އޮޕަރޭޝަން ހިރާސް ފާސް ނިންމާލައިފި، ކެމިކަލް ރައްކާކުރާ 144 ގުދަނެއް ބަލައި ފާސްކުރި

ކެމިކަލް ރައްކާކުރާ ތަންތަން ބަލައި ފާސްކުރުމަށް މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފް ފަޔަރ އެންޑް ރެސްކިޔު ސަރވިސަސްއިން ކުރިއަށްގެންދިޔަ "އޮޕަރޭޝަން ހިރާސް ފާސް" ނިންމާލައިފިއެވެ.

މި އޮޕަރޭޝަން ކުރިއަށް ގެންގޮސްފައިވަނީ މިމަހުގެ 1 އިން 15 އަށެވެ.

އެމްއެންޑީއެފުން ވިދާޅުވީ މި އޮޕަރޭޝަންގެ ދަށުން ރައްކާތެރި ނޫން ކެމިކަލް ގުދަންކުރާ 144 ތަނެއް ބަލައި ފާސްކޮށްފައިވާ ކަމަށެވެ. އަދި މީހުން ދިރިއުޅޭ 399 ޢިމާރާތާއި ކެމިކަލް ވިއްކާ 62 ފިހާރައެއްގެ މަޢުލޫމާތު އެއްކޮށްފައިވާކަމަށް އެމްއެންޑީއެފުން ވިދާޅުވިއެވެ.

މާލެ ސަރަހައްދުގައި ހުއްދަ ދީފައިވާ 285 ގުދަނެއް ހުރެއެވެ. މީގެ ތެރޭގައި ހިމެނެނީ މާލޭގައިހުރި 77 ގުދަނާއި ހުޅުމާލޭގައި ހުރި 36 ގުދަނާއި ތިލަފުށީގައިހުރި 172 ގުދަނެވެ. ހިރާސް ފާސް އޮޕަރޭޝަންގެ ދަށުން މި ތަންތަނުގައި އަލިފާން ނިއްވޭނެ ރަނގަޅު ގޮތެއް ހުރިތޯ ކަށަވަރުކޮށްފައިވާކަމަށް ޤައުމީ ދިފާޢީ ބާރުން ވިދާޅުވެއެވެ. އަދި އަލިފާން ނިއްވޭނެ ރަނގަޅު އިންތިޒާމެއް ނެތްނަމަ، އެފަދަ އިންތިޒާމެއް ޤާއިމްކުރަން އިރުޝާދު ދީފައިވާކަމަށްވެސް ވިދާޅުވެއެވެ.

މި އޮޕަރޭޝަނުގައި ފަޔަރ އެންޑް ރެސްކިޔު ސަރވިސަސްގެ އިތުރުން ދިވެހި ފުލުހުންގެ ޚިދުމަތާއި އެމްއެންޑީއެފް މާލޭ އޭރިއާ ކޮމާންޑާއި ދައުލަތުގެ 6 މުއައްސަސާއެއް ބައިވެރިވިއެވެ.

އޮޕަރޭޝަން ހިރާސް ފާސް ކުރިއަށްގެންދިޔައީ މާލެ ސަރަހައްދު 10 ޒޯނަކަށް ބަހާލައިގެންނެވެ. އެގޮތުން މާލޭގެ އެކި ސަރަހައްދުތަކުގައި ފަޔަރ އެންޑް ރެސްކިޔު ސަރވިސަސްގެ ސިފައިންނާއި ދިވެހި ފުލުހުން ހަރަކާތްތެރިވެފައިވެއެވެ.

ދިފާޢީ ވުޒާރާއިން މަޢުލޫމާތު ދެއްވާގޮތުގައި ހިރާސް ފާސް އޮޕަރޭޝަންގެ ދަށުން ކެމިކަލް ރައްކާކޮށްފައި ހުރި ގުދަންތަކާއި އޭގެ ވިޔަފާރިކުރަމުންދާ ތަންތަނުގެ ޑޭޓާބޭސްއެއް އެކުލަވާލެވޭނެއެވެ. އަދި އޭގައި ހިމެނޭ މަޢުލޫމާތުތައް ކަމާބެހޭ މުއައްސަސާތަކަށް ޙިއްސާކުރެވޭނެކަމަށް ދިފާޢީ ވުޒާރާއިން ވިދާޅުވެއެވެ. ހަމައެހެންމެ ގަވާއިދާ ޚިލާފަށް ކެމިކަލްގެ ވިޔަފާރިކުރަމުންދާ ތަންތަނާމެދު ފިޔަވަޅު އެޅޭނެކަމަށްވެސް ވުޒާރާއިން ވިދާޅުވެއެވެ.