އަދުލުގެ ނިޒާމުގެ މަންފާ ފޯރުކޮށްދެވޭނީ އިންސާނީ އަދި އުމްރާނީ ވަސީލަތްތައް އެއް ހަމަޔަކުން ލިބިގެން: ހައިކޯޓުގެ އިސް ފަނޑިޔާރު

ދައުލަތުގެ އަދުލުގެ ނިޒާމުގެ ސިޔާސަތުގެ މަންފާ ރައްޔިތުންނަށް ހަމަޔަށް ފޯރުކޮށްދެވޭނީ އިންސާނީ އަދި އުމްރާނީ ވަސީލަތްތައް އެއް ހަމަޔަކުން ދައުލަތުގެ ހުރިހާ ބާރުތަކަށް ލިބިގެންކަމަށް ހައި ކޯޓުގެ އިސްފަނޑިޔާރު ހުސެއިން ޝަހީދު ވިދާޅުވެއްޖެއެވެ. ޝަހީދު މިފަދައިން ވިދާޅުވީ ހައިކޯޓުގެ "އިސްތިރާޖީ ޢަމަލީ ތަދުބީރު 2025-2027" އިފުތިތާޙުކުރުމަށް ބޭއްވި ހަފްލާގައި ވާހަކަ ދައްކަވަމުންނެވެ.

ހައިކޯޓުގެ އިސްތިރާޖީ ޢަމަލީ ތަދުބީރު 2025-2027 އިފުތިތާޙުކުރުމަށް ބޭއްވި ހަފްލާގައި ވާހަކަ ދައްކަވަމުން ހައި ކޯޓުގެ އިސްފަނޑިޔާރު ހުސެއިން ޝަހީދު ވިދާޅުވީ 44 އަހަރުގެ ދިގު މާޒީގައި އިސްތިއުނާފީ ކޯޓެއްގެ ގޮތުގައި ކޯޓު އޮވެ އިދާރީ ހިންގުމާއި ޝަރީއަތް ކުރުމާއި އެފަދަ އެންމެހާ ކަންތައްތައް ކުރިއަރުވާ ތަރައްޤީވެގެންދިޔައީ އެވަގުތަށް ރޭވިފައިހުރި އަދި އުސޫލުތައް ހަރުދަނާ ކުރުމަށް އެޅުނު ފިޔަވަޅުތަކުގެ ސަބަބުން ކަމަށެވެ.

ޝަރުއީ ނިޒާމާމެދު ރައްޔިތުންގެ ހިތުގައި ޖަހާ ވިންދާއި އުންމީދު ކުރާ ތަސައްވުރާ ކަމުގެ ހަޤީޤަތް ތަފާތުކަމަށްވެސް އިސްފަނޑިޔާރު ވިދާޅުވިއެވެ.

ރައްޔިތުން އެދެނީ އިންތިޒާމު ފުރިހަމަ ޝަރީއަތުގެ މަރުހަލާ ހަލުވި ޒަމާނީ ޓެކްނޮލޮޖީއާ އަހުލުވެރި ފަސޭހަ މަގުން އަދުލަށް ވާސިލްވެވޭނެ ދޮރެއް ކަމަށާއި އެ އުންމީދު ހުވަފެނުގައި ކުލަޖައްސައިދިނުމުގެ ޒިންމާ އެޅިފައި އޮތީ ހައިކޯޓުގެ ކިބައިގައި ކަމަށް ޝަހީދު ވިދާޅުވިއެވެ.

އެ މަގަށް ކޯޓު ބައްޓަން ކުރުމަށް ހައިކޯޓުގެ އިސްތިރާޖީ ޢަމަލީ ތަދުބީރު 2025-2027 އިފުތިތާޙުކޮށްފައިވާއިރު ހައިކޯޓު ހަރުދަނާ ކުރުމަށް މައިގަނޑު ތިންކަމެއް ވަނީ ކަނޑައަޅާފައެވެ.

އެގޮތުން ނަތީޖާ ނެރެވޭނެ ކޭސް މެނޭޖްމަންޓް ސިސްޓަމަކާއި، ޚިދުމަތްތައް ފަހި ސަޤާފަތަކާއެކު އަދުލު އިންސާފުގެ ނިޒާމަށް އިތުބާރު އުފެއްދުމާއި ދާއިރާގެ ބައިވެރިންނާއެކު ޤާއިމުކުރެވޭ ގުޅުންތަކުގެ ތެރެއިން ނިޒާމުތައް ޒަމާނީ ކުރުމެވެ. އަދި ކަރުދާސް ބޭނުންނުކުރާ މަހައުލެއް އުފެއްދުމަށް އީ- ހައި ކޯޓެއް ޤާއިމުކުރުމުގެ އިތުރުން ޤާބިލް ޓީމެއް ޤާއިމުކުރުމާއެކު އުފެއްދުންތެރި މަސައްކަތުގެ މާހައުލެއް ތަރައްޤީކުރުން ކަމަށް އިސްފަނޑިޔާރު ވިދާޅުވިއެވެ.

ކޯޓުގެ އިދާރީ އޮނިގަނޑު ޒަމާނާ ގުޅޭ އޮނިގަނޑަކަށް ހެދުމުގެ މަސައްކަތް ފަށާފައިވާ ކަމަށާއި އައު އޮނިގަނޑު ތައްޔާރުކޮށް ފާސްކުރުމަށް ކަމާބެހޭ އިދާރާއަށް ފޮނުވާފައިވާ ކަމަށްވެސް އިސްފަނޑިޔާރު ހުސެއިން ޝަހީދު ވިދާޅުވިއެވެ.

ޤާނޫނަށް ގެންނަން ބަދަލުތަކުގެ ސަބަބުންވެސް ބައެއް ފަހަރު މަސައްކަތުގައި ގޮންޖެހުންތައް ދިމާވާކަން ފާހަގަކުރައްވާ އިސްފަނޑިޔާރު ޝަހީދު ވިދާޅުވީ ބައެއް ޤާނޫނުތަކުން ކޯޓުތަކުގެ މައްޗަށް ނިންމުންތައް ނިންމުމަށް ލާޒިމްކުރާއިރު، ޤާނޫނުތައް ފަރުމާ ކުރައްވާއިރު ކޯޓުތަކުގެ ޚިޔާލާއި މަޝްވަރާ ހޯއްދެއްވުން ރަނގަޅު ކަމަށެވެ. އަދި ބަޖެޓުގެ ދަތިކަމާއި އިދާރީ ހިންގުމުގައި ހުރި ދަތިތައް އިސްފަނޑިޔާރު ވަނީ ފާހަގަކުރައްވާފައެވެ.

ހައި ކޯޓަކީ ރާއްޖޭގެ 20 އަތޮޅުގައި ޤާއިމުކޮށްފައިވާ 187 މެޖިސްޓްރޭޓް ކޯޓާއި މާލޭގައި ޤާއިމުކޮށްފައިވާ 5 ސުޕިރިއަރ ކޯޓާއި ޓްރައިބިއުނަލްތަކުން ނިންމާ ހުރިހާ ބާވަތެއްގެ މައްސަލަތައް ފުރަތަމަ މަރުހަލާގައި އިސްތިއުނާފް ކުރެވޭ ހަމައެކަނި ކޯޓެވެ.