ޒަކާތު ފަންޑުން 130 މީހަކަށް އެހީ، ގިނައީ ކެންސަރާއި ކިޑްނީ ބަލިތަކަށް ދޫކޮށްފައިވާ އެހީ

މިދިޔަ އޮގަަސްޓްމަހު ޒަކާތު ފަންޑުން ބޭސްފަރުވާ ކުރުމަށް 130 މީހަކަށް އެހީތެރިކަން ފޯރުކޮށްދީފައިވާކަމަށް ޒަކާތު ހައުސްއިން ހާމަކޮށްފިއެވެ.

ދިވެހިރާއްޖޭގެ ޒަކާތު ހައުސްއިންވަނީ އޮގަސްޓްމަހު، ފަޤީރުންނާއި މިސްކީނުންނަށް ބޭސްފަރުވާގެ އެހީ ދީފައިވާގޮތުގެ ތަފާސްހިސާބު އާއްމުކޮށްފައެވެ.

ތަފާސްހިސާބުތަކުން ދައްކާގޮތުން މައިގަނޑު 4 ކަމަކަށް ޒަކާތު ފަންޑުން އެހީ ދީފައިވެއެވެ. އެއީ ކެންސަރު ބައްޔަށް ފަރުވާ ކުރުމަށާއި، ހިތުގެ އޮޕަރޭޝަން ކުރުމަށާއި، ކިޑްނީ ބަލިތަކަށާއި، ސިކުނޑީގެ އޮޕަރޭޝަންތައް ކުރުމަށެވެ. އަދި އެހިނެހެން ބޭނުންތަކަށްވެސް ޒަކާތު ފަންޑުން އެހީ ދީފައިވެއެވެ.

ޒަކާތު ފަންޑުން އެހީދިން މިންވަރު:

• ކެންސަރަށް ފަރުވާކުރުމަށް 385،885 ރުފިޔާ
• ކިޑްނީ ބަލިތަކަށް 157،205 ރުފިޔާ
• ސިކުނޑީގެ އޮޕަރޭޝަންތަކަށް 124،580 ރުފިޔާ
• ހިތުގެ އޮޕަރޭޝަންކުރުމަށް 25،443 ރުފިޔާ
• އެހެނިހެން ބަލިތަކަށް 415،500 ރުފިޔާ

ތަފާސްހިސާބުތައް ދައްކާގޮތުން އޮގަސްޓްމަހު ޒަކާތު ފަންޑުން ޖުމްލަ 733،436 ރުފިޔާވަނީ ޚަރަދުކޮށްފައެވެ. އަދި އެމަހުގެތެރޭ އެހީގެގޮތުގައި ހަމަޖެހިފައިވަނީ ޖުމްލަ 1.12 މިލިޔަން ރުފިޔާއެވެ.

ޒަކާތު ފަންޑުން ކުރި އެހެނިހެން ޚަރަދުތަތަކުގެތެރޭގައި ހިމެނެނީ ވަޤުފް އިމާރާތް ބިނާކުރުމަށް ކުރަންޖެހޭ މަސައްކަތްތައް ކުރުމަށް ކުރެވިފައިވާ ޚަރަދާއި ޒަކާތުގެ މަސައްކަތްކުރުމަށް ޒަކާތު ފަންޑުން މުސާރަ ދޭގޮތަށް ނަގާފައިވާ މުވައްޒަފުންގެ އުޖޫރަދިނުމަށް ޢާމިލުންގެ ބައިން ކުރެވިފައިވާ ޚަރަދެވެ.
އެގޮތުން ވަޤުފް އުފެއްދުމަށް 37،800 ރުފިޔާ ޚަރަދުކޮށްފައިވާއިރު، އިދާރީ މުވައްޒަފުންގެ އުޖޫރައިގެގޮތުގައި 268،276 ރުފިޔާ ވަނީ ހޭދަކޮށްފައެވެ.

މީގެ ކުރިން ފިޠުރުޒަކާތް ނެގުމާއި ޒަކާތް ބެހުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާއިން ކުރައްވަމުން ގެންދެވި ނަމަވެސް މިހާރު އެ މަސައްކަތް ކުރަމުން އަންނަނީ އެކަމަށް ޚާއްސަކޮށް އުފައްދަވާފައިވާ މޯލްޑިވްސް ޒަކާތު ހައުސްއިންނެވެ. މޯލްޑިވްސް ޒަކާތު ހައުސް ރައީސް އުފައްދަވާ، މި އިދާރާ އިފްތިތާޙް ކުރައްވާފައިވަނީ މިއަހަރުގެ ޖެނުއަރީ މަހުގެ ތެރޭގައެވެ.