އެމްޕީއެލަށް ތާރީޚީ ދުވަހެއް، 934 ކޮންޓެއިނަރަށް ޚިދުމަތްދީ އައު ރެކޯޑެއް!

މާލެ ވިޔަފާރި ބަނދަރުން އެއް ދުވަސްތެރޭ 934 ކޮންޓެއިނަރަށް ޚިދުމަތްދީ އައު ރެކޯޑެއް ހަދައިފިއެވެ.

މޯލްޑިވްސް ޕޯޓްސް ލިމިޑެޓު، އެމްޕީއެލުން ވިދާޅުވީ، މިދިޔަ ބުދަ ދުވަހު މާލެ ވިޔަފާރި ބަނދަރުން 934 ކޮންޓެއިނަރަށް ޚިދުމަތްދީފައިވާ ކަމަށާއި، މިއީ އެކުންފުނީގެ ތާރީޚުގައިވެސް އެއް ދުވަސްތެރޭ އެންމެ ގިނަ ޢަދަދަކަށް ކޮންޓެއިނަރ ހޭންޑަލްކުރި ދުވަސް ކަމަށެވެ.

މާލެ ވިޔަފާރި ބަނދަރަށް ދިމާވެފައިވާ ޖާގައިގެ ދަތިތަކާއި، ކުރިމަތިވެފައިވާ ގޮންޖެހުންތަކާއެކުވެސް މިފަދަ ރެކޯޑު ޤާއިމްކުރެވުނީ، މުވައްޒަފުންގެ އަދި ޕޯޓު ބޭނުންކުރާ ފަރާތްތަކުގެ ވަރަށް ބޮޑު އެއްބާރުލުމާއި ބުރަ މަސައްކަތުންކަން އެމްޕީއެލުން ވަނީ ފާހަގަކުރައްވާފައެވެ.

Yesterday, we achieved a new productivity record at Malé Commercial Harbor, successfully handling 934 TEUs despite considerable congestion and challenges. A huge thanks to the entire #TeamMPL and all Port Users for their hard work and dedication.#MaldivesPortsLimited #MPL… pic.twitter.com/D3bGtH3s0m

— Maldives Ports Limited (@Portmv) September 5, 2024

މާލެ ވިޔަފާރި ބަނދަރަށް ހުރި ޖާގައިގެ ދަތިކަން ހައްލުކުރުމަށް އެމްޕީއެލުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މިދިޔަ މަހުގެ ފަހުކޮޅު މާލެ ވިޔަފާރި ބަނދަރަށް މިހާތަނަށް އެންމެ ގިނަ ކޮންޓެއިނަރު ހިފައިގެން އައި ބޯޓު ބަނދަރުކުރުމާއި ގުޅިގެން ޖާގަ އިތުރުކުރުމަށްވެސް ވަނީ ގިނަ މަސައްކަތެއްކޮށްފައެވެ. އެގޮތުން އެމްޕީއެލުން އޭރު ބުނެފައިވަނީ އިތުރު 100 ކޮންޓެއިނަރު ޖެހޭނެ ޖާގަ ތައްޔާރުކޮށްފައިވާ ކަމަށެވެ.

އެބޯޓުގައި ޖުމްލަ 1836 ކޮންޓެއިނަރު ގެނައެވެ. މިބޯޓުން ގެނައި ކޮންޓެއިނަރުތަކަކީ މެލޭޝިއާ އާއި ސިންގަޕޯރުގައި ރާއްޖެ ނުގެނެވި ގިނަދުވަސްތަކެއްވެފައިވާ ކޮންޓެއިނަރުތަކެކެވެ. މާލޭ ވިޔަފާރި ބަނދަރަށް ބާލަންޖެހޭ ކޮންޓެއިނަރުގެ ޢަދަދު މި ދުވަސްވަރު އާދަޔާ ޚިލާފަށް އިތުރުވެފައިވާކަން އެމްޕީއެލުން ފާހަގަކުރައްވައެވެ.

މާލޭ ވިޔަފާރި ބަނދަރުގެ ޖާގައިގެ ދަތިކަން ހައްލު ކުރުމަށް މި އަހަރުގެ ތެރޭގައި ކުރެވުނު މަސައްކަތުގެ ތެރެއިން، މާލޭ ވިޔަފާރި ބަނދަރުގެ ޔާޑް ސަރަހައްދުން 250 ކޮންޓެއިނަރު ޖެހޭނެ އިތުރު ޖާގައެއް ހަމަޖައްސާފައިވާކަމަށް އެމްޕީއެލުން ވިދާޅުވެއެވެ. އަދި އިތުރު 100 ކޮންޓެއިނަރު ޖެހޭނެ ޖާގައެއް ހެދުމުގެ މަސައްކަތް މިހާރުވެސް ކުރިއަށްދާކަން އެކުންފުނިން ފާހަގަކުރައްވައެވެ.

އެމްޕީއެލުން ވިދާޅުވީ، އެކުންފުނިން މުދަލުގެ ވެރިފަރާތްތަކަށް ރައްކާތެރިކަމާއިއެކު، ވީހާވެސް އަވަސް، ލުއި ފަސޭހަ ޚިދުމަތެއް ފޯރުކޮށްދިނުމަށް މަސައްކަތް ކުރަމުންއަނަކަމަށެވެ. އަދި ޚިދުމަތް އިތުރަށް ފުޅާކޮށް، މިހާރަށްވުރެ ލުއިފަސޭހަވާނެހެން ބަނދަރުގައި ތޮއްޖެހުން ކުޑަކުރުމަށް ވީހާވެސް އަވަހަށް މުދާ ކްލިއަރ ކުރުމަށް އެމްޕީއެލްއިން ވަނީ އެދިވަޑައިގެންފައެވެ.