އެޕާޓްމަންޓް ގަންނަ ފަރާތްތަކުން ފައިސާ ދެއްކުމުގައި ސަމާލުވާން އިލްތިމާސްކޮށްފި

ހުޅުމާލޭގައި އިމާރާތް ކުރަމުންދާ ރެޒިޑެންޝަލް އިމާރާތްތަކުން އެޕާޓްމަންޓް ގަންނައިރު އެތަންތަނަށް ފައިސާ ދެއްކުމުގައި މިހާރަށް ވުރެ ބޮޑަށް ސަމާލުވުމަށް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިލްތިމާސްކޮށްފިއެވެ.

އެޗްޑީސީން ނެރުނު ބަޔާނެއްގައި ވިދާޅުވީ ހުޅުމާލޭގައި އިމާރާތްކުރާ ރެޒިޑެންޝަލް އިމާރާތްތަކުން އެޕާޓްމެންޓްތައް ވިއްކުމުގެ މުޢާމަލާތް ކުރާނީ އިމާރާތްކުރާ ފަރާތާއި ގަންނަ ފަރާތާއި ދެމެދު އެއްބަސްވާ ގޮތުގެ މަތިން ކަމަށެވެ. ނަމަވެސް އެގޮތަށް ކުރިއަށްގެންދާއިރު ފައިސާގެ މުޢާމަލާތް ކުރަންވާނީ އެޗްޑީސީއާއި އިމާރާތްކުރާ ފަރާތާއި ދެމެދު ވެފައި އޮތް އެއްބަސްވުމާއި އެއްގޮތަށްކަމަށްވެސް އެޗްޑީސީން ވިދާޅުވެއެވެ،

މިގޮތުން ރެޒިޑެންޝަލް އިމާރާތަކުން އެޕާޓްމެންޓް ގަތުމަށް އޮންނަ އުސޫލުގައިވާ ގޮތުން އެޕާޓްމެންޓެއްގެ ބުކިން ފީއެއްގެ ގޮތުގައި ގިނަވެގެން ނެގޭނީ 50،000 ރުފިޔާކަމަށާއި މި އަދަދަކީ އެޕާޓްމެންޓުގެ ޖުމްލަ އަގުން އުނިކުރެވޭ ރިފަންޑަބަލް އަދަދެއްކަމަށް އެޗްޑީސީން ވިދާޅުވެއެވެ.

ނަމަވެސް އެޕާޓްމެންޓް ބުކްކޮށް ވިއްކުމަށް ހުޅުވާލެވޭނީ އިމާރާތުގެ ސިވިލް މަސައްކަތުގެ 20 އިންސައްތަ ނިމުމުންކަމަށާއި އެހެން ކަމުން އިމާރާތުގެ މަސައްކަތުގެ ވަކި މިންވަރެއް ފުރިހަމަ ނުވެ، އެޗްޑީސީގެ ހުއްދަ ނެތި އެޕާޓްމެންޓުތަކަށް ޑިވެލޮޕަރުންނަށް ބުކިން ފީ ގެ އިތުރަށް އެއްވެސް ފައިސާއެއް ނުނެގޭނެކަމަށް އެޗްޑީސީން ވިދާޅުވެއެވެ.

އެޗްޑީސީން ވަނީ އަސޭރިއާ މަޝްރޫޢު ފިޔަވައި ހުޅުމާލޭގައި އިމާރާތްކުރަމުންދާ ހުރިހާ ރެޒިޑެންޝަލް އިމާރާތްތައް ވިއްކުމުގައި އަމަލުކުރާނީ މި އުސޫލުންކަން ފާހަގަކޮށްފައެވެ. އަސޭރިއާ މަޝްރޫޢުގައި އެޕާޓްމެންޓް ވިއްކާ ފަރާތައް ބުކިން ފީ އެއް ގޮތުގައި ގާތްގަނޑަކަށް އެ މިލިއަން ރުފިޔާ ނެގުމުގެ ފުރުސަތު ދެއެވެ. އަދި އިމާރާތުގެ 20 އިންސައްތަ ނުނިމުނަސް އެޗްޑީސީއާއި އެކުންފުންޏާއި ދެމެދު އުފައްދާފައިވާ އެސްކްރޯ އެކައުންޓަށް އެފައިސާ ޖަމާކޮށް އެޕާޓްމެންޓު ގަނެވޭނެކަން އެޗްޑީސީން ފާހަގަކުރެއެވެ.

އެޗްޑީސީން ވަނީ ހުޅުމާލެއިން އެޕާޓްމެންޓް ގަންނަ ފަރާތްތަކުން ފައިސާގެ މުޢާމަލާތް ކުރުމުގައި މިކަންކަމަށް ސަމާލުކަން ދިނުމަށް އިލްތިމާސްކޮށްފައެވެ.