ޕޭޕަލްގެ ޚިދުމަތް ގެނައުމަށް ހުރި ގޮންޖެހުންތަކަށް އެމެރިކާގެ އެހީގައި ހައްލުލިބޭނެ: ވަޒީރު ޒަމީރު

ޕޭޕަލްގެ ޚިދުމަތް ރާއްޖެއަށް ގެނައުމަށް ހުރި ގޮންޖެހުންތަކަށް އެމެރިކާގެ އެހީގައި ހައްލުލިބޭނެ ކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރާއްޖޭގައި އެމެރިކާ އެމްބަސީ ޤާއިމްވިތާ އެއް އަހަރު ފުރުން ފާހަގަކުރުމަށް ބޭއްވި ހަފްލާގައި ވާހަކަފުޅުދައްކަވަމުންނެވެ.

އެމެރިކާގެ އެމްބަސީ ރާއްޖޭގައި ޤާއިމްވެ ފުރަތަމަ ފަހަރަށް އެމެރިކާއިން ރާއްޖެއަށް ސަފީރެއް ކަނޑައެޅީ މިދިޔަ އަހަރުއެވެ. އެޤައުމުން ރާއްޖެއަށް ކަނޑައަޅުއްވާފައިވާ ސަފީރަކީ ހޫގޯ ޔޫ-ހޯ ޔޮންއެވެ. އެމެރިކާގެ އެމްބަސީ ރާއްޖޭގައި ޤާއިމްވެ މަސައްކަތް ފެށިތާ އެއްއަހަރު ފުރުން ފާހަގަކުރުމަށް ބޭއްވި ހަފްލާގައި ޚާރިޖީ ވަޒީރު މޫސާ ޒަމީރުގެ އިތުރުން ސަރުކާރުގެ ބައެއް ވަޒީރުންނާއި މަޖިލިސް މެންބަރުންން ބައިވެރިވެވަޑައިގެންނެވިއެވެ.

މިރަސްމިއްޔާތުގައި ވާހަކަފުޅުދައްކަވަމުން ޚާރިޖީ ވަޒީރު މޫސާ ޒަމީރު ވަނީ ރާއްޖެއާއި އެމެރިކާއާ ދެމެދު އޮތް ގުޅުމަށް އަލިއަޅުވާލައްވާފައެވެ. އަދި ދެ ޤައުމުގެ ގުޅުން ވޭތުވެ ދިޔަ އަހަރުތަކުގެ ތެރޭގައި އިތުރަށް ބަދަހިވެ އެކުގައި ގިނަ މަސައްކަތްތަކެއް ކުރެވޭ ކަމަށް ވަޒީރު ވިދާޅުވިއެވެ. އެގޮތުން މިދިޔަ ޖުލައި މަހު އެމެރިކާއާއި ރާއްޖެއާއި ދެމެދު 3 ވަނަ ޓްރޭޑް އެންޑް އިންވެސްޓްމެންޓް ފްރޭމްވޯކް އެގްރިމެންޓްގެ މަޝްވަރާތައް ކުރިއަށްދިޔަކަން ވަޒީރު ފާހަގަކުރެއްވިއެވެ.

މިއާއެކު ރާއްޖެއާއި އެމެރިކާއާ ދެމެދު ބަދަހިވަމުން އަންނަ ގުޅުމުގެ ތެރެއިން ޕޭޕަލްގެ ޚިދުމަތް ތަޢާރަފްވުމުން އިޤްތިޞާދަށް އޭގެ ފައިދާ ކުރާނެ ކަމަށް ވަޒީރު ވިދާޅުވިއެވެ.

