ހުރިހާ ޙާފިޡުންނަށްވެސް ޤައުމީ އިނާމުދޭން ސަރުކާރުން ނިންމަވައިފި

ކޮންމެ ދަރަޖައެއްގައި ފާސްވި ނަމަވެސް، ޙާފިޡުންނަށް ޤައުމީ އިނާމް ދިނުމަށް ސަރުކާރުން ނިންމަވައިފިއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މީގެ ކުރިން ޙާފިޡުންނަށް ރައީސުލްޖުމްހޫރިއްޔާ ދެއްވާ ޚާއްސަ މެޑަލް ދެއްވަނީ ކީރިތި ޤުރްއާން ހިތުދަސްކޮށް، 1 ވަނަ ދަރަޖައިގައި ފާސްވާ ޙާފިޡުންނަށް އެކަނި ކަމަށެވެ. އެހެންނަމަވެސް މިހާރު ކޮންމެ ދަރަޖައެއްގައި ޙާފިޡަކު ފާސްވި ނަމަވެސް، ރައީސްގެ ޚާއްސަ މެޑަލް ދެއްވާގޮތަށް ނިންމަވާފައިވާކަމަށެވެ.

ވަޒީރު ވިދާޅުވީ ޙާފިޡުންނަށް ރައީސުލްޖުމްހޫރިއްޔާ ދެއްވާ ޚާއްސަ މެޑަލް، މިއަހަރު 25 ޙާފިޡަކަށް ލިބޭނެ ކަމަށެވެ. އަދި މި މެޑަލް ދެއްވާނީ ރާއްޖެ އިސްލާމްވި ދުވަސް ފާހަގަކުރުމަށް ބާއްވާ ޖަލްސާގައިކަމަށްވެސް ވަޒީރު ވިދާޅުވިއެވެ. ރާއްޖެ އިސްލާމްވި ދުވަސް މިއަހަރު ދިމާވަނީ އަންނަ މަހުގެ 5 ވަނަ ދުވަހާއެވެ.

އިސްލާމީ ކަންތައްތަކާ ބެހޭ ވަޒީރު ވިދާޅުވީ ކީރިތި ޤުރުއާން ހިތުދަސްކުރާ ފަރާތްތަކަށް ހިތްވަރުދީ، ގިނަ ޙާފިޡުން ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވަރަށް ބޮޑު އަހައްމިއްޔަތުކަމެއްދެއްވާ ކަމަށެވެ.

ޙާފިޡުންނަށް ރައީސުލްޖުމްހޫރިއްޔާ ދެއްވާ ޚާއްސަ މެޑަލް ކުރީގެ ރައީސް، މަޢުމޫން ޢަބްދުލްޤައްޔޫމްގެ ދައުރުން ފެށިގެން އަންނަނީ ދެއްވަމުންނެވެ. ނަމަވެސް ޙާފިޡުންނަށް ދޭ މެޑައްޔަކީ ހަމައެކަނި 1 ވަނަ ދަރަޖައިގައި ފާސްވާ ޙާފިޡުންނަށްދޭ އެއްޗެއް ގޮތަށް ބަދަލުކުރީ މިދިޔަ ސަރުކާރުގައެވެ.