ދޫހިމެރިގެ ސާފުކުރުމަށްފަހު މަގު ހުޅުވާލައިފި

އަލިފާނުގެ ޙާދިސާ ހިނގި ހ. ދޫހިމެރިގެ ސާފުކުރުމަށްފަހު، ދޫހިމެރިމަގު ހުޅުވާލައިފިއެވެ. އަލިފާނުގެ ހާދިސާއާއި ގުޅިގެން އެމަގު މިހާތަނަށް އޮތީ ބަންދުކޮށްފައެވެ.

ދޫހިމެރިގޭގައި އަލިފާނުގެ ހާދިސާއެއް ހިނގީ މިމަހުގެ 9ވަނަ ދުވަހުއެވެ. އެ ހާދިސާއަށްފަހު އެ ގެ ސާފުކުރުމުގެ މަސައްކަތް ކުރިޔަށް ގެންދިޔައީ ސިޓިތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިންނެވެ.

އަލިފާނުގެ ހާދިސާގައި ހ.ދޫހިމެރިގޭގެ އިމާރާތް ވަނީ ބޭނުންނުކުރެވޭ ވަރަށް އަނދާފައެވެ. ހާދިސާ ހިނގި ސަރަޙައްދު ސާފުކުރުމުގެ މަސައްކަތް ކުރިއަށްގެންދިޔައީ އެ ވުޒާރާގެ ޢާންމު މަސައްކަތްތަކާބެހޭ ޑިޕާޓްމަންޓުންނެވެ.

ދޫހިމެރިގޭގެ އިތުރުން އެގެއާއި އިންވެގެން ހުރި 2 ފަންގިފިލާގެ އިމާރާތަށްވެސް އަލިފާނުގެ އަސަރުކޮށް ގެއްލުންވިއެވެ. އަދި ކައިރީގެ ގެތަކަށް ދުމުގެ އަސަރު ވަރަށް ބޮޑަށް ކުރިއެއެވެ.

މުޅިން އަނދާ ހުލިވި ދޫހިމެރިގޭގައި ދިރިއުޅުނު 15 ބިދޭސީންނަށް 7 ދުވަހުގެ ވަގުތީ ބޯހިޔާވަހިކަން ވަނީ ދީފައެވެ. އެންޑީއެމްއޭއިން ވިދާޅުވީ އެ ފަރާތްތަކާ ހަވާލުވެފައިވާ ކުންފުނިން ދާއިމީ އިންތިޒާމް ހަމަޖައްސަމުންދާކަމަށެވެ.

އެންޑީއެމްއޭއިން ވިދާޅުވީ، ދޫހިމެރިގެއާއި އިންވެގެންހުރި ބައެއް ގެތަކުން ކަރަންޓު ކަނޑާލަންޖެހުމުގެ ސަބަބުން، އެ ގެތަކުގެ ޢާއިލާތަކަށްވެސް ވަގުތީ ބޯހިޔާވަހިކަން ދިންކަމަށެވެ. އެ މީހުންވެސް އާންމު ދިރިއުޅުމަށް ރުޖޫޢަވުމުގެ އިންތިޒާމްތައް ދަނީ ހަމަޖައްސަމުންނެވެ.

އަލިފާނުގެ ހާދިސާގައި އެއްވެސް މީހަކަށް ޞިއްޙީ ބޮޑު ގެއްލުމެއް ވެފައެއް ނުވެއެވެ. ނަމަވެސް ދުމުގެ އަސަރުކޮށްގެން 2 ބިދޭސީންނަށް ހޮސްޕިޓަލުގައި ފަރުވާދީފައިވެއެވެ.

އަލިފާން ރޯވީ ދޫހިމެތިގޭގެ ތިރީ ފަންގިފިލާގައި ހިންގަމުން އައި ކެފޭއެއްގައެވެ. އެތަނުގައި ޓިނުން ހަދާފައިވާ މަތީ ދެ ފަންގިފިލާ ބޭނުންކުރަމުންދިޔައީ ބިދޭސީ އެކަމަޑޭޝަން ބްލޮކެއްގެ ގޮތުގައެވެ. އެތަނުގައި ގިނަ އަދަދެއްގެ ބިދޭސީން ދިރިއުޅެމުން ގޮސްފައިވެއެވެ.