ސަލާމަތީ މަޖިލީހަށް ރައީސް ހުށަހެޅުއްވި ކަންކަން ޤައުމުތަކުން ބަލައިގަނޭ: ޑރ. ޢަލީ ނަޞީރު

އދ. ގެ ސަލާމަތީ މަޖިލީހުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ހުށަހެޅުންތައް ޤައުމުތަކުން ބަލައިގަނެފައިވާކަމަށް އދ. އަށް ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަޞީރު މުޙައްމަދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ޕީއެސްއެމުން ގެނެސްދޭ "ދިވެހީންގެ އަޑު ދުނިޔެއަށް" ކަވަރޭޖުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ އދ. ގެ ސަލާމަތީ މަޖިލީހުގައި ތަޤުރީރު ކުރެއްވީ މި މަހުގެ 25 ވަނަ ދުވަހުއެވެ. މިއީ ރާއްޖޭގެ އެންމެ އިސްވެރިޔަކު އދ.ގެ ސަލާމަތީ މަޖިލީހުގައި ތަޤުރީރު ކުރެއްވި ފުރަތަމަ ފަހަރެވެ. ރައީސުލްޖުމްހޫރިއްޔާ ވިދާޅުވީ އެމަނިކުފާނު އެ މަޖިލީހަށް ވަޑައިގެންނެވީ ދިވެހީންގެ ފަރާތުން ދޭން ބޭނުންފުޅުވާ މެސެޖުތަކެއް އެ މަޖިލީހާ ހިއްސާކުރެއްވުމަކީ މުހިންމުކަމެއްކަމަށް ދެކެވަޑައިގަންނަވާތީކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަލާމަތީ މަޖިލީހުގައި ދެއްވި ބަޔާނުގައި، ސަލާމަތީ މަޖިލީހަށް ކުރާ އިތުބާރު ކުޑަވަމުންދަނީ އެ މަޖިލީހުގައި ހަމަހަމަ ގޮތެއްގައި ޤައުމުތައް ތަމްސީލު ނުވުމުގެ އިތުރުން، ޖަވާބުދާރީކުރުވުމަށް ނުކުޅެދުމާއި، ދެފުށް ފެންނަ ގޮތަކަށް މަސައްކަތް ނުކުރާތީކަމަށް ވިދާޅުވިއެވެ. އެހެންކަމުން ސަލާމަތީ މަޖިލިސް އެކުލެވިގެންވާ ގޮތަށް ބަދަލުތައް ގެނެސް، ކުދި ޖަޒީރާ ޤައުމުތަކަށްވެސް އެ މަޖިލީހުން ގޮނޑިއެއް ޚާއްޞަކުރަންޖެހޭކަމަށް އެމަނިކުފާނު ވިދާޅުވިއެވެ.

މީގެއިތުރުން ސަލާމަތީ މަޖިލީހުގެ ދާއިމީ މެމްބަރުންނަށް ދީފައިވާ ވީޓޯކުރުމުގެ ބާރު އުވާލަންވެސް ރައީސުލްޖުމްހޫރިއްޔާ ވަނީ ގޮވާލައްވާފައެވެ.

އދ. ގައި ރައީސސުލްޖުމްހޫރިއްޔާ ދެއްވި ތަގުރީރުތަކާ ގުޅޭގޮތުން ޕީއެސްއެމް ނިއުސްގެ "ދިވެހީންގެ އަޑު ދުނިޔެއަށް" ކަވަރޭޖުގައި ވާހަކަފުޅު ދައްކަވަމުން އދ. އަށް ދިވެހިރާއްޖޭން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަޞީރު މުޙައްމަދު ވިދާޅުވީ ރައީސުލްޖުމްހޫރިއްޔާ އަކީ ޑިޕްލޮމަސީގައި ވަރަށް ހަރަކާތްތެރި ބޭފުޅެއްކަމަށާއި، އެމަނިކުފާނު ސަލާމަތީ މަޖިލީހުގައި ފާހަގަކުރެއްވި ނުކުތާތަކީ ސަލާމަތީ މަޖިލީހުގެ އިތުރުން އާންމު މަޖިލީހުގެ މެންބަރުންވެސް ބަލައިގަންނާނެ ކަންކަން ކަމަށެވެ.

ސަފީރު ވިދާޅުވީ، އިންޓަގަވަރމެންޓަލް ނެގޯސިއޭޝަން ޕްރޮސެސް، އައިޖީއެންގެ މަސައްކަތްތައް ކުރިއަށްދާއިރު ރައީސްގެ ހުށަހަޅުއްވުންތަކަށް ރިޔާޢަތްކުރައްވާނެކަމަށެވެ.

"ކުރިއަށް އޮތް ހަފުތާގެ ތެރޭގައި އާންމު މަޖިލީހުގެ މަސައްކަތްތައް ފަށައިގަންނާނެ. އައިޖީއެންގެ މަސައްކަތްތައް ފަށައިގެން ކުރިއަށްދާއިރު ރައީސުލްޖުމްހޫރިއްޔާ ހުށަހެޅުއްވި ހުށަހެޅުންތަކަކީ އެހެން ބައެއް ޤައުމުތަކުން އެއާމެދު ސަމާލުވެ އޭގެ ބައެއް ތަފްސީލް އަޅުގަނޑުމެންނާއި އަދި އަޅުގަނޑުމެންގެ އެކީގައި މަސައްކަތް ކުރާ އެހެން ޤައުމުތަކުން ނެގޯސިއޭޝަންތަކުގެ ތެރެއިން ގެންދާނެ ކަމެއްގެ ގޮތުގައި އެހެން ޤައުމުތަކުންވެސް ދެކެނީ،" އދ.ގައި ހުންނަވާ ރާއްޖޭގެ ދާއިމީ މަންދޫބު ޑރ. ޢަލީ ނަޞީރު މުޙައްމަދު ވިދާޅުވިއެވެ.

ރައީސުލްޖުމްހޫރިއްޔާ ވަނީ އދ.ގެ ސަލާމަތީ މަޖިލީހުގެ އިތުރުން އދ. ގެ އާންމު މަޖިލީހުގެ 79ވަނަ ބައްދަލުވުމުގައިވެސް ތަގުރީރު ކުރައްވާފައެވެ. އަދި އެ ބައްދަލުވުމުގެ ހަވާސާގެ ތެރެއިން ކުރިއަށްދިޔަ އެކި ބައްދަލުވުންތަކުގެ ރިޔާސަތު ބަލަހައްޓަވައި އެކި މައުޞޫއުތަކަށް އެމަނިކުފާނު ވާހަކަފުޅު ދެއްކެވިއެވެ.

މި ހަރަކާތްތަކުގައި ބައިވެރިވެވަޑައިގެންވުމުގެ ސަބަބުން ރާއްޖެއަށް ފައިދާވާނެ އެކި ފުރުސަތުތައް ފަހިވެގެންދާނެކަމަށް އދ.ގައި ހުންނަވާ ދުވެހިރާއްޖޭގެ ދާއިމީ މަންދޫބު ޑރ. ޢަލީ ނަޞީރު މުހައްމަދު ވިދާޅުވިއެވެ.