ބީއެމްއެލްގެ ސީއީއޯ ކާރލް ސްޓުމްކަ އިސްތިއުފާދެއްވައިފި

ބީއެމްއެލްގެ ޗީފް އެގްޒެކެޓިވް އޮފިސަރ، ސީއީއޯގެ މަޤާމުގައި ހުންނެވި ކާރލް ސްޓުމްކަ އިސްތިއުފާދެއްވައިފިއެވެ.

ބޭންކް އޮފް މޯލްޑިވްސް، ބީއެމްއެލްއިން ނެރެފައިވާ ދެންނެވުމަށްގައި ބުނެފައިވަނީ އެ ބޭންކުގެ ސީއީއޯ ކާރލް ސްޓުމްކަ މިމަހުގެ 8 ވަނަ އިސްތިއުފާދީފައިވާ ކަމަށެވެ.

ކާރލް ބޭންކުގެ ސީއީއޯގެ މަޤާމުގައި ހުންނާނީ މިމަހުގެ 21 ގައި ބޭއްވުމަށް ހަމަޖެހިފައިވާ އެ ބޭންކުގެ ޚާއްސަ ގޮތުން ކުރާ އާންމު ޖަލްސާ، އީޖީއެމްއާ ހަމައަށެވެ.

ބީއެމްއެލުން ބުނީ ސީއީއޯގެ މަޤާމަށް ބޭފުޅަކު ހޯދުމުގެ މަސައްކަތް ކުރިޔަށްދާ މުއްދަތުގައި ބޭންކު ހިންގުމުގެ ޒިންމާ އަދާކުރައްވަނީ ޑިޕިއުޓީ ސީއީއޯ އާއިޝަތު ނޫރައްދީންކަމަށެވެ. ބީއެމްއެލްގެ ޑިރެކްޓަރުންގެ ބޯޑުން ސީއީއޯގެ މަޤާމަށް ބޭފުޅަކު އައްޔަން ކުރުމަށް މަސައްކަތް ފަށާނެ ކަމަށްވެސް އެ ބޭންކުން ހާމަކުރެއެވެ.

ބީއެމްއެލްގެ ބޯޑުގައި ސަރުކާރު ތަމްސީލްކުރާ މެންބަރުންގެ ތެރެއިން މިހާރު ހުސްކޮށް އޮތް 2 މަޤާމަށް ބޭފުޅުން އައްޔަންކުރުމަށް މިމަހުގެ 5 ވަނަ ދުވަހު ވަނީ ނަން ހުށައަޅާފައެވެ. ބީއެމްއެލްގެ ބޯޑަށް އައްޔަނުކުރަން ސަރުކާރުން ހުށައެޅުއްވީ މުޙައްމަދު ޝާހިދާއި ޢަލީ އިރުފާނުގެ ނަމެވެ.

ޝާހިދަކީ މޯލްޑިވްސް ޕެންޝަން އޮފީހުގެ ކުރީގެ ޗީފް ފައިނޭންޝަލް އޮފިސަރު އަދި މީރާގައި އިސް މަޤާމުތަކެއް އަދާކުރައްވާފައިވާ ބޭފުޅެކެވެ. އަދި ޢަލީ އިރުފާނަކީވެސް މާލީ ދާއިރާގެ ތަޖުރިބާހުރި އަދި މިހާރުވެސް މާލީ ވުޒާރާގެ ޑިރެކްޓަރެކެވެ.

ބީއެމްއެލްގެ ބޯޑުގައި 11 ބޭފުޅުން ތިއްބަވައެވެ. އޭގެތެރޭގައި ހިމެނެނީ ސަރުކާރުން ޢައްޔަންކުރައްވާ 6 ބޭފުޅުންނާއި، ބީއެމްއެލްއިން ޢައްޔަންކުރާ 2 ބޭފުޅުންގެ އިތުރުން އަމިއްލަ ހިއްސާދާރުން ތަމްސީލްކުރައްވާ 3 ބޭފުޅުންނެވެ.