މޯލްޑިވިއަންގެ ސީޕްލޭންގެ ދަތުރުތައް ފުޅާކުރުމުގެ ގޮތުން އަންނަ ހަފްތާ ތެރޭ މޫދަށް ޖައްސާ އިތުރު ބޯޓެއް ގެނައުމަށް ހަމަޖެހިފައިވާ ކަމަށް އައިލެންޑް އޭވިއޭޝަނުން ބުނެފިއެވެ.
މިއާއެކު މޯލްޑިވިއަން ސީ ޕްލޭން ފްލީޓްގައި ހިމެނޭ އެއަރކްރާފްޓުގެ އަދަދު ހަތަކަށް އަރާނެއެވެ.
އައިލެންޑް އޭވިއޭޝަނުން މަޢުލޫމާތުދިންގޮތުގައި މިއަހަރުގެ އޮގަސްޓްމަހުގެ ނިޔަލަށް މޯލްޑވިއަންގެ ސީޕްލޭންތަކުގެ އަދަދު ދިހައަކަށް އިތުރުކުރުމަށް މަސައްކަތް ކުރަމުންދާ ކަމަށާއި އެގޮތުން އަންނަ ޖުލައި މަހުގެ ކުރީ ކޮޅުވެސް މޫދަށް ޖައްސާ އިތުރު ދެ ބޯޓު ގެނައުމަށް ހަމަޖެހިފައިވާ ކަމަށް އެކުންފުނިން ބުނެއެވެ.
އައިލެންޑް އޭވިއޭޝަނުން ބުނީ މޯލްޑިވިއަން ސީ ޕްލޭންގެ ޓަރމިނަލްގެ މަސައްކަތް މިހާރު ނިމިފައިވާ ކަމަށާއި ސީ ޕްލޭން ޑޮކް ބޮޑުކުރުމުގެ މަސައްކަތް މިހާރު ކުރިއަށްދާ ކަމަށެވެ.
މޯލްޑިވިއަން ސީ ޕްލޭންގެ ދަތުރުތައް ރާއްޖޭގެ 5 ރިސޯޓަށް ކުރާއިރު ދުވާލެއްގެ މައްޗަށް 15 ވަރަކަށް ދަތުރު އެ އެއަރލައިންގެ ސީޕްލޭންތައް ކުރާކަމަށް އައިލެންޑް އޭވިއޭޝަނުން ބުނެއެވެ.