ސިޔާސަތުތައް އެކުލަވާލާއިރު މިންތީގެ ހަމަހަމަކަމާގުޅޭ ޑޭޓާ މުހިންމު: ވަޒީރު ޑރ. ޢާއިޝަތު ޝިހާމް

ސިޔާސަތުތައް އެކުލަވާލާއިރު މިންތީގެ ހަމަހަމަކަމާ ގުޅޭގޮތުން އެއްކޮށްފައި ހުންނަ މަޢުލޫމާތު ނުވަތަ ޑޭޓާ މުހިންމުކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ވަޒީރު މިހެން ވިދާޅުވީ، މިންތީގެ ހަމަހަމަކަމާ ގުޅޭގޮތުން ބޭނުންކުރެވިދާނެ މަޢުލޫމާތު ހިމެނޭ ރިޕޯޓެއް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މިންތީގެ ހަމަހަމަކަމާ ގުޅޭގޮތުން ބޭނުންކުރެވިދާނެ މަޢުލޫމާތު ހިމެނައިގެން ތައްޔާރުކޮށްފައިވާ ޖެންޑަރ ޑޭޓާ ޔޫސް ރިޕޯޓު ނެރެދެއްވީ ރައީސުލްޖުމްހޫރިއްޔާގެ ނައިބުގެ އަނބިކަނބަލުން ޢާއިޝަތު އަފްރީން މުޙައްމަދެވެ.

މި ރަސްމިއްޔާތުގައި ވާހަކަފުޅުދައްކަވަމުން އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވީ، ދިވެހިރާއްޖޭގައި އެންމެ ފުރަތަމަ ޖިންސުގެ މަޢުލޫމާތު އެއްކޮށް ބޯހިމެނުމެއް ކުރިއަށް ގެންގޮސްފައިވަނީ 2006 ވަނަ އަހަރު ކަމަށެވެ. އަދި އޭގެ ފަހުން މަޢުލޫމާތު އެއްކުރުމުގައި ރާއްޖެއިން ގިނަ ކުރިއެރުންތަކެއް ހޯދާފައިވާ ކަމަށެވެ.

ވަޒީރު ވިދާޅުވީ، މިންތީގެ ހަމަހަމަކަމާ ގުޅޭގޮތުން ބޭނުންކުރެވިދާނެ މަޢުލޫމާތު ހިމެނޭ ރިޕޯޓެއް އެކުލަވާލުމުގެ މަސައްކަތް ކުރަމުންދާތާ 5 އަހަރަށްވުރެ ގިނަ ދުވަސްވެފައިވާ ކަމަށެވެ. އަދި މިހާރު ރިޕޯޓު އިފްތިތާޙްކުރެވުމާއެކު މުޖުތަމަޢުގެ ކުރިއެރުމަށާއި އިޖުތިމާޢީ ދުޅަހެޔޮކަން އިތުރުކުރުމަށް އެހީވެދޭނެކަމަށް ވަޒީރު ވިދާޅުވިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ވިދާޅުވީ، ތަރައްޤީގެ އެކި ސިޔާސަތުތައް އެކުލަވާލާއިރުވެސް މިންތީގެ ހަމަހަމަކަމުގެ މަޢުލޫމާތު ހިމެނޭ ރިޕޯޓެއް މުހިންމު ކަމަށެވެ. އެގޮތުން އެއްވެސް މީހަކު ބާކީވެފައިނުވައި އެންމެންވެސް ޝާމިލް މުޖުތަމަޢެއް ބިނާކުރުމަށް މިފަދަ ރިޕޯޓެއް ވަރަށް މުހިންމުކަން ވަޒީރު ފާހަގަކުރެއްވިއެވެ.

"މިފަދަ ޑޭޓާ ރިޕޯޓުތަކުގެ އެހީގައި ހަދައި ސިޔާސަތުތަކަކީ އެ ކަންކަން ތަންފީޒްވެ، ނަތީޖާ ނެރެވޭ ސިޔާސަތުތަކަކަށް ވާނެ. އަދި ހަމަހަމަ މުޖުތަމަޢެއް ޤާއިމްކުރެވޭނެ." ވަޒީރު ވިދާޅުވިއެވެ.

މިންތީގެ ހަމަހަމަކަމާ ގުޅޭގޮތުން ބޭނުންކުރެވިދާނެ މަޢުލޫމާތު ހިމެނައިގެން ތައްޔާރުކޮށްފައިވާ ޖެންޑަރ ޑޭޓާ ޔޫސް ރިޕޯޓުގެ އިތުރުން، ވެލިޑޭޝަން އޮފް ދަ ނެޝަނަލް ސްޓްރެޓެޖީ ފޮރ ދަ ޑިވަލޮޕްމެންޓް އޮފް ޖެންޑަރ ސްޓެޓިސްޓިކްސް، އެންއެސްޑީޖީއެސްގެ ނަމުގައި ސްޓްރެޓީޖިކް ޕްލޭނެއްވެސް މި ރަސްމިއްޔާތުގައި ވަނީ އިފްތިތާޙް ކޮށްފައެވެ.

މި ޕްލޭން އިފްތިތާޙްކޮށްދެއްވީ ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ހައިދަރު އަޙަމަދެވެ. މި ސްޓްރެޓީޖިކް ޕްލޭނަކީ ރާއްޖޭގައި މިންތީގެ ހަމަހަމަކަމާބެހޭ މަޢުލޫމާތު އެއްކުރުމުގެ މަސައްކަތް ތަރައްޤީކުރުމަށް ނެރެވުނު ޕްލޭނެކެވެ.