"އެމެރިކާ ރާއްޖެ ގުޅުމުގެ ތެރެއިން އަޅުގަނޑުމެންނަށް ލިބެން އޮތް އެންމެ ބޮޑު ކުރިއެރުމަކީ ޕޭޕަލްގެ ޚިދުމަތް. އަޅުގަނޑުމެން މިއީ ކުޑަ މާކެޓެއް ނަމަވެސް އެމެރިކާގެ އެހީގައި ހުރި ގޮންޖެހުންތައް ނައްތާލާ ޚިދުމަތް ލިބެން ފެށުމުން އޭގެ ފައިދާ އަޅުގަނޑުމެންގެ އިޤްތިޞާދަށް ވަރަށް ބޮޑަށް ކުރާނެ " ވަޒީރު މޫސާ ޒަމީރު ވިދާޅުވިއެވެ.

އެމެރިކާއާއި ރާއްޖޭގެ ގުޅުން އިތުރަށް ބަދަހިވަމުންދާއިރު، ވަޒީރު ވަނީ ލަންކާއަށް ނުގޮސް ރާއްޖެއިން ވީޒާގެ ކަންކަން ހަމަޖެހޭނެ ގޮތަށް އިންތިޒާމުތައް ހަމަޖައްސަވައި ދެއްވުމަށް އެދިވަޑައިގަންނަވާފައެވެ.

މިހަފްލާގައި ވާހަކަދައްކަވަމުން އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ހޫގޯ ޔޮން ވިދާޅުވީ އެމެރިކާ އާއި ރާއްޖޭގެ ގުޅުން ބިނާވަނީ ޑިމޮކްރަސީ އާއި މިނިވަންކަމާއި ސިޔާދަތީ ބާރުގެ މައްޗަށް ކަމަށް ވިދާޅުވެފައެވެ. އަދި ދެމެހެއްޓެނިވި އިޤްތިޞާދެއް އޮވެ، މޫސުމީ ބަދަލުތަކުން އަރައިގަތުމަށް ވިލުންވެރިކަން އިތުރުކުރުމަކީވެސް މި ގުޅުމުގެ އަސާސެއް ކަމަށް ސަފީރު ވިދާޅުވިއެވެ. ސަފީރުގެ ވާހަކައިގައި، އެމެރިކާ އާއި ރާއްޖޭގެ ގުޅުމުގެ ތެރެއިން ދެ ޤައުމުގެ ރައްޔިތުންގެ ގުޅުން އިތުރަށް ވަރުގަދަ ކުރުމުގެ މައްޗަށް އަލިއަޅުވާލެއްވިއެވެ.

މިހަފްލާއަށް ފަހު ޕީއެސްއެމް ނިއުސްއާ ވާހަކަ ދައްކަވަމުން ސަފީރު ހޫގޯ ޔޮން ވިދާޅުވީ، ރާއްޖޭގެ ކަނޑުގެ ސަރަހައްދަކީ މުޅި ދުނިޔޭގެ ވިޔަފާރިއަށްވެސް މުހިންމު ސަރަހައްދަކަށްވާއިރު، ދެ ޤައުމުން ގުޅިގެން މަސައްކަތް ކުރުމަކީ މުހިންމު ކަމެއް ކަމަށެވެ.

އެމެރިކާއާއި ރާއްޖެއާއި ދެމެދު ސިޔާސީ ގުޅުން ޤާއިމް ކުރެވުނީ 1965 ވަނަ އަހަރުއެވެ. އޭގެ ފަހުން ދެ ޤައުމުގެ ގުޅުން އެކި ފެންވަރުގައި ބަދަހިކުރުމަށް މަސައްކަތް ކޮށްފައިވާއިރު، ފުރަތަމަ ފަހަރަށް އެމެރިކާގެ ފަރާތުން ރާއްޖެއަށް ސަފީރެއް އައްޔަން ކުރެވުނީ 2023 ވަނަ އަހަރު ސެޕްޓެމްބަރުގައެވެ. އޭގެ ފަހުން ރާއްޖޭގައި އެމެރިކާގެ އެމްބަސީއެއް ޤާއިމްވެ ދަނީ މަސައްކަތް ކުރަމުންނެވެ.