"ކްރިއޭޓިވިޓީ އިން އެޑިޔުކޭޝަން" ސަމިޓަށް ވަޒީރު މާރިޔާ ކުރެއްވި ދަތުރުފުޅު ނިންމާލައިފި

ތަޢުލީމީ ދާއިރާގައި އުފެއްދުންތެރިކަން އިތުރުކުރުމާބެހޭ "ކްރިއޭޓިވިޓީ އިން އެޑިޔުކޭޝަން" ސަމިޓގައި ބައިވެރިވެވަޑައިގަތުމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ.މަރިޔަމް މާރިޔާ ފަރަންސޭސިވިލާތަށް ކުރެއްވި ދަތުރުފުޅު ނިންމަވާލައްވައިފިއެވެ.

"ކްރިއޭޓިވިޓީ އިން އެޑިޔުކޭޝަން" ސަމިޓުގައި ބައިވެރިވެވަޑައިގަތުމަށް ވަޒީރު ޑރ.މާރިޔާ ފަރަންސޭސިވިލާތަށް ފުރާވަޑައިގެންނެވީ މިމަހުގެ 15ވަނަ ދުވަހުއެވެ. ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަތީ މިއަދުއެވެ.

ޔުނެސްކޯ އަދި ގްލޯބަލް ކްރިއޭޓިވް ތިންކިންގ އިންސްޓިޓިއުޓުން އިންތިޒާމުކޮށްގެން "ކްރިއޭޓިވިޓީ އިން އެޑިޔުކޭޝަން" ސަމިޓު ބާއްވާފައިވަނީ މިމަހުގެ 17އިން 18އަށް ފަރަންސޭސިވިލާތުގެ ވެރިރަށް ޕެރިހުގައެވެ. މި ސަމިޓުގައި ދުނިޔޭގެ އެކި ކަންކޮޅުތަކުން ޢިލްމީ ދާއިރާގެ ތަޖުރިބާކާރުންނާއި މި ތަޢުލީމީ ދާއިރާގައި މަސައްކަތްކުރާ މީހުން ބައިވެރިވެފައިވެއެވެ. މި ސަމިޓުގައި ތަޢުލީމީ ދާއިރާގައި އުފެއްދުންތެރިކަން އިތުރުކުރުމާ ގުޅޭގޮތުން މަޝްވަރާކޮށް މަޢުލޫމާތު ޙިއްސާކުރުމުގެ ސެޝަންތައް ބާއްވާފައިވެއެވެ.

ސަމިޓުގައި ބައިވެރިވެވަޑައިގަތުމަށްފަހު ވަޒީރު މާރިޔާ ވަނީ ޔުނެސްކޯގެ އިންސްޓިޓިއުޓް ފޮރ އިންފޮމޭޝަން ޓެކްނޮލޮޖީސް އިން އެޑިޔުކޭޝަންގެ ގަވަނިން ބޯޑުގެ ޗެއަރ އާޝާ ކަންވަރާ ބައްދަލުކުރައްވާފައެވެ. އަދި އެ އިންސްޓިޓިއުޓްގެ ޑައިރެކްޓަރ ޓައޯ ޒަންއާވެސް ވަޒީރު ބައްދަލުކުރެއްވިއެވެ. މި ބައްދަލުކުރެއްވުންތަކުގައި ދުނިޔޭގެ ތަޢުލީމީ ދާއިރާގެ ކުރިއެރުމަށް އުނގަންނައިދިނުމުގައި އުފެއްދުންތެރިކަން އަދާކުރާ ދައުރާ ބެހޭގޮތުން މަޝްވަރާކުރައްވާފައިވެއެވެ.

ފަރަންސޭސިވިލާތަށް ކުރެއްވި މި ދަތުރުފުޅުގައި ވަޒީރު ޑރ.މާރިޔާ ވަނީ ސީޝެލްސްގެ ތަޢުލީމާބެހޭ ވަޒީރު ޖަސްޓިން ވެލެންޓިންއާވެސް ބައްދަލުކުރައްވާފައިވެއެވެ. މި ބައްދަލުކުރެއްވުމުގައި ދެ ޤައުމުގެ ތަޢުލީމުދޭ މަރުކަޒުތަކުން މޫސުމީ ބަދަލުތަކާއި ދެމެހެއްޓެނިވި ތަރައްޤީއާ ގުޅޭގޮތުން ގެންގުޅޭ ސިޔާސަތުތަކާ ބެހޭގޮތުން މަޝްވަރާކުރައްވާފައެވެ.

ކްރިއޭޓިވިޓީ އިން އެޑިޔުކޭޝަން ސަމިޓުގައި ދަރިވަރުންގެ ކިބައިގައި އުފެއްދުންތެރި ވިސްނުން އަށަގަންނަވާނެ ގޮތްތަކާ ބެހޭގޮތުން މަޝްވަރާކޮށް، މި މަޢުޟޫގައި ދާއިރާގެ މާހިރުން ތަޤުރީރު ކުރައްވާފައިވެއެވެ.