ޢަޒުމު ކަނޑައަޅަންވީ އިޤުތިޞާދީ އަދި ސިޔާސީގޮތުން ރާއްޖެ މިނިވަންކަންމަތީ ބޭއްވުމަށް: ނައިބު ރައީސް

ޤައުމީ ދުވަސް ފާހަގަކުރާއިރު ކޮންމެ ދިވެއްސަކުވެސް ޢަޒުމު ކަނޑައަޅަންވީ އިޤުތިޞާދީ އަދި ސިޔާސީގޮތުން ދިވެހި ޤައުމު މިނިވަންކަންމަތީ ބޭއްވުމަށްކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ރައީސުލްޖުމްހޫރިއްޔާގެ ނައިބު މިހެން ވިދާޅުވީ، މިއަހަރުގެ ޤައުމީ ދުވަހާ ގުޅިގެން ދެއްވި ޚިޠާބުގައެވެ.

ޤައުމީ ދުވަހާ ގުޅިގެން ދެއްވި ޚިޠާބުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވީ، މީގެ 465 ވަރަކަށް އަހަރު ކުރިން މުޙައްމަދު ތަކުރުފާނު އިސްވެ ޕޯޗުގީޒުންނާ ދެކޮޅަށް ކުރެއްވި ޖިހާދަކީ ހުރިހާ ޒަމާނަކަށް އޮތް ނަމޫނާއެއް ކަމަށެވެ. އަދި މި މަތިވެރި ޖިހާދުން ޢިބުރަތް ޙާސިލްކޮށް މި ޤައުމު މިނިވަންކަންމަތީ ބޭއްވުމަށް ކޮންމެ ދިވެއްސަކުވެސް ޢަޒުމު ކަނޑައަޅަންޖެހޭކަމަށް ނައިބު ރައީސް ވިދާޅުވިއެވެ.

ދިވެހިންގެ އަމިއްލަވަންތަކަން ދަމަހައްޓާ، ސިޔާސީ ގޮތުންނާއި އިޤުތިޞާދީ ގޮތުން މިނިވަން ޤައުމެއްގެ ގޮތުގައި ދިވެހި ޤައުމު ބޭއްވުމަށް މިފަދަ ދުވަހެއްގައި ޢަޒުމު ކަނޑައަޅަންޖެހޭކަމަށް ނައިބު ރައީސް ވިދާޅުވިއެވެ.

"ބޮޑުތަކުރުފާނުގެ ޖިހާދުން ޢިބުރަތް ޙާސިލްކޮށް ޤައުމުގެ ޙައްޤުގައި ޖިހާދުކުރާނެ ޚިދުމަތްތެރި ދަރިންތަކެއް ބިނާކުރުމަށް އަޅުގަނޑުމެން މިއަދު ޢަޒުމު ކަނޑައަޅަންޖެހޭ. ސަރުކާރުގެ ސިޔާސަތަކީ އެންމެ ފުރަތަމަ މި ޤައުމަށް އިސްކަންދިނުމުގެ ސިޔާސަތު. ރައީސް އަބަދުވެސް ގެންދަވަނީ ދިވެހި ޤައުމުގެ މިނިވަންކަމާއި ދިވެހިންގެ އަމިއްލަވަންތަކަން ކަށަވަރުކޮށް ބޭއްވުމަށް މަސައްކަތްކުރައްވަމުން." ނައިބު ރައީސް ވިދާޅުވިއެވެ.

ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވީ ދިވެހި ޤައުމުގެ މިނިވަންކަމަށް ބުރުއަރާނެ އެއްވެސް ކަމަކަށް ފުރުޞަތު ނުދެއްވާނެ ކަމަށެވެ. އަދި ޤައުމީ ދުވަހުގެ ތަހުނިޔާ ވިދާޅުވަނީ ޤައުމުދެކެ ލޯބިވުން އިސްކުރުމަށާއި ޤައުމަށް ޚިދުމަތްކުރުމުގައި ދެމިތިބުމަށް އިލްތިމާސްކުރަމުންކަމަށް ނައިބު ރައީސްގެ ޚިޠާބުގައި ވިދާޅުވިއެވެ.

ރާއްޖޭގެ ޤައުމީ ދުވަހަކީ ރަބީޢުލްއައްވަލް މަހުގެ 1 ވަނަ ދުވަހެވެ. މި ދުވަހަކީ ޕޯޒުގީޒުންގެ އަޅުވެތިކަމުގެ ދަށުން 6 ބޭކަލަކު އިސްވެ ޖިހާދު ކުރައްވާ ދިވެހި ޤައުމަށް މިނިވަންކަން ހޯއްދަވާދެއްވި ދުވަހެވެ. އެއީ 1573 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ދުވަހެވެ. މި ދުވަހުގެ ބަޠަލަކީ ހއ. އުތީމަށް އުފަން އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޒަމެވެ.