރުމަށް އިމިގްރޭޝަނާއި އިކޮނޮމިކް މިނިސްޓްރީއަށް ރައީސް އޮފީހުން ފޮނުވާފައިވާ ސިޓީއެއްވެސް އޮތްކަމަށް ވަޒީރު ވިދާޅުވިއެވެ.

"ވަރަށް ބޮޑަށް އޮޅިވަޑައިގަތުމެއް މިއީ. މިއީކީ އެއްވެސް ހާލެއްގައި ހަމަތާކު ކުންފުންޏެއް އޮއްވައި އަޅުގަނޑުމެން އެ ކުންފުނި ހޯދައިގެން މިކަން ކުރީކީނޫން. ދައުލަތުގެ މައްޗަށް އަޅުގަނޑުމެންނަށް އޮބިނޯންނާނަވަރުގެ، އެމީހުން އިމީޑިއޭޓްލީ ކްލެއިމްކޮށްފައި މިވަނީ 15 މިލިޔަން ޑޮލަރަށް. އަދި އެއަށްފަހުގައި އޭރުގެ އެ ކޮންޓްރެޓުގެ މުއްދަތުގެ ބާކީއަށް އޮތް އެމީހުންނަށް ގެއްލުންވާ އަދަދަށް ކްލެއިމް ކުރާނެކަމަށް ލީގަލް ޑޮކިއުމަންޓޭޝަން އޮވެފައި އޭރުގެ އެޓަރނީ ޖެނެރަލްގެ ލަފާފުޅެއްވެސް އޮވެގެން އަޅުގަނޑުމެން އަމަލުކުރި ގޮތެއް،" ވަޒީރު އިޙްސާން ވިދާޅުވިއެވެ.

ވަޒީރު ވިދާޅުވީ މެލޭޝިއާގެ ބެސްޓިނެޓާއެކު މިސަރުކާރުން މިހާރު ހަދާފައިވާ އެއްބަސްވުމުގެ ދަށުން ދައުލަތަށް 900 މިލިޔަން ރުފިޔާ ވަންނާނެ ކަމަށެވެ. ކުރިން އެކްސްޕެޓް ސިސްޓަމުން ދައުލަތުން ވަންނަމުން އައީ 600 މިލިޔަން ރުފިޔާއެވެ.

ބެސްޓިނެޓުން ބަލަހައްޓަމުންދިޔަ "އެކްސްޕެޓް އޮންލައިން ސިސްޓަމަކީ" ބަންގްލަދޭޝުން ރާއްޖެ އަންނަ މަސައްކަތްތެރިންގެ މެޑިކަލް އަދި އެނޫންވެސް ޚިދުމަތްތައް ފޯރުކޮށްދިނުމުގެ މަސައްކަތާގުޅޭ ނިޒާމެކެވެ. ނަމަވެސް 2019 ވަނަ އަހަރު، ބަންގްލަދޭޝުން ބިދޭސީން ރާއްޖެއަށް ގެނައުން ނިމިދިޔަ ސަރުކާރުން މެދުކަނޑާލީ އެ ޚިދުމަތްދެމުން ދިޔަ ކުންފުންޏާއި ވާހަކަދެކެވިގެން ނޫންކަން އިޙްސާން މީގެ ކުރިން ވަނީ ފާހަގަކުރައްވާފައެވެ. އެހެންކަމުން އެކުންފުންޏަށް ލިބުނު ގެއްލުމުގެ ބަދަލު ހޯދުމަށް 2022 ވަނަ އަހަރުގެ ތެރޭގައި އެކުންފުނިން ސަރުކާރަށް އަންގާފައިވާކަމަށް ދާޚިލީ ސަލާމަތާ ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވިއެވެ.