ރާއްޖެއާއި އިންޑިއާގެ ވިޔަފާރީގެ ގުޅުން ހަރުދަނާކުރުމަށް މަސައްކަތްކުރާނަން: ރައީސް

ދިވެހި ވިޔަފާރި ވެރިންނާއި އިންޑިއާގެ ވިޔަފާރިވެރިންގެ ގުޅުން އިތުރަށް ބަހިކުރުުމަށް މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އިންޑިއާއަށް ކުރައްވާ ފުރަމާނަ ދަތުރުފުޅުގެ ތެރެއިން އިންޑިއާގެ ނިއުދިއްލީގައި ދިރިއުޅޭ ދިވެހިންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ނިއުދިއްލީގެ އައިސީޓީ މޯރިއާ ހޮޓެލްގައި ދިވެހިންނާ ބައްދަލުކުރައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ރާއްޖެއާއި އިންޑިއާދެމެދު އޮންނަނީ ޒަމާންވީ ގާތް ގުޅުމެއްކަމަށާއި، މި ދަތުރުފުޅުގެ ސަބަބުން އެގުޅުން ވަރުގަދަވެގެންދާނެކަމަށް އުންމީދުކުރެވޭކަމަށެވެ. ޚާއްޞަކޮށް ދެޤައުމަށް ފައިދާހުރި ކަންކަން އިތުރަށް ފުރިހަމަވެގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އެމަނިކުފާނު ރާއްޖެއިން ބޭރަށް ކުރައްވާ ދަތުރުފުޅުތަކުގައި އެޤައުމުތަކުގައި އުޅޭ ދިވެހިންނާ ބައްދަލުކުރުމަށް ޚާއްޞަ އިސްކަމެއް ދެއްވާކަމަށާއި، އެއީ ދިވެހިންނަށް ދިމާވާ ދަތިތައް އޮޅުންފިލުވައި އެކަންކަމަށް ޙައްލުތަކެއް ގެނެސްދެއްވުމަށްކަން އެމަނިކުފާނު ފާހަގަކުރެއްވިއެވެ.

އެކި ކަންކަމުގައި ގިނަ ޢަދަދެއްގެ ދިވެހިން އިންޑިއާއަށް ދަތުރުކުރާކަމަށާއި، އޭގެތެރޭގައި ބޭސްފަރުވާއާއި، ތަޢުލީމާއި، ވިޔަފާރިކުރުންފަދަ އެކި ކަންކަމުގައި ދިވެހިން އިންޑިއާއަށް ދަތުރުކުރާތާ އެތައް ޒަމާނެއް ވެފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ދިވެހި ޚާރިޖިއްޔާގެ އެންމެ ފުރިހަމަ އެހީތެރިކަން ބޭރުގައި އުޅޭ ރައްޔިތުންނަށް ލިބޭނެގޮތަށް ކަންކަން ފުރިހަމަކުރުމަށް އެމަނިކުފާނު ގަސްތުކުރައްވާކަމަށެވެ. އަދި ސަރުކާރުގެ ސިޔާސަތު ބައްޓަންކޮށްފައިވަނީވެސް އެގޮތަށްކަމަށާއި، ދިވެހި ރައްޔިތަކު ކޮންމެ ޤައުމެއްގައި ހުރިނަމަވެސް އެރައްޔިތުންނަށް ދިވެހި ދައުލަތުގެ ފުރިހަމަ އެހީތެރިކަން ލިބޭގޮތަށް ސިޔާސަތުތައް ބައްޓަންކުރައްވާނެކަމަށް އެމަނިކުފާނު ވިދާޅުވިއެވެ.

"ކޮންމެ ގޮތެއްވިޔަސް މިތާ އުޅޭ ދިވެހިންނަށް، މިތާ ހައިކޮމިޝަންހުރީމަ ލިބެންވާނެ ފަސޭހަތަކެއް ހުންނާނެ. އަޅުގަނޑު އެދެނީ ހައިކޮމިޝަންގެ ފަރާތުން މިހާރުލިބޭ ކޮންސުލް ޚިދުމަތްތަކާއި، މިހާރު ރަނގޅުކުރަން ހުރިކަންކަން ދަންނަވަން" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައިވަނީ އިންޑިއާގެ ނިއުދިއްލީއަކީ ދިވެހި ވިޔަފާރިވެރިން ވިޔަފާރި ބޭނުމަށް ވަރަށް ގިނައިން ޒިޔާރަތްކުރާ ތަނެއްކަން ފާހަގަކުރައްވާ ދެޤައުމުގެ ވިޔަފާރިވެރިންގެ ގުޅުން އިތުރަށް ހަރުދަނާކުރުމަށް މަސައްކަތްކުރައްވާނެކަމަށް ވިދާޅުވެފައެވެ.

"ކުރިއަށް އޮތްތަނުގައި ދިވެހި އަދި އިންޑިއާގެ ވިޔަފާރިވެރިންނަށް ދެޤައުމުގެ ދޭތެރޭގައި އިންޑިއާގެ ވިޔަފާރިވެރިންނަށް އެކްސްޗޭންޖު އިތުރަށް ފުރިހަމަކުރުމަށްޓަކައި، ގިނަކުރުމަށްޓަކައި ވިޔަފާރިއަށް މިތަނަކީ މުހިންމު ހަބަކަށް ހެދުމަށް މަސައްކަތްކުރާނަން. ވިޔަފާރިވިޔަސް ޓޫރިޒަމްވިޔަސް އެނޫން ގޮތްގޮތުންވެސް މިއީ އިންޑިއާގެ ދިއްލީއަކީ އެކި ދާއިރާތަކުން ދެޤައުމުގެ ދެމެދު އޮތް ގުޅުން ބަދަހިކުރުމަށް އޮތްކަންކަން.” ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވަނީ ނިއުދިއްލީގައި ދިރިއުޅޭ ދިވެހިންނާ ވަކިވަކިން ބައްދަލުކުރައްވާ އެފަރާތްތަކަށް ބޭނުންވާނެ އެހީތެރިކަން އޮޅުންފިލުއްވާފައެވެ. އަދި ދިވެހި ޚާރިޖިއްޔާއާއި ދިއްލީގެ ކޮންސުލް މެދުވެރިކޮށް ކޮންސުލަރ ޚިދުމަތްތައް ފަސޭހަކޮށްދެއްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.