މިދިޔަމަހުވެސް އެންމެ ގިނައީ ވައްކަމާއި ޓްރެފިކް މައްސަލަތައް

މިދިޔަމަހު ފުލުހުންނަށް އެންމެ ގިނައިން ހުށައަޅާފައިވަނީ ވައްކަމުގެ މައްސަލަަތައްކަމަށް ތަފާސްހިސާބުތަކުން ދައްކައިފިއެވެ.

ފުލުހުންގެ ތަފާސްހިސާބުތަކުން ދައްކާގޮތުން މިދިޔަމަހު ފުލުހުންނަށް ޖުމުލަ 1009 މައްސަލަ ހުށައަޅާފައިވާއިރު އޭގެތެރެއިން 323 މައްސަލައަކީ ވައްކަމުގެ މައްސަލައެވެ.

ފުލުހުންނަށް ހުށަހަޅާ މައްސަލަތަކުގެ ތަފާސްހިސާބުތައް ހާމަކުރަން ފެށީންސުރެއް ވައްކަމުގެ މައްސަލަތައް ހުރީ ކޮންމެ އަހަރަކުވެސް އެވްރެޖްކޮށް 3000 އިން މަތީގައެވެ. 2022 ވަނަ އަހަރު ނިމުނުއިރު ވައްކަމުގެ 3973 މައްސަލައެއް ފުލުހުންނަށް ހުށަހަޅާފައިވެއެވެ. އަދި 2023 ވަނަ އަހަރު ނިމުނުއިރު ވައްކަމުގެ 3818 މައްސަލަ ވަނީ ހުށަހަޅާފައެވެ.

ވައްކަމުގެ މައްސަލަތަކަށްފަހު އޮގަސްޓުމަހުގެ ތެރޭގައި ދެވަނައަށް އެންމެ ގިނައިން ހުށަހަޅާފައިވަނީ ޓްރެފިކް އެކްސިޑެންޓް މައްސަލަތަކެވެ. އެގޮތުން ޓްރެފިކް އެކްސިޑެންޓްތަކުގެ 204 މައްސަލަ ހުށަހަޅާފައިވެއެވެ. އަދި މަސްތުވާތަކެތީގެ 130 މައްސަލައެއް މިދިޔަމަހު ހުށަހަޅާފައިވާކަމަށް ތަފާސްހިސާބުތަކުން ދައްކައެވެ.

އޮގަސްޓް މަހު އެންމެ ގިނައިން ހުށަހެޅުނު މައްސަލަތައް:

■ ވައްކަމުގެ 323 މައްސަލަ
■ ޓްރެފިކް އެކްސިޑެންޓުގެ 204 މައްސަލަ
■ މަސްތުވާތަކެތީގެ 130 މައްސަލަ
■ މުދާ ގެއްލިގެން 70 މައްސަލަ

މަހުން މަހަށް ބަލާއިރު، ވައްކަމުގެ މައްސަލަތައް ވަނީ އިތުރުވެފައެވެ. އެގޮތުން ޖުލައި މަހު ހުށަހަޅާފައިވަނީ ވައްކަމުގެ 316 މައްސަލައެވެ. އަދި ޓްރެފިކް އެކްސިޑެންޓުތައް ވަނީ އޮގަސްޓު މަހު ދަށަށް ގޮސްފައެވެ. ޖުލައި މަހު ޓްރެފިކް އެކްސިޑެންޓުގެ 210 މައްސަލަ ރިޕޯޓުކޮށްފައިވާއިރު، އޮގަސްޓުމަހު މި އަދަދު ހުރީ 204އެއްގައެވެ.

ކުށް މަދުކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާ ގުޅިގެން ދަނީ ތަފާތު މަސައްކަތްތައް ކުރަމުންނެވެ. ވަކިން ޚާއްޞަކޮށް ވައްކަމާއި އެކްސިޑެންޓްތައް މަދުކުރުމަށްޓަކައި، ތަފާތު އެކި ޕްރޮގުރާމުތައް ހިންގައި، އާންމުންގެ ހޭލުންތެރިކަން އިތުރުކުރުމަށް ގިނަ ޙަރަކާތްތަކެއް ފުލުހުން ގެންދަނީ ހިންގަމުންނެވެ.