ރާއްޖެއަށް މަސްތުވާތަކެތި އެތެރެކޮށް ވިޔަފާރި ކުރާ 4 މީހަކަށް 25 އަހަރުގެ ޖަލު ހުކުމެއް

ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ކުރާ 4 މީހަކު 25 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.

4 މީހުންގެ މައްޗަށް ކުށް ސާބިތުވެ، ކްރިމިނަލް ކޯޓުން އެ މީހުންގެ މައްޗަށް ހުކުމްކޮށްފައިވަނީ ބުދަ ދުވަހުއެވެ.

25 އަހަރުގެ ޖަލު ހުކުމެއް ކޮށްފައިވަނީ ގދ. ތިނަދޫ / ރަންގަލް، އުމުރުން 45 އަހަރުގެ ޙަސަން ލޫޠާއި، ހުޅުމާލެ ފްލެޓް ނަންބަރު 01-ޖީ-45 އުމުރުން 36 އަހަރުގެ ޙަސަން ރަޝީދު، ތ. ތިމަރަފުށި / ވައިޓްރޯސް، އުމުރުން 43 އަހަރުގެ އިސްމާޢީލް ޝަރީފް އަދި މއ. ހަސްލަތު، އުމުރުން 35 އަހަރު ޝާނިޔާ އިބްރާހިމްގެ މައްޗަށެވެ.

މި 4 މީހުން ޖަލަށްލާން ހުކުމްކުރުމުގެ އިތުރުން ޖޫރިމަނާކޮށްފައި ވެއެވެ. އެގޮތުން، ޙަސަން ލޫޠު ދެ މިލިޔަން ރުފިޔާއިން ޖޫރިމަނާކޮށްފައިވާއިރު ޙަސަން ރަޝީދު އެއް މިލިޔަން ރުފިޔާއިން އަދި އިސްމާޢީލް ޝަރީފާއި ޝާނިޔާ އިބްރާހިމް 500،000 ރުފިޔާ އިން ވަނީ ޖޫރިމަނާކޮށްފައެވެ.

ފުލުހުން ވިދާޅުވެފައިވާފައިވާ ގޮތުގައި މި 4 މީހުން ހައްޔަރުކޮށްފައިވަނީ ދިވެހި ރާއްޖެއަށް މަސްތުވާތަކެތި އެތެރެކޮށް، އެތަކެތި ބޭނުންކޮށް، ގެންގުޅެ އަދި ޓްރެފިކް ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން 12 ޖަނަވަރީ 2021 ވަނަ ދުވަހު ހިންގި އޮޕަރޭޝަނެއްގައެވެ.

މި މައްސަލައާ ގުޅިގެން އެމީހުންނާ ގުޅުންހުރި މާލޭގެ 4 ތަނެއް ފުލުހުން ވަނީ ބަލައިފާސްކޮށްފައެވެ. އެގޮތުން ގ. ނީ، މއ. ހަނީސަކަލް، މ، ބުރެހިމާގެ އަދި މ. ރޭއަލި ގެސްޓު ހައުސް ބަލައިފާސްކުރުމުގެ ތެރެއިން، 54 ގްރާމް ޑައިމޯފިން އާއި 266 ގްރާމް ކެނަބިސް ފެނިފައިވާކަމަށް ފުލުހުން ވިދާޅުވިއެވެ.

އޭގެ އިތުރުން އިސްމާއިލް ޝަރީފާއި ޝާނިޔާ ހުރި ގެސްޓްހައުސް ކޮޓަރިން 1.5 މިލިޔަނަށްވުރެ ގިނަ ރުފިޔާ ފެނިފައިވާ ކަމަށް ފުލުހުން ވިދާޅުވެއެވެ. މި ފައިސާއަކީ ކުށް ކޮށްގެން ހޯދާފައިވާ ފައިސާކަމަށް ކަނޑައަޅައި ދައުލަތަށް ނެގުމަށްވެސް ކްރިމިނަލް ކޯޓުން ވަނީ ހުކުމްކޮށްފައެވެ.

ކްރިމިނަލް ކޯޓުގެ ހުކުމުގައިވާގޮތުން އިސްމާޢީލް ޝަރީފާއި ޝާނިޔާއަކީ ޙަސަން ލޫޠާއި ޙަސަން ރަޝީދުގެ އިރުޝާދުގެ ދަށުން މަސްތުވާތަކެތި ވިއްކުމުގައި ހަރަކާތްތެރިވާ 2 މީހުންކަން ހެކިތަކުން ސާބިތުވާކަމަށެވެ.