ޚިދުމަތް ހޯދަން ފަސޭހަކޮށްދިނުމަށް، މަތީ ތަޢުލީމާއި ބެހޭ ވުޒާރާއިން ޚާއްސަ ނަންބަރެއް

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ދޭ ޚިދުމަތްތައް ފަސޭހައިން ލިބޭނެ އިންތިޒާމު ހަމަޖެއްސުމަށް ޚާއްސަ ފޯނު ނަންބަރެއް ތަޢާރަފްކޮށްފިއެވެ.

މަތީ ތަޢުލީމާ ބެހޭ ވުޒާރާއަށް ގުޅުމަށް ތަޢާރަފްކުރި ނަމްބަރަކީ 1474އެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާގެ ސްޓޭޓު މިނިސްޓަރ އަބްދުﷲ ނަޒީރު ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ ފަސޭހައިން ގުޅޭނެ ޝޯޓު ކޯޑު ނަމްބަރެއް ތަޢާރަފްކޮށްފައިވާ ކަމަށެވެ. އަދި މިއީ ދަރިވަރުންނާއި ބެލެނިވެރިންނަށް ގިނަ ފަސޭހަތަކެއް ލިބޭނެ ކަމެއް ކަމަށް ނަޒީރު ވިދާޅުވިއެވެ.

ނަޒީރު ވިދާޅުވީ މިއީ އެ ވުޒާރާއިން ކޯލް ސެންޓަރެއް ގާއިމްކުރުމަށް ކުރަމުންދާ މަސައްކަތުގެ ފެށުން ކަމަށެވެ. އަދި ސްޓޫޑެންޓު ޕޯޓަލް އަޕްގްރޭޑުކޮށް ރިއަލް ޓައިމްގައި މައުލޫމާތު ހިއްސާކުރުމުގެ މަަސައްކަތްވެސް ކުރެވެމުންދާ ކަމަށެވެ.

The Ministry of Higher Education, Labour, and Skills Development @MoHEmv has implemented a short code number to simplify communication for students and parents with the Ministry's relevant departments. This initiative marks the initial phase of creating a call center and… pic.twitter.com/ICWW0OI22s

— Abdulla Nazeer (@NazeerP1) September 11, 2024

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ދަނީ ތަޢުލީމާ ގުޅުން ހުރި ގިނަ ޚިދުމަތްތަކެއް ފޯރުކޮށްދެމުންނެވެ. އެގޮތުން ބޭރު ޤައުމުތަކުގެ ސްކޮލަރޝިޕްތަކަށް އިޢުލާންކުރުމާއި، އެޕްލިކޭޝަންތައް ހުށަހެޅުމުގައި އެހީތެރިވެދިނުމާއި، ސަރުކާރުން ދޫކުރާ ސްޓޫޑެންޓު ލޯން ކަންތައްތައްވެސް ބަލަހައްޓަމުންދަނީ މަތީ ތަޢުލީމާއި ބެހޭ ވުޒާރާއިންނެވެ